Milli Məclisin sədri Sahibə Qafarova İƏT PA çərçivəsində Özbəkistan parlamentinin spikeri ilə görüşüb

Bakı:

20 °C

83 %

2 m/s

AZ RU EN

Ana səhifə / Siyasət / Milli Məclisin sədri Sahibə Qafarova İƏT PA çərçivəsində Özbəkistan parlamentinin spikeri ilə görüşüb

Milli Məclisin sədri Sahibə Qafarova İƏT PA çərçivəsində Özbəkistan parlamentinin spikeri ilə görüşüb

03.06.2021 [09:00]

İyunun 1-də Milli Məclisin sədri Sahibə Qafarova İqtisadi Əməkdaşlıq Təşkilatı Parlament Assambleyasının (İƏT PA) İslamabadda keçirilən tədbirində iştirak edən Özbəkistan Respublikası Ali Məclisinin Qanunvericilik Palatasının sədri Nurdinjon İsmoilovun başçılıq etdiyi nümayəndə heyəti ilə görüşüb.
Parlamentin Mətbuat və ictimaiyyətlə əlaqələr şöbəsindən AZƏRTAC-a bildiriblər ki, görüşdə Sahibə Qafarova Azərbaycan və Özbəkistanın dost ölkələr olduğuna diqqət çəkərək, xalqlarımız arasındakı oxşar dini və mənəvi dəyərlərin əlaqələrimizin daha da dərinləşməsinə yaxşı imkan yaratdığını söyləyib. Bildirilib ki, müstəqillik əldə etdikdən sonra münasibətlərimizin keyfiyyətcə yeni səviyyəyə qalxmasında dövlət başçılarının qarşılıqlı səfərləri və aparılan danışıqlar əhəmiyyətli rol oynayıb. Yüksəksəviyyəli siyasi dialoq digər sahələrdə də münasibətlərimizin inkişafına müsbət təsirini göstərib.
Görüşdə 44 günlük Vətən müharibəsi dövründə Azərbaycanın qazandığı möhtəşəm Zəfər barədə danışan Milli Məclisin sədri ölkəmizin BMT Təhlükəsizlik Şurasının qətnamələrini öz gücü ilə reallaşdırdığını bildirib. O qeyd edib ki, Prezident, Müzəffər Ali Baş Komandan İlham Əliyevin rəhbərliyi ilə şanlı Azərbaycan Ordusu işğal altındakı torpaqlarımızı azad edib. İndi isə bu ərazilərdə bərpa və quruculuq dövrü başlayıb. Reallıqlarla barışmaq istəməyən Ermənistan minalanmış ərazilərin xəritəsini verməkdən imtina edir, sərhədlərin delimitasiyası məsələsində təxribatlara əl atır. Bütün bunlara baxmayaraq, Azərbaycan qarşısına qoyduğu məqsədlərə doğru inamla addımlayır.
Özbəkistan Respublikası Ali Məclisinin Qanunvericilik Palatasının sədri Nurdinjon İsmoilov Milli Məclisin sədri ilə görüşdən məmnunluğunu ifadə edib. Bildirib ki, Özbəkistanda Azərbaycanın Ümummilli Lideri Heydər Əliyevin əlaqələrimizin inkişafındakı xidmətlərini yüksək qiymətləndirir və xatirəsini əziz tuturlar.
Söhbət zamanı bildirilib ki, Özbəkistan ictimaiyyəti Prezident İlham Əliyevin rəhbərliyi ilə Azərbaycanın əldə etdiyi uğurlardan yaxşı xəbərdardır və Qafqazın bu bölgəsində baş verən prosesləri yaxından izləyir.
Nurdinjon İsmoilov siyasi, iqtisadi və humanitar sahələrdə münasibətlərimizin yüksələn xətlə inkişaf etdiyini vurğulayıb. O, hər iki ölkənin parlamentində dostluq qruplarının fəaliyyət göstərməsini təqdir edib. Bildirilib ki, deputatların qarşılıqlı səfərləri tərəfləri düşündürən məsələlərin müzakirəsi baxımından çox önəmlidir.
Söhbət zamanı parlamentlərarası əlaqələrin inkişaf perspektivləri və digər məsələlər barədə də danışılıb.

Paylaş:

Baxılıb: 723 dəfə