TÜRKSOY mədəniyyət nazirləri Daimi Şurasının koordinatorluğu Azərbaycandan Qazaxıstana keçib

Bakı:

25 °C

61 %

5 m/s

Əlaqə

AZ RU EN

Ana səhifə / Sosial / TÜRKSOY mədəniyyət nazirləri Daimi Şurasının koordinatorluğu Azərbaycandan Qazaxıstana keçib

TÜRKSOY mədəniyyət nazirləri Daimi Şurasının koordinatorluğu Azərbaycandan Qazaxıstana keçib

02.12.2016 [09:33]

Dekabrın 1-də Şəki şəhərində TÜRKSOY mədəniyyət nazirləri Daimi Şurasının 34-cü toplantısı keçirilib.
AZƏRTAC xəbər verir ki, toplantı iştirakçıları əvvəlcə Ümummilli lider Heydər Əliyevin şəhər icra hakimiyyətinin binası qarşısında ucaldılan abidəsi önünə gül dəstələri düzərək xatirəsini ehtiramla yad ediblər.
“Marxal” müalicə-istirahət kompleksində keçirilən toplantının gündəliyinə qurumun ötənilki fəaliyyətinin qiymətləndirilməsi, ənənəvi festivalların, cari və yeni layihələrin müzakirəsi, üzv ölkələr arasında mədəniyyət sahəsindəki əməkdaşlığın daha da genişləndirilməsi və digər məsələlər daxil idi.
Toplantı iştirakçıları əvvəlcə AMEA Tarix İnstitutunun Azərbaycanın və türk dünyasının tarixinə dair çap etdirdiyi kitabların sərgisinə baxıblar.
Mərasimdə çıxış edən mədəniyyət və turizm naziri Əbülfəs Qarayev TÜRKSOY tərəfindən həyata keçirilən layihələrin əhəmiyyətindən söz açıb, təşkilatın təşəbbüsü ilə ölkəmizdə gerçəkləşən tədbirlərin ümumi mədəni irsimizin, incəsənətimizin qorunması, öyrənilməsi, türk xalqlarının yaxınlaşması, mədəni əməkdaşlığın inkişafında mühüm rol oynadığını diqqətə çatdırıb.
TÜRKSOY-un baş katibi Düsen Kaseinov çıxışında Şəkinin qədim tarixi abidələri, sənətkarlıq incilərini özündə birləşdirən nadir bir xəzinə olduğunu vurğulayıb.
Sonra TÜRKSOY-un fəaliyyəti ilə bağlı videoçarx nümayiş olunub.
Daha sonra Türkdilli Dövlətlərin Əməkdaşlıq Şurasının (Türk Şurası) baş katibi Ramil Həsənov çıxış edərək şuranın fəaliyyəti haqqında məlumat verib.
Şəki Şəhər İcra Hakimiyyətinin başçısı Elxan Usubov türk dünyasının tanınmış dövlət xadimlərini, elm və sənət adamlarını qədim Şəkidə görməkdən məmnunluğunu bildirib.
Sonra TÜRKSOY-a üzv ölkələrin nümayəndələri çıxış edərək mədəni əlaqələrin daha da inkişaf etdirilməsi üçün göstərilən səylərin artırılmasının vacibliyini vurğulayıblar.
Daha sonra TÜRKSOY mədəniyyət nazirləri Daimi Şurasının 34-cü toplantısı çərçivəsində təşkilatın 2016-cı il üzrə fəaliyyətinə həsr olunmuş işçi sessiya keçirilib.
Çıxış edən mədəniyyət və turizm naziri Əbülfəs Qarayev sessiyanın gündəliyi barədə məlumat verib. Bildirib ki, sessiyada TÜRKSOY-un fəaliyyəti və maliyyə hesabatları dinləniləcək, həmçinin 2017-ci il üçün “Türk dünyasının mədəniyyət paytaxtı”nın seçilməsi, gələn il üçün fəaliyyət planı, təşkilata üzvlük haqlarının artırılması, TÜRKSOY mədəniyyət nazirləri Daimi Şurasının 35-ci toplantısının keçiriləcəyi yerin müəyyən olunması kimi məsələlər müzakirə olunacaq.
TÜRKSOY-un baş katibi Düsen Kaseinov qurumun 2016-cı il üzrə fəaliyyətindən bəhs edən hesabatla çıxış edib.
Sonra gündəlikdəki digər məsələlərə dair hesabatlar dinlənilib, müzakirələr aparılıb.
Sonda yekun bəyannamə imzalanıb və TÜRKSOY mədəniyyət nazirləri Daimi Şurasının koordinatorluğu Azərbaycandan Qazaxıstana keçib.
Həmçinin gələn il üçün türk dünyasının mədəniyyət paytaxtı elan olunması ilə bağlı təklif nəzərdən keçirilib və Qazaxıstanın Türküstan şəhəri 2017-ci il üçün “Türk dünyasının mədəniyyət paytaxtı” elan olunub.
TÜRKSOY və Şəki Şəhər İcra Hakimiyyəti adından toplantıda iştirak edən TÜRKSOY-a üzv ölkələrin nümayəndələrinə xatirə hədiyyələri təqdim edilib.
Bununla da, TÜRKSOY mədəniyyət nazirləri Daimi Şurasının Şəkidə keçirilən 34-cü toplantısı işini başa çatdırıb.