Azərbaycan və Gürcüstanın daxili işlər nazirləri transmilli cinayətkarlıqla birgə mübarizəni dəstəkləyirlər

Bakı:

13 °C

71 %

11 m/s

AZ RU EN

Ana səhifə / Sosial / Azərbaycan və Gürcüstanın daxili işlər nazirləri transmilli cinayətkarlıqla birgə mübarizəni dəstəkləyirlər

Azərbaycan və Gürcüstanın daxili işlər nazirləri transmilli cinayətkarlıqla birgə mübarizəni dəstəkləyirlər

27.11.2015 [09:57]

Azərbaycanın daxili işlər naziri general-polkovnik Ramil Usubovun dəvəti ilə Gürcüstanın daxili işlər naziri Giorgi Mqebrişvili ölkəmizə rəsmi səfərə gəlib.
Daxili İşlər Nazirliyinin mətbuat xidmətindən AZƏRTAC-a bildiriblər ki, noyabrın 26-da Giorgi Mqebrişvili və onu müşayiət edən şəxslər Fəxri xiyabanı ziyarət edərək xalqımızın Ümummilli lideri, müasir Azərbaycan dövlətinin memarı və qurucusu Heydər Əliyevin abidəsi önünə əklil qoyub, Ulu öndərin əziz xatirəsini ehtiramla yad ediblər.
Görkəmli oftalmoloq alim, akademik Zərifə xanım Əliyevanın məzarı üstünə də tər çiçəklər düzülüb.
Nümayəndə heyətinin üzvləri Şəhidlər xiyabanında Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman insanların məzarlarını da ziyarət edib, onların xatirəsinə ucaldılmış “Əbədi məşəl” kompleksinin önünə əklil qoyublar.
Sonra daxili işlər naziri, general-polkovnik Ramil Usubov Gürcüstanın daxili işlər naziri Giorgi Mqebrişvilinin başçılıq etdiyi nümayəndə heyəti ilə görüşüb.
Nazir xalqlarımız arasındakı dostluğun qədim tarixə malik olduğunu, ikitərəfli münasibətlərin qurulmasında və inkişafında Ulu öndər Heydər Əliyevin misilsiz xidmətlərini xatırladıb. Azərbaycan Prezidenti İlham Əliyevin və Gürcüstan rəhbərliyinin ikitərəfli əlaqələrin daha da genişləndirilməsinə xüsusi önəm verdiklərini qeyd edib. Ramil Usubov bu münasibətlərin ölkə başçılarının siyasi iradəsinə uyğun uğurla inkişaf etdiyini, dövlət və hökumət rəhbərlərinin qarşılıqlı səfərləri nəticəsində daha da dərinləşdiyini bildirib. Daxili İşlər nazirlikləri arasında əməkdaşlığın, xüsusilə də transmilli cinayətkarlıqla mübarizə sahəsində birgə əlaqələrin, təcrübə və informasiya mübadiləsinin və yaradılmış normativ-hüquqi bazanın ilk növbədə dost və qardaş xalqlarımızın mənafelərinə, bölgədə təhlükəsizliyin təmini işinə xidmət etdiyi diqqətə çatdırılıb.
Daha sonra nazir Ramil Usubov ölkədəki kriminogen durum barədə qısa məlumat verib.
Eyni zamanda, bildirilib ki, Azərbaycan Prezidentinin rəhbərliyi ilə həyata keçirilən daxili və xarici siyasət nəticəsində ölkəmizin beynəlxalq nüfuzu əhəmiyyətli dərəcədə artıb. Bunun əyani təzahürü olaraq ölkəmizin “Eurovision” və birinci Avropa Oyunları kimi möhtəşəm beynəlxalq tədbirlərə uğurla ev sahibliyi etdiyi vurğulanıb. Qeyd edilib ki, Azərbaycan həmin tədbirlərin yüksək təhlükəsizlik və əmin-amanlıq şəraitində keçirilməsinə nail olmaqla bu sahədə böyük təcrübə qazanıb.
Daxili işlər naziri mövcud problemlərdən də danışıb, transmilli mütəşəkkil cinayətkarlığın əsas növlərindən olan beynəlxalq terrorçuluq, narkotiklərin qanunsuz dövriyyəsi, insan alveri və qeyri-qanuni miqrasiya ilə mübarizənin diqqət mərkəzində dayandığını, onların qarşısının yalnız birgə səylərlə alınmasının mümkünlüyünü vurğulayıb.
Giorgi Mqebrişvili səmimi görüşə, ətraflı məlumata və göstərilən qonaqpərvərliyə görə təşəkkür edib, transmilli mütəşəkkil cinayətkarlığa qarşı birgə səylərlə mübarizə aparılmasına dair R.Usubovun mövqeyini bölüşüb. O, mehriban qonşu və yaxın dost olan Azərbaycanın daxili işlər orqanları ilə ölkəsinin müvafiq qurumları arasında əlaqələrin bundan sonra daha da inkişaf etdirilməsində maraqlı olduqlarını bildirib.
Görüşdə Gürcüstanın ölkəmizdəki səfiri Teymuraz Şaraşenidze iştirak edib.

Paylaş:

Baxılıb: 726 dəfə