Ağdamın yenidən qurulması Azərbaycan dövlətinin gücünü, xalqımızın əzmini sübut edir

Bakı:

2 °C

87 %

10 m/s

Əlaqə

AZ RU EN

Ana səhifə / YAP xəbərləri / Ağdamın yenidən qurulması Azərbaycan dövlətinin gücünü, xalqımızın əzmini sübut edir

Ağdamın yenidən qurulması Azərbaycan dövlətinin gücünü, xalqımızın əzmini sübut edir

20.11.2025 [18:59]

Ağdam şəhərinin işğaldan azad olunduğu 20 noyabr tarixi uzun illər həsrətlə gözlənilən qayıdışın başlanğıc nöqtəsidir. Bu gün yalnız bir torpağın geri alınması deyil, eyni zamanda bir xalqın yaddaşının, ruhunun və kimliyinin bərpası deməkdir. Ağdam təkcə bir coğrafi ərazi deyil – bu şəhər Şuşa ilə yanaşı Azərbaycan musiqisinin beşiyi, Qarabağın mədəniyyət mərkəzi, minillik tariximizin canlı şahididir.

Ağdamın işğal illəri hər bir azərbaycanlının qəlbində ağrı ilə həkk olunmuş xatirələr yaşatdı. Şəhərin dağıdılması, tarixi-mədəni abidələrin yerlə-yeksan edilməsi, insanlarımızın doğma yurdlarından didərgin düşməsi xalqımızın yaddaşına silinməz izlər qoydu. 30 ildən artıq davam edən bu həsrət, hər bir ağdamlının ürəyində sağalmayan yaraya çevrildi. Lakin xalqımız heç vaxt torpaqlarını unutmadan yaşadı, işğalla barışmayaraq qayıdış gününü səbirlə gözlədi.

Bu gözlənti 2020-ci ildə reallığa çevrildi. 20 noyabrda Ağdamın azad olunması Azərbaycanın suverenlik tarixində yeni bir səhifə açdı. Bu qələbə Azərbaycan ordusunun gücünü, dövlətin siyasi iradəsini və xalqın birliyini bütün dünyaya göstərdi. Ağdamın azad olunması təkcə hərbi əməliyyatın nəticəsi deyildi – bu, illərlə davam edən milli həmrəyliyin, qətiyyətin və Vətən sevgisinin qələbəsi idi. Şəhidlərimizin canı, qazilərimizin qanı bahasına qazanılan bu şanlı zəfər xalqımızın birliyinin ən yüksək göstəricisi kimi tarixə yazıldı.

Azadlıqdan sonra Ağdamda başlayan genişmiqyaslı bərpa və yenidənqurma işləri şəhərin simasını tamamilə dəyişməkdədir. Uzun illər xarabalıq görüntüsü ilə bütün dünyanı sarsıdan bu şəhər bu gün dirçəlişin, inkişafın və dövlətçilik gücünün rəmzinə çevrilir. Yeni yolların çəkilməsi, strateji infrastrukturun qurulması, yaşayış məhəllələrinin salınması, mədəniyyət və sosial yönümlü layihələrin icrası Ağdamın gələcəyinə böyük ümid bəxş edir. Şəhərin Baş Planı əsasında həyata keçirilən layihələr regionun inkişafına yeni nəfəs gətirəcək, Ağdamı təkcə Qarabağın deyil, bütün ölkənin nümunəvi şəhərlərindən birinə çevirəcək.

Ağdamın bərpası yalnız binaların tikilməsi deyil, həm də tarixin yenidən canlandırılmasıdır. Cümə məscidi kimi simvolik abidələrin bərpası, mədəniyyət ocaqlarının dirçəldilməsi, qədim yaşayış izlərinin qorunması bu torpağın keçmişinə olan ehtiramın göstəricisidir. Burada hər bir daş, hər bir küçə, hər bir iz xalqımızın keçdiyi çətin və şərəfli yolun xatirəsidir. Ağdamın yenidən canlanması məcburi köçkünlərin illərlə qəlblərində daşıdıqları ümidin reallaşması, “bir gün mütləq qayıdacağıq” arzusunun gerçəkləşməsidir.

20 noyabr həm də şəhidlərimizin müqəddəs xatirəsinə ehtiram göstərilən gündür. Ağdamın azadlığı uğrunda canını fəda etmiş qəhrəmanların ruhu bu torpağın hər qarışında yaşayır. Onların fədakarlığı sayəsində bayrağımız bu gün Ağdamın üzərində qürurla dalğalanır. Şəhərin dirçəlişi eyni zamanda onların ruhuna hörmətin, onların mübarizəsinin davam etdiyinin sübutudur.

Ağdamın yenidən qurulması ölkə Prezidenti cənab İlham Əliyevin xüsusi nəzarətindədir. Bu gün Ağdam təkcə keçmişin ağrılarını deyil, həm də bu günün inkişafını və sabahın ümidlərini daşıyır. Şəhərin yenidən qurulması Azərbaycan dövlətinin gücünü, xalqımızın əzmini və Qarabağın gələcəyinə olan inamı bir daha təsdiqləyir. Ağdam artıq dağıntıların simvolu deyil – o, bir xalqın dirçəlişinin, yenidən doğuluşunun və böyük qayıdışın rəmzidir.

Rövşən Əhmədov

YAP Ağcabədi rayon təşkilatının sədri

Paylaş:

Baxılıb: 311 dəfə