Şuşa-qürurumuzun zirvəsi, qələbəmizin rəmzi

Bakı:

23 °C

44 %

2 m/s

Əlaqə

AZ RU EN

Ana səhifə / YAP xəbərləri / Şuşa-qürurumuzun zirvəsi, qələbəmizin rəmzi

Şuşa-qürurumuzun zirvəsi, qələbəmizin rəmzi

08.11.2025 [21:48]

8 Noyabr Azərbaycan xalqının yaddaşına əbədi həkk olunmuş Qələbə və Qürur Günüdür. Bu tarix təkcə bir şəhərin azad edildiyi gün deyil, xalqımızın sarsılmaz iradəsinin, mübarizə əzminin, birliyinin və milli həmrəyliyinin təntənəsidir. 30 il boyunca həsrətlə gözlədiyimiz bu gün, torpaqlarımızın azadlığı, ədalətin bərpası və milli ruhun dirçəlişi kimi tarixdə öz yerini tutdu.

Şuşa əsrlərdir Azərbaycan mədəniyyətinin, musiqisinin, poeziyasının və tarixinin simvolu olub. Bu şəhər xalqımız üçün təkcə bir coğrafi məkan deyil, həm də milli kimliyimizin, mənəvi dəyərlərimizin və qürurumuzun rəmzidir. Üzeyir Hacıbəylinin, Bülbülün, Xurşidbanu Natəvanın doğulub boya-başa çatdığı bu torpaq, Azərbaycan mədəniyyətinin səsi və ruhudur. Şuşa azad olunanda sanki təkcə bir şəhər deyil, xalqın könlü, ruhu və tarixi azadlığa qovuşdu.

1992-ci ilin mayında Şuşanın işğalı Azərbaycan xalqının tarixində ən ağır səhifələrdən biri idi. O gün təkcə bir şəhər deyil, həm də xalqımızın mədəniyyət qalası düşmən tapdağı altına düşmüşdü. Lakin xalq bu ağrını içində daşısa da, ümidini heç vaxt itirmədi. Hər bir azərbaycanlı ürəyində bir arzu ilə yaşadı bir gün Şuşaya qayıtmaq, orada yenidən Azərbaycan bayrağını dalğalandırmaq!

Və nəhayət, o möhtəşəm gün gəldi. 2020-ci ilin 8 Noyabrında Azərbaycan Ordusu, Müzəffər Ali Baş Komandanın rəhbərliyi ilə Şuşanı azad etdi. 44 gün davam edən Vətən müharibəsinin ən parlaq səhifəsi məhz Şuşa zəfəri idi. Sıldırım qayalar, dərin dərələr və çətin relyeflər arasında gedən döyüşlər ordumuzun igidliyinin və xalqımızın yenilməz ruhunun təcəssümü oldu. Azərbaycan əsgəri düşmən üzərində təkcə hərbi deyil, mənəvi qələbə də qazandı. Şuşa əməliyyatı dünyada analoqu olmayan qəhrəmanlıq nümunəsidir.

Şuşanın azadlığı hər bir azərbaycanlının qəlbində böyük sevinc, fəxarət və minnətdarlıq hissi yaratdı. O gün milyonlarla insan göz yaşları içində sevinirdi çünki bu qələbə illərlə içimizdə yanan ümidin gerçəyə çevrilməsi idi. Şəhidlərimizin ruhu rahatlıq tapdı, xalqın qəlbində isə yenidən inam və qürur doğdu.

Bu gün Şuşa yenidən dirçəlir. Tarixi abidələr bərpa olunur, küçələr, evlər, məktəblər, mədəniyyət ocaqları yenidən qurulur. Cıdır düzündə azadlıq səsi, musiqi, şeir, bayraq və azan səsi yenidən ucalır. Şuşaya qayıdış sadəcə torpağa dönüş deyil, bu, xalqın öz kimliyinə, mədəniyyətinə və ruhuna qayıdışıdır. Şuşanın bərpası ilə Azərbaycan mədəniyyəti də yenidən dirçəlir.

8 Noyabr – Şuşa şəhəri günü, bu torpaq uğrunda canını qurban vermiş bütün qəhrəmanların xatirəsinə bir ehtiram günüdür. Bu gün biz şəhidlərimizi dərin hörmətlə yad edir, qazilərimizə minnətdarlıqla baş əyirik. Onlar öz canları bahasına xalqımıza qələbə sevinci, azadlıq və fəxarət bəxş etdilər.

Bu qələbə bir daha göstərdi ki, Azərbaycan xalqı bir olduqda onu heç bir qüvvə sındıra bilməz. Biz öz torpağımızın, tariximizin və gələcəyimizin sahibiyik.

Bu gün hər bir azərbaycanlı fəxrlə deyir: Şuşa mənimdir, Şuşa Azərbaycandır!

Qələbə Günümüz, Şuşa Günümüz mübarək olsun!

Elşən Səfərov

YAP Ağcabədi rayon təşkilatının məsləhətçisi

Paylaş:

Baxılıb: 401 dəfə