“Elmə yatırılan sərmayə inkişafa yatırılan sərmayədir” adlı layihəyə yekun vurulub

Bakı:

31 °C

40 %

5 m/s

Əlaqə

AZ RU EN

Ana səhifə / Sosial / “Elmə yatırılan sərmayə inkişafa yatırılan sərmayədir” adlı layihəyə yekun vurulub

“Elmə yatırılan sərmayə inkişafa yatırılan sərmayədir” adlı layihəyə yekun vurulub

21.08.2015 [10:00]

Azərbaycan Respublikasının Prezidenti yanında Gənclər Fondunun maliyyə dəstəyi ilə həyata keçirilən “Elmə yatırılan sərmayə inkişafa yatırılan sərmayədir” adlı layihəyə yekun vurulub.
Öncə layihənin rəhbəri Polad İbrahimov layihə haqqında məlumat verərək bildirib ki, əsas hədəf gənclərin elmə marağının artırılması, onların elmi fəaliyyətinin təşviq edilməsi, elmin inkişafı, həmçinin, gənc alimlərin daha səmərəli fəaliyyətinin təmin edilməsi istiqamətində dövlət tərəfindən görülən işlərin təbliğ edilməsi olub: “Layihə çərçivəsində “Azərbaycanlı gənc alimlərin elmi fəaliyyətinin təbliği”, “Azərbaycan elminin gələcək inkişafı gənc alimlərin fəaliyyətindən asılıdır”, “Qüdrət elmdədir, başqa cür heç kəs, heç kəsə üstünlük eyləyə bilməz” mövzularında təlimlər keçirib, ölkənin tanınmış elm xadimlərini bu görüşlərə cəlb etdik”.
Sonra çıxış edən “Yeni Azərbaycan” qəzetinin baş redaktoru Hikmət Babaoğlu hər bir cəmiyyəti irəli aparacaq vasitənin yalnız elm olduğunu bildirib. Onun sözlərinə görə, ölkəmizin, cəmiyyətimizin inkişafı da bu və ya digər dərəcədə elmin inkişafı ilə bağlıdır: “Bu, maraqlı bir layihədir və belə layihələrin tez-tez həyata keçirilməsi olduqca vacibdir. Bilirsiniz ki, hər bir cəmiyyəti irəli aparan əsas güc elmdir, təhsildir və onun intellektual göstəriciləridir. Bu baxımdan, bugünkü Azərbaycan gəncliyinin elmli, təhsilli olması vacibdir”.
Prezident İlham Əliyevin hər zaman Azərbaycan elminə, eləcə də, onun inkişafına xüsusi diqqət göstərdiyini deyən Hikmət Babaoğlu “Prezident İlham Əliyevin Azərbaycan elminə, elmin inkişafına qayğısı yüksək dəyərləndirilməlidir. Dövlət başçısının son illər ərzində imzaladığı sərəncamlar elmin inkişafının daim dövlətimizin diqqət mərkəzində olduğunu bir daha təsdiqləyir. Ümumiyyətlə, bu istiqamətdə son illər bir sıra vacib addımlar atılıb. Elmin İnkişaf Fondunun yaradılması, xüsusilə, gənclərin elmə cəlb olunması, AMEA-nın institutlarının maddi-texniki bazasının möhkəmləndirilməsi, akademiyadan vaxtilə bu və digər səbəblərə görə alınmış binaların geri qaytarılması, akademiya əməkdaşlarının əməkhaqlarının artırılması, Akademiya şəhərciyində akademik kitabxananın tikintisi ilə bağlı Sərəncamın verilməsi, ali məktəblərdə tədrisin səviyyəsinin artırılması yönündə ciddi islahatlar görülən işlərin daha effektiv nəticələr verməsini şərtləndirir”, - deyib.
Çıxışında müasir dünyada informasiya texnologiyalarının sürətli inkişafından da danışan “Yeni Azərbaycan” qəzetinin baş redaktoru hazırda dünyada qlobal güclərin milli dövlətləri sıradan çıxarmaq xəttini götürdüyünü bildirib. Hikmət Babaoğlu buna qarşı mübarizədə elmin, intellektual potensialın mühüm rol oynadığını və elmi, intellektual potensialı güclü olan milli dövlətləri sıradan çıxarmağın mümkün olmadığını da qeyd edib.
Daha sonra tədbir diskussiya formasında davam etdirilib.
Vüsalə CAVANŞİR

Paylaş:

Baxılıb: 870 dəfə