GUAM formatında ən çox fəallıq nümayiş etdirən ölkə

Bakı:

25 °C

64 %

5 m/s

Əlaqə

AZ RU EN

Ana səhifə / Siyasət / GUAM formatında ən çox fəallıq nümayiş etdirən ölkə

GUAM formatında ən çox fəallıq nümayiş etdirən ölkə

10.02.2022 [23:09]

Təşkilatın növbəti sammiti keçiriləcək

Azərbaycan digər beynəlxalq platformalar kimi GUAM çərçivəsində də fəal siyasətini davam etdirəcək

Nardar BAYRAMLI

Bu il GUAM ölkələri liderlərinin sammiti keçiriləcək. Bu barədə ölkəmizdə səfərdə olan Moldovanın Baş nazirinin müavini, xarici işlər və Avropaya inteqrasiya naziri Niku Popesku azərbaycanlı həmkarı ilə keçirilən mətbuat konfransında məlumat verib. Onun sözlərinə görə, GUAM iqtisadi əməkdaşlığı gücləndirmək üçün əlverişli təməl yaradır. Moldovalı nazir GUAM-ın yaxşı perspektivinin olduğunu da deyib: “Bildiyiniz kimi, bu il təşkilata sədrliyi Moldova edəcək. Biz ölkələr arasında siyasi dialoqu gücləndirmək istəyirik. Bu il GUAM-a üzv ölkələrin dövlət və hökumət başçılarının sammiti də planlaşdırılır, bunun detalları üzərində işləyirik. Biz, həmçinin sektoral əməkdaşlığı gücləndirmək istəyirik. Buraya nəqliyyat, enerji, ərzaqların çatdırılması və s. məsələlər daxildir. GUAM-ın praktiki tərəfləri çoxdur. Bu təşkilat həmrəylik, ərazi bütövlüyünə və suverenliyə qarşılıqlı dəstəyi təşviq etmək üçün yaradılıb. Ölkələrimiz GUAM və ATƏT kimi təşkilatların platformasında bir-birinin ərazi bütövlüyünü dəstəkləyir. Və biz indi də bu məsələlərlə bağlı koordinasiyalı əməkdaşlıq aparırıq”.

GUAM-ın növbəti sammiti təşkilatın işinin güclənməsinə nə dərəcədə təsir edə bilər? Məsələ ilə bağlı “Yeni Azərbaycan”a açıqlama verən Milli Məclisin Beynəlxalq münasibətlər və parlamentlərarası əlaqələr komitəsinin üzvü Ramin Məmmədov bildirib ki, GUAM təşkilatı ötən illər ərzində mühüm beynəlxalq platforma kimi özünü təsdiq edib. Onun sözlərinə görə, təşkilata üzv olan dövlətlər arasında bir çox sahələr üzrə fəal əməkdaşlıq əlaqələri mövcuddur: “Bu baxımdan, GUAM-Azərbaycan əlaqələri və GUAM çərçivəsində Azərbaycanla digər üzv ölkələr arasında münasibətlərin inkişaf tendensiyası aydın göstərir ki, təşkilatın yaranması müxtəlif sahələrdə əməkdaşlığın qurulması və inkişaf etdirilməsi baxımından vacib addım idi. Azərbaycan GUAM formatında ən çox fəallıq nümayiş etdirən ölkələrdən biridir. Belə ki, Azərbaycan zəngin enerji resurslarına malik olmaqla, enerji daşıyıcılarının əlverişli və təhlükəsiz marşrutlarla dünya bazarına çıxarılması istiqamətində xüsusi fəallıq nümayiş etdirir, dünyanın ayrı-ayrı güclü ölkələri ilə enerji sahəsində konstruktiv əməkdaşlıq qurur. Eyni zamanda, bizi bu təşkilatda birləşdirən vacib amillərdən biri dövlətlərin ərazi bütövlüyü ilə bağlı üzləşdiyi problem olmuşdu. Biz GUAM olaraq bütün beynəlxalq platformalarda bir-birimizin ərazi bütövlüyünü dəstəkləmişik. Və bu gün də dəstəkləyirik”.

Millət vəkili qeyd edib ki, GUAM-ın növbəti sammitində təşkilata üzv ölkələr arasında qarşılıqlı əməkdaşlığın inkişafı perspektivləri diqqət mərkəzində ola bilər: “GUAM-a növbəti sədrliyi Moldova edəcək. Bilirsiniz ki, Azərbaycanla Moldova arasında yaxşı əlaqələr mövcuddur. Amma bu əlaqələr daha da inkişaf etdirilə bilər. Moldovanın Baş nazirinin müavini, xarici işlər və Avropaya inteqrasiya naziri Niku Popeskunun ölkəmizə səfərində də münasibətlərimizin inkişafı diqqət mərkəzində olub. Ötən gün Azərbaycan Prezidenti İlham Əliyev Niku Popeskunu qəbul edərkən ölkələrimiz arasında əməkdaşlığın hərtərəfli inkişafı üçün böyük potensialın olduğunu vurğulayıb. Nazir Niku Popesku da Azərbaycan və Moldovanın daim bir-birinin ərazi bütövlüyünü və suverenliyini dəstəklədiyini diqqətə çatdırıb, eləcə də, iqtisadi, ticarət, sərmayə qoyuluşu, kənd təsərrüfatı, enerji sahələrində və digər sahələrdə əməkdaşlıq üçün geniş imkanların olduğunu bildirib. Düşünürəm ki, həm ikitərəfli, həm də GUAM çərçivəsində əlaqələrimiz daha da inkişaf edəcək. Ölkəmiz bundan sonra da digər beynəlxalq platformalar kimi GUAM çərçivəsində də fəal siyasətini davam etdirəcək”.

Paylaş:

Baxılıb: 879 dəfə