Türkiyə ilə Suriya arasında yaxınlaşma...

Bakı:

17 °C

88 %

4 m/s

Əlaqə

AZ RU EN

Ana səhifə / Siyasət / Türkiyə ilə Suriya arasında yaxınlaşma...

Türkiyə ilə Suriya arasında yaxınlaşma...

30.12.2022 [10:25]

Rusiya prosesdə vasitəçi kimi çıxış edir

Moskvada Rusiya müdafiə naziri, ordu generalı Sergey Şoyqu, Türkiyənin milli müdafiə naziri Hulusi Akar və Suriyanın müdafiə naziri Əli Abdullah Əyyub arasında üçtərəfli görüş olub. Bu barədə Rusiya Müdafiə Nazirliyi məlumat yayıb. Məlumatda qeyd olunub ki, müdafiə nazirləri regionda sabitlik üçün üçtərəfli dialoqun davam etdirilməsinin zəruriliyini müzakirə ediblər. Məlumata görə, nazirlər Suriya böhranını və bu ölkədə ekstremist qüvvələrlə mübarizə tədbirləri ilə bağlı da söhbət aparıblar. Qeyd edək ki, bu, Türkiyə və Suriya müdafiə nazirlərinin 11 ildən sonra ilk rəsmi təmasıdır. Mətbuata qapalı keçirilən görüşlə bağlı bildirilib ki, görüşdə Suriya böhranı, qaçqın problemi və Suriyadakı bütün terror təşkilatlarına qarşı birgə mübarizə məsələləri də müzakirə olunub. “Konstruktiv atmosferdə keçən görüş nəticəsində Suriyada və regionda sabitliyin təmin edilməsi və qorunub saxlanılması məqsədilə üçtərəfli görüşlərin davam etdirilməsi razılaşdırılıb”, - deyə məlumatda vurğulanıb.

Rusiya Müdafiə Nazirliyi təmasların davam edəcəyini açıqlayıb. Eyni zamanda, Suriyanın şimalında terror təşkilatı PKK-ya qarşı əməliyyatlar həyata keçirən Türkiyə Rusiyadan Suriya hava məkanını türk döyüş təyyarələrinin üzünə açmasını tələb edib. İclasda bununla bağlı qərarın qəbul edilib-edilmədiyi açıqlanmayıb.

Xatırladaq ki, ötən həftə Türkiyə prezidenti Rəcəb Tayyib Ərdoğan Suriya-Türkiyə-Rusiya üçlüyü olaraq bir addım atmaq istədiklərini bəyan edib: “İlk növbədə kəşfiyyat təşkilatlarımız, müdafiə nazirlərimiz, xarici işlər nazirlərimiz bir araya gəlməlidir. Sonra isə liderlər görüşməlidir”.

Məsələ ilə bağlı fikirlərini bölüşən Xəzər Müdafiə Tədqiqatları Mərkəzinin rəhbəri, hərbi ekspert Ramil Məmmədli bildirib ki, son vaxtlar Suriya məsələsində müəyyən irəliləyişlər nəzərə çarpmaqdadır. Onun fikrincə, regional sülhün və əməkdaşlığın formalaşdırılması üçün müəyyən razılaşmalar əldə olunub: “Bu razılaşmalara əsasən Türkiyə ilə Suriya arasında münasibətlər normal vəziyyətə qayıda bilər. Bir müddət əvvəl beynəlxalq tədbir çərçivəsində Türkiyə Prezidenti Rəcəb Tayyib Ərdoğanla Misir prezidenti Əbdül Fəttah əs-Sisi arasında təmas olmuşdu. Prezident Ərdoğan Suriya ilə də əlaqələrdə müəyyən irəliləyişlərin ola biləcəyinə dair fikirlər səsləndirmişdi. Bu görüşün də həmin müstəvidə baş tutduğunu düşünürəm. Fikrimcə, Rusiya bu prosesdə vasitəçi qismində iştirak edir. Eyni zamanda, Suriya məsələsində Türkiyənin konstruktiv mövqe nümayiş etdirməsinin tərəfdarı kimi çıxış edir. Yəqin ki, yaxın vaxtlarda Türkiyə ilə Suriya arasında hökumətlərarası komissiyanın ilkin toplantısı da keçirilə bilər. Belə bir toplantı problemlərin ilkin həllinə yol açacaq”.

Hərbi ekspert bildirib ki, hazırda Qərblə Rusiya arasında gedən mübarizə Rusiyanın bu məsələdə vasitəçi olmasını şərtləndirib. Belə ki, Rusiya hər iki dost saydığı ölkənin münasibətlərinin yaxınlaşmasına çalışır. “Rusiya Türkiyə ilə də Suriya ilə də mühüm əlaqələrə malikdir və bu nöqteyi-nəzərdə iki dövlət arasında münasibətlərin normallaşması üçün əzmkarlıq, fəallıq nümayiş etdirir. Düşünürəm ki, Rusiya bu istiqamətdə bir sıra addımlar da atacaq. Bu addımlar nəticəsində qarşıdakı mərhələdə Türkiyə ilə Suriya arasında müəyyən anlaşmalara da nail oluna bilər. Təbii ki, Türkiyə prosesdə öz maraqlarını qoruyacaq. Hətta özünə vacib olan bəzi məsələlərdə üstünlük də qazanacaq. Suriya Yaxın Şərqdə mühüm bir dövlətdir və həm Türkiyə, həm də Rusiya üçün vacib bir tərəfdaş ola bilər. Bu ölkədə sülhün bərqərar olması Rusiya üçün çox vacibdir. Çünki Suriya Rusiya üçün Aralıq dənizinə alternativ çıxış yoludur. Bu mənada, Suriya Türkiyə üçün də vacib əhəmiyyət daşıyır. Türkiyə yaxın şərq bölgəsində əsas oyunçulardan biridir. Biz yaxınlaşma prosesinin daha da sürətlənəcəyinin də şahidi ola bilərik”, - deyə hərbi ekspert əlavə edib.

PƏRVİZ

Paylaş:

Baxılıb: 952 dəfə