Bakıda İslam Əməkdaşlıq Təşkilatına üzv ölkələrin əmək nazirliklərinin yüksək səviyyəli rəsmilərinin iclası keçirilir

Bakı:

26 °C

54 %

2 m/s

AZ RU EN

Ana səhifə / Siyasət / Bakıda İslam Əməkdaşlıq Təşkilatına üzv ölkələrin əmək nazirliklərinin yüksək səviyyəli rəsmilərinin iclası keçirilir

Bakıda İslam Əməkdaşlıq Təşkilatına üzv ölkələrin əmək nazirliklərinin yüksək səviyyəli rəsmilərinin iclası keçirilir

24.04.2013 [15:43]

Aprelin 23-də Bakıda Azərbaycan Respublikası Əmək və Əhalinin Sosial Müdafiəsi Nazirliyinin təşkilatçılığı ilə İslam Əməkdaşlıq Təşkilatına (İƏT) üzv ölkələrin əmək nazirliklərinin yüksək səviyyəli rəsmilərinin iclası işə başlayıb.
AzərTAc xəbər verir ki, iki gün davam edəcək iclasın məqsədi təşkilata üzv ölkələrin əmək nazirlərinin aprelin 25-26-da keçiriləcək konfransının gündəliyinin hazırlanması, nazirlərin görüşü zamanı müzakirəyə çıxarılacaq əsas sənədlərin yekun razılaşdırılmasıdır.
İclasın açılışında “Qurani-Kərim”dən ayələr oxunub.
İƏT-in əmək nazirlərinin I konfransına sədrlik etmiş Səudiyyə Ərəbistanı Krallığının əmək nazirinin müavini Moffarej Əl Hoqubani çıxış edib, II konfransın Sədrini və Büro üzvlərini təqdim edib.
Moffarej Əl Hoqubani tədbirin əhəmiyyətindən danışıb, iclasın Bakıda keçirilməsini yüksək qiymətləndirib. Bildirib ki, bu görüşün keçirilməsi hələ əmək nazirlərinin ilk görüşündə planlaşdırılıb. Bu görüş iş yerlərində təhlükəsizlik, işsizliyin aradan qaldırılması üçün yeni iş yerlərinin açılması və digər məsələləri birgə müzakirə etməyimiz üçün fürsətdir. Əmək nazirlərinin birinci görüşündən sonra Səudiyyə Ərəbistanı Krallığında əmək bazarlarının inkişafı, işsizliyin aradan qaldırılması istiqamətində işlər görülüb, özəl və dövlət sektorları arasında münasibətlərin yaradılması istiqamətində lazımi tədbirlər həyata keçirilib.
İkinci konfransın sədri, Azərbaycan Respublikasının əmək və əhalinin sosial müdafiəsi naziri Füzuli Ələkbərov çıxış edərək tədbirin əhəmiyyətindən, İƏT ilə Azərbaycanın uğurlu əməkdaşlığından danışıb.
F.Ələkbərov bildirib ki, Bakıda İƏT-ə üzv ölkələrin əmək nazirliklərinin yüksək səviyyəli rəsmilərinin görüşü İslam dünyası, eləcə də digər xalqlar arasında əməkdaşlığın inkişafı üçün qarşılıqlı etimad mühitinin möhkəmləndirilməsində ölkəmizin getdikcə artan rolunun növbəti əməli təsdiqidir.
Nazir vurğulayıb ki, bu görüş ilk dəfə olaraq üzv dövlətlər arasında əməkdaşlıq sahəsində vahid əlaqələndirmə mexanizminin formalaşmasına imkan yaradacaq. Görüşdə qəbul edəcəyimiz Bakı Çərçivə Sənədi, eyni zamanda, qətnamə və Bakı Bəyannaməsi belə bir əlaqələndirmə mexanizminin artıq rəsmi şəkildə təsdiqinə səbəb olacaq.
F.Ələkbərov diqqətə çatdırıb ki, bu görüş İƏT ilə Azərbaycan arasında mövcud əməkdaşlığın daha da genişlənməsinə töhfəsini verəcək. Ötən müddətdə İƏT-in Azərbaycan ilə bağlı bütün istiqamətlərdə, xüsusən ölkəmizin Ermənistan tərəfindən işğal olunmuş ərazilərinin azad edilməsi ilə bağlı konstruktiv və ədalətli münasibət, qətiyyətli mövqe nümayiş etdirməsini yüksək qiymətləndiririk. Bütün bunlar İƏT ilə Azərbaycan arasında əməkdaşlığın güclənməsi naminə Azərbaycan xalqının Ümummilli lideri Heydər Əliyev tərəfindən əsası qoyulan və Prezident İlham Əliyevin layiqincə davam etdirdiyi siyasi kursun uğurlu nəticələridir.
İşçi sessiyalarla davam edən iclasda “Təhlükəsiz və sağlam əmək şəraiti”, “İsşizliyin azaldılması və peşə bacarıqlarının təkmilləşdirilməsi”, “Miqrant işçilərin hüquqlarının müdafiəsi üzrə beynəlxalq qanunvericilik” və digər mövzularda çıxışlar olub, müzakirələr aparılıb.

Paylaş:

Baxılıb: 1159 dəfə