“Konstitusiya və Suverenlik İli” çərçivəsində Dövlət Suverenliyi Günü münasibətilə Ağcabədidə tədbir keçirilmişdir

Bakı:

18 °C

68 %

3 m/s

AZ RU EN

Ana səhifə / YAP xəbərləri / “Konstitusiya və Suverenlik İli” çərçivəsində Dövlət Suverenliyi Günü münasibətilə Ağcabədidə tədbir keçirilmişdir

“Konstitusiya və Suverenlik İli” çərçivəsində Dövlət Suverenliyi Günü münasibətilə Ağcabədidə tədbir keçirilmişdir

22.09.2025 [15:46]

Sentyabr ayının 20-də “Konstitusiya və Suverenlik İli” çərçivəsində Azərbaycanın suverenliyi: Tarixi irs və müasir inkişaf mövzusunda ümumrayon konfransı keçirilib.

Tədbir iştirakçıları əvvəlcə müstəqil və müasir Azərbaycanın banisi, Ümummilli Lider Heydər Əliyevin abidəsi önünə gül dəstələri düzərək onun əziz xatirəsini ehtiramla yad etdilər.

İştirakçılar daha sonra Ağcabədi şəhər Qəhrəmanlar Parkında “Əbədi Məşəl” abidəsini ziyarət etdilər.

Tədbir Bayraq Muzeyinin iclas zalında keçirilən Konfransla davam etdirilmişdir.

Konfransın əvvəlində videoçarx nümayiş etdirilmiş, sonra isə Azərbaycanın Dövlət Himni səsləndirilmişdir.

Konfrans iştirakçıları Ulu Öndər Heydər Əliyevin və xalqımıza Qələbə sevinci yaşadan, dövlət müstəqilliyimiz və ərazi bütövlüyümüz uğrunda canından keçən şəhidlərin əziz xatirəsi 1 dəqiqəlik sükutla yad etdilər.

Konfransda açılış nitqi ilə çıxış edən Ağcabədi rayon İcra Hakimiyyətinin başçısı Rafil Hüseynov Ölkə Prezidenti cənab İlham Əliyevin rəhbərliyi ilə xalqımızın dövlət suverenliyini bərpa etdiyi və Azərbaycanın tarixində şərəfli səhifə açdığı vurğuladı. 44 günlük Vətən müharibəsində və 2023-cü ilin antiterror əməliyyatında qazanılan qələbələrin Azərbaycanın gücünü, birliyini və əzmini bütün dünyaya nümayiş etdirdiyi bildirilib. Eyni zamanda, 20 sentyabrın Dövlət Suverenliyi Günü kimi qeyd olunmasının və 2025-ci ilin “Konstitusiya və Suverenlik İli” elan edilməsinin dövlətçilik tariximizin mühüm mərhələlərini xalqımızın yaddaşında əbədiləşdirdiyi qeyd edildi.

Konfransda çıxış edən Azərbaycan Respublikası Milli Məclisinin deputatı Tahir Rzayev konfrans iştirakçılarını təbrik edərək bildirdi ki, beynəlxalq hüquqla tanınmış ərazisində dövlət suverenliyini və konstitusiya quruluşunu tam bərpa edən Azərbaycan dövləti indi özünün bütün sərhədlərinə və sərhədləri daxilində ərazisinin hər nöqtəsinə nəzarət edir. Prezidentin Sərəncamı ilə 2025-ci ilin “Konstitusiya və Suverenlik İli” elan olunması da bu prosesin məntiqi davamıdır.

YAP Ağcabədi rayon təşkilatının sədri Rövşən Əhmədov konfransda çıxış edərək bildirdi ki, Xalqımız Prezident, Müzəffər Ali Baş Komandan İlham Əliyevin rəhbərliyi ilə əzəli torpaqlarımızın işğaldan azad edilməsi, ərazi bütövlüyünün, dövlət suverenliyinin və ölkənin bütün ərazilərində Azərbaycan Respublikası Konstitusiyasının hüquqi qüvvəsinin tam bərpasının qürurverici təntənəsini yaşayır. Natiq vətən yolunda canlarını fəda edən bütün şəhidlərimizin xatirəsini dərin ehtiramla anaraq, Azərbaycan dövlətinin, xalqımızın tarixində ən parlaq səhifələrdən biri olan Dövlət Suverenliyi Günü münasibətilə konfrans iştirakçılarını təbrik etdi.

Konfransda Ağcabədi rayon prokuroru, baş ədliyyə müşaviri Vüqar Hacıyev “Konstitusiya dövlətçiliyin təməl daşı kimi”, Ağcabədi regional “ASAN xidmət” mərkəinin direktor müavini Şamxal Həsənov “Azərbaycan gəncliyi və dövlət quruculuğu”, Ağcabədi şəhər 11 nömrəli tam orta məktəbin tarix müəllimi Nuranə Quliyeva “Milli suverenliyin tarixi və müasir çağırışları” və Ağcabədi Pedoqoji Kollecinin direktoru Bəxtiyar Əliyev “Ağcabədidə vətənpərvərlik ənənələri” mövzusunda məruzə etdilər.

Konfrans panel müzakirələrdə davam etdirilmişdir.

Sonda konfrans iştirakçıları xatirə şəkli çəkdirdilər.

Paylaş:

Baxılıb: 395 dəfə