Heydər Əliyev ideyalarının siyasi varisliyi və YAP-ın müasir Azərbaycan modelində rolu

Bakı:

16 °C

67 %

10 m/s

Əlaqə

AZ RU EN

Ana səhifə / YAP xəbərləri / Heydər Əliyev ideyalarının siyasi varisliyi və YAP-ın müasir Azərbaycan modelində rolu

Heydər Əliyev ideyalarının siyasi varisliyi və YAP-ın müasir Azərbaycan modelində rolu

21.11.2025 [10:02]

Yeni Azərbaycan Partiyasının 33 illiyi yalnız bir siyasi təşkilatın təsis edildiyi bir il deyil, həm də müstəqil dövlətçilik fəlsəfəsinin formalaşması və möhkəmlənməsi prosesinin nicat tapdığı bir tarixdir . 1990-cı illərin əvvəllərində Azərbaycanda yaşanan dərin siyasi böhran, iqtisadi çöküş və hərbi təhdidlər ölkəni məhv olmaq təhlükəsi ilə üz-üzə qoymuşdu. Belə bir zamanda xalqın idarəolunmaz vəziyyətdən çıxış yolu axtarması tamamilə təbii idi.

Heydər Əliyevin siyasi liderliyinə yönəlmiş ümummilli çağırış — “91-lərin müraciəti” — Azərbaycan siyasətində dönüş nöqtəsi oldu. Bu müraciət əsasında YAP-ın yaradılması dövlətçilik konsepsiyasının yeni mərhələyə keçməsi demək idi. Naxçıvanda keçirilən təsis konfransı Azərbaycanın demokratik siyasi sisteminin təməlini qoydu və xalqın milli iradəsinin ifadəsi kimi tarixə düşdü.

Heydər Əliyev hakimiyyətə qayıtdıqdan sonra Azərbaycan qısa müddət ərzində iqtisadi sabitlik, siyasi qəbulolunurluq və beynəlxalq legitimlik qazanmağa başladı. Dövlətin fundamental atributları formalaşdı, Konstitusiya qəbul edildi, idarəetmə sistemi müasirləşdirildi, ordu quruculuğunun əsası qoyuldu. Müstəqilliyin ilk illərində mövcud olmayan sabitlik yalnız YAP-ın güclü siyasi təşkilatlanması ilə mümkün oldu.

Bu gün YAP-ın davam etdirdiyi kurs Prezident İlham Əliyevin rəhbərliyi altında yalnız qorunmur, həm də yeni geosiyasi çağırışlara uyğun olaraq təkmilləşdirilir. 2003-cü ildən başlayaraq Azərbaycan iqtisadi yüksəliş dövrünə qədəm qoydu: ölkənin valyuta ehtiyatları rekord səviyyəyə qalxdı, xarici borc minimuma endirildi, sosial siyasət gücləndirildi, qeyri-neft iqtisadiyyatı genişləndi. Enerji diplomatiyası Azərbaycanın geosiyasi çəkisini artırdı və ölkə Avrasiyanın enerji təhlükəsizliyində aparıcı aktora çevrildi.

YAP-ın ideoloji əsasını təşkil edən milli-mənəvi dəyərlərə bağlılıq və azərbaycançılıq konsepsiyası Azərbaycan cəmiyyətində həm sabitliyi, həm də milli həmrəyliyi təmin edən mühüm amillərdəndir. Bu ideya çərçivəsində ölkədə yaşayan bütün etnik qruplar vahid Azərbaycan ailəsinin üzvü kimi cəmiyyətin inkişafında iştirak edirlər.

Partiyanın siyasi xəttinin ən böyük tarixi nailiyyəti isə, şübhəsiz, Qarabağ Zəfəridir. 44 günlük Vətən müharibəsində əldə olunan Qələbə YAP-ın illər boyunca sistemli şəkildə həyata keçirdiyi dövlət siyasətinin məntiqi nəticəsidir. Ordu quruculuğu, iqtisadi güc, diplomatik mövqelər və milli həmrəylik Azərbaycanın tarixi ədaləti bərpa etməsinə imkan verdi.

Postmüharibə dövründə həyata keçirilən quruculuq və reinteqrasiya prosesləri YAP-ın siyasi strategiyasının yeni mərhələsini təşkil edir. Qarabağ və Şərqi Zəngəzurda sıfırdan yaradılan müasir şəhərlər, kəndlər, kommunikasiya xətləri, sosial obyektlər Azərbaycanın gələcək inkişaf modelinin parlaq nümunəsidir.

Bu gün YAP təkcə tarixi irsə malik siyasi partiya deyil, həm də ölkənin gələcəyini müəyyən edən ideya platformasıdır. Onun gücü siyasi idarəçilikdə sabitlik, strateji baxış, milli maraqların qorunması və yenilikçi yanaşmaların sintezindən ibarətdir. 33 illik yol göstərir ki, YAP-ın siyasi xətti milli dövlətçiliyin təhlükəsizliyinin əsas dayaqlarından biri olaraq qalmaqdadır.

Abbas Pənahov,

Yeni Azərbaycan Partiyası

Nəsimi rayon təşkilatının sədr müavini

Paylaş:

Baxılıb: 282 dəfə