Azadlığın beşillik Zəfər yolu

Bakı:

13 °C

54 %

13 m/s

Əlaqə

AZ RU EN

Ana səhifə / YAP xəbərləri / Azadlığın beşillik Zəfər yolu

Azadlığın beşillik Zəfər yolu

01.12.2025 [15:00]

İlqar İlyasov
YAP Laçın rayon təşkilatının sədri

1 Dekabr – Laçının azad edilməsinin növbəti ildönümüdür. Bu tarix Azərbaycan tarixinin ən mühüm və qürurverici səhifələrindən biridir. 30 ilə yaxın işğal altında qalan Laçının 2020-ci ilin 1 dekabrında Azərbaycana qaytarılması həm Vətən müharibəsinin nəticələrindən biri, həm də dövlətimizin siyasi və hərbi gücünün bariz göstəricisi idi. Laçın tarixi boyunca strateji mövqeyinə görə Qarabağ ilə Azərbaycanın digər bölgələri arasında körpü rolu oynayıb. Məhz buna görə 1992-ci ildə Laçının işğalı həm hərbi, həm də mənəvi baxımdan böyük itki kimi dəyərləndirilirdi. İşğal illəri ərzində Laçının kəndləri dağıdıldı, təbiəti talan edildi, abidələri məhv olundu, sakinləri isə illərlə didərgin düşmüş halda doğma torpaqlarına qayıdacaqları günü səbirsizliklə gözlədilər. 2020-ci ildə Azərbaycan Ordusunun 44 günlük Vətən müharibəsində əldə etdiyi böyük qələbə regionda yeni reallıq yaratdı və bu reallıq Ermənistanı Laçını döyüşsüz şəkildə 1 dekabr tarixində Azərbaycana qaytarmağa məcbur etdi. Bu gün həmin tarixi hadisədən beş il keçir, lakin o günün sevinci, xalqın yaşadığı qürur və göz yaşları hələ də yaddaşlardan silinmir, çünki Laçının azad edilməsi millətin birliyi və qələbə əzminin ən böyük simvoluna çevrildi. Laçının azad edilməsindən sonra bölgədə genişmiqyaslı bərpa və quruculuq işlərinə start verildi. Dağıdılmış infrastruktur yenidən quruldu, tamamilə yeni elektrik, qaz, su və rabitə xətləri çəkildi, yollar, tunellər, körpülər inşa edildi, Laçın şəhəri müasir şəhərsalma prinsipləri ilə yenidən tikildi. Dövlət tərəfindən kəndlərin bərpası sürətləndirildi, məktəblər, xəstəxanalar, mədəniyyət mərkəzləri yenidən istifadəyə verildi və beş il ərzində Laçın sıfırdan dirçəldildi. Bu dövrdə ən sevindirici məqamlardan biri isə laçınlıların öz yurd-yuvalarına geri dönməsi oldu. İllərlə həsrət qalan insanlar dövlətin yaratdığı yeni məhəllələrə, smart kəndlərə köçürülərək öz doğma yurdlarında yenidən həyat qurmağa başladılar. Bu qayıdış Laçının ruhunu yenidən oyatdı və bölgədə həyat canlandı. Təbiəti ilə məşhur olan Laçın bu gün həm də turizm, kənd təsərrüfatı və ekoloji layihələr üçün böyük potensiala malik bölgə kimi inkişaf etdirilir. Dağları, meşələri, yaylaqları və təbii sərvətləri gələcək nəsillər üçün yeni imkanlar açır, infrastrukturun müasir səviyyədə qurulması isə bu potensialın daha da böyüyəcəyinə zəmin yaradır. Artıq Laçın təkcə keçmişdə işğalın ağrılarını yaşamış bir rayon deyil, müasir Azərbaycanın yenidənqurma gücünün simvoludur. 1 Dekabr – Laçının azad edilməsinin beşinci ildönümü Azərbaycan xalqı üçün qürur, zəfər və birlik günüdür. Bu gün biz təkcə tarixi qələbəni yada salmırıq, həm də beş il ərzində görülən böyük işləri, dirçələn həyatın hər addımını, öz yurdlarına qayıdan insanların sevincini qürurla izləyirik. Laçının azadlığı Azərbaycanın yenilməzliyinin, dövlətimizin iradəsinin və xalqımızın sarsılmaz birliyinin ən parlaq rəmzlərindən biri olaraq tarixdə əbədi qalacaq. Bu gün Laçın həm də mədəni baxımdan yeni mərhələyə qədəm qoyub və MDB tərəfindən Mədəniyyət Paytaxtı elan edilməsi onun təkcə Azərbaycanın deyil, regionun mədəni, tarixi və mənəvi mərkəzlərindən birinə çevrildiyini təsdiqləyir.

Paylaş:

Baxılıb: 552 dəfə