Milli Mətbuatın yaranmasının 140 illiyi münasibətilə fərdi jurnalist yazıları müsabiqəsi elan edilib

Bakı:

14°C

88%

1m/s

AZ RU EN

Ana səhifə / Sosial / Milli Mətbuatın yaranmasının 140 illiyi münasibətilə fərdi jurnalist yazıları müsabiqəsi elan edilib

Milli Mətbuatın yaranmasının 140 illiyi münasibətilə fərdi jurnalist yazıları müsabiqəsi elan edilib

26.05.2015 [10:04]

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu 22 iyul-Azərbaycan Milli Mətbuatının yaranmasının 140 illik yubileyi münasibətilə fərdi jurnalist yazıları müsabiqəsi elan edib.
Fonddan AZƏRTAC-a bildirilib ki, müsabiqə vətəndaş cəmiyyəti, hüquqi dövlət quruculuğu, fikir, söz və məlumat azadlığının, plüralizmin inkişaf etdirilməsi, insan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması, ictimai və dövlət maraqlarının müdafiəsi, Ermənistan-Azərbaycan, Dağlıq Qarabağ münaqişəsi haqqında həqiqətlərin dünya ictimaiyyətinə çatdırılması, Azərbaycanın ədalətli mövqeyinin müdafiə edilməsi, ölkəmizin dünya birliyinə inteqrasiyası, region dövlətləri ilə və digər ölkələrlə, beynəlxalq təşkilatlarla əməkdaşlığının inkişaf etdirilməsi, qaçqın və məcburi köçkünlərin, əhalinin sosial cəhətdən qayğıya ehtiyacı olan təbəqələrinin problemlərinin həlli ilə bağlı həyata keçirilən tədbirlərin işıqlandırılması, Azərbaycanın dövlətçilik tarixinin, milli adət-ənənələrinin, elm və mədəniyyətinin, azərbaycançılıq ideyasının təbliği, regionların sosial-iqtisadi inkişafının təşviqi, informasiya- kommunikasiya texnologiyalarının inkişaf etdirilməsi, diaspor quruculuğu, lobbiçilik və dünya azərbaycanlılarının həmrəyliyi, dini və milli tolerantlıq, millətlərarası münasibətlərin inkişaf etdirilməsi, gender, ailə və demoqrafiya məsələlərinin işıqlandırılması və s. istiqamətlər üzrə elan olunub.
Müsabiqədə ən azı bir il müddətində kütləvi informasiya vasitələrində (qəzet, jurnal və informasiya agentliklərində) fasiləsiz çalışan şəxslər iştirak edə bilərlər. Təqdim olunan yazıların sərlövhələri təklif edilən mövzularla eyni olmalıdır.
Müsabiqəyə hər jurnalist yalnız bir yazı təqdim edə bilər. Qəzet və jurnallarda çalışan jurnalistlərin yazıları yalnız çalışdıqları mətbuat orqanlarında dərc edilməlidir. İnformasiya agentliklərində çalışan jurnalistlərin yazıları isə son bir ildə, həftədə bir dəfədən az olmayaraq nəşr edilən qəzetlərdə çap olunmalıdır. Yazılar son bir ildə, həftədə bir dəfədən az olmayaraq nəşr edilən, Azərbaycan Mətbuat Şurasının tərtib etdiyi “qara siyahı”ya düşməyən mətbuat orqanlarında dərc edilməlidir.
Yazılar mayın 27-dən iyulun 9-dək qəbul olunacaq.
Qiymətləndirmə zamanı mövzunun əhatə olunması, jurnalist araşdırması, əsaslandırma, materialın oxucu üçün informasiyalılıq səviyyəsi, yazının dil və üslub xüsusiyyətləri, bədii-estetik ifadəsi, jurnalist obyektivliyi, qərəzsizliyi, tərəfsizliyi və məsuliyyəti, eləcə də ictimai maraqların müdafiəsi kimi meyarlar əsas götürüləcək.
Müsabiqənin mükafat məbləği birinci yer üçün 500 manat, ikinci yer (2 nəfər) üçün 400 manat, üçüncü yer (3 nəfər) üçün 300 manat müəyyənləşdirilib.
Yazılar 10 ballıq sistem üzrə qiymətləndirilir, maksimum 50 bal müəyyən olunur.

Paylaş:

Baxılıb: 732 dəfə