Dünya azərbaycanlılarının həmrəyliyi tarixi...

Bakı:

23 °C

57 %

2 m/s

Əlaqə

AZ RU EN

Ana səhifə / YAP xəbərləri / Dünya azərbaycanlılarının həmrəyliyi tarixi...

Dünya azərbaycanlılarının həmrəyliyi tarixi...

29.12.2025 [17:53]

31 Dekabr – Dünya Azərbaycanlılarının Həmrəylik günü dünya üzrə yaşayan milyonlarla azərbaycanlını vahid amal, ümumi milli kimlik və ortaq dəyərlər ətrafında birləşdirən ən mühüm bayramlardan biridir. Bu gün təkcə təqvimdə qeyd olunan tarix deyil, eyni zamanda milli şüurun, tarixi yaddaşın, vətənə bağlılığın və gələcəyə inamın rəmzidir. Dünyanın müxtəlif ölkələrində yaşayan azərbaycanlılar üçün bu gün mənəvi körpü rolunu oynayaraq onları ana Vətən – Azərbaycanla daha da yaxınlaşdırır. Dünya Azərbaycanlılarının Həmrəylik gününün əsası XX əsrin sonlarında qoyulmuşdur. 1989-cu ilin dekabrında Araz çayı boyunca baş verən hadisələr, sərhədlərin rəmzi olaraq sökülməsi Azərbaycan xalqının bölünmüş taleyinə etirazın, milli birliyin və azadlıq istəyinin açıq ifadəsi idi. Məhz bu tarixi hadisələrdən sonra, 1991-ci ildə Ümummilli Lider Heydər Əliyevin təşəbbüsü ilə 31 Dekabr rəsmi olaraq Dünya Azərbaycanlılarının Həmrəylik Günü elan edildi. Bu qərar azərbaycançılıq ideologiyasının formalaşması və möhkəmlənməsi baxımından mühüm tarixi addım oldu. Həmrəylik günü Azərbaycan xalqının harada yaşamasından asılı olmayaraq, öz milli köklərinə, dilinə, mədəniyyətinə və tarixine sahib çıxmasının təcəssümüdür. Bu gün dünya azərbaycanlıları bir daha sübut edirlər ki, fiziki olaraq fərqli ölkələrdə yaşasalar da, onların qəlbi, düşüncəsi və ruhu Azərbaycanla döyünür. Milli bayramlarımızın, adət-ənənələrimizin, ana dilimizin qorunması və gələcək nəsillərə ötürülməsi məhz bu həmrəyliyin nəticəsidir. Dünya Azərbaycanlılarının Həmrəylik günü həm də diaspor fəaliyyətinin gücləndirilməsi baxımından xüsusi əhəmiyyət daşıyır. Xaricdə yaşayan azərbaycanlılar bu gün vasitəsilə daha sıx birləşir, milli maraqlarımızın müdafiəsi istiqamətində birgə fəaliyyət göstərirlər. Azərbaycan həqiqətlərinin, xüsusilə də Qarabağla bağlı tarixi reallıqların dünya ictimaiyyətinə çatdırılmasında diaspor təşkilatlarının rolu danılmazdır. Bu həmrəylik nəticəsində Azərbaycan səsi beynəlxalq arenada daha gur eşidilir. Müstəqil Azərbaycan dövləti dünya azərbaycanlılarının birliyinə hər zaman xüsusi önəm vermişdir. Prezident İlham Əliyevin rəhbərliyi ilə həyata keçirilən siyasət diaspor quruculuğunun inkişafına, xaricdə yaşayan soydaşlarımızın təşkilatlanmasına və milli maraqlar ətrafında səfərbər olunmasına xidmət edir. Müxtəlif ölkələrdə keçirilən forumlar, konqreslər və tədbirlər Azərbaycan diasporunun gücünü və potensialını nümayiş etdirir. 31 Dekabr həm də gələcəyə ünvanlanan bir çağırışdır. Bu çağırış milli kimliyimizi qorumağa, dövlətçiliyimizi möhkəmləndirməyə, Azərbaycan adını daim uca tutmağa səsləyir. Xüsusilə gənc nəsil üçün bu gün böyük tərbiyəvi əhəmiyyətə malikdir. Gənclər həmrəyliyin, birlik və vətənpərvərliyin nə demək olduğunu dərk edir, milli dəyərlərə daha dərindən bağlanırlar. Dünya Azərbaycanlılarının Həmrəylik günü Azərbaycan xalqının gücünü, iradəsini və sarsılmaz birliyini əks etdirən əlamətdar gündür. Bu gün sübut edir ki, azərbaycanlılar harada yaşamasından asılı olmayaraq, bir millət, bir xalq və bir Vətən ətrafında birləşə bilirlər. Bu birlik və həmrəylik Azərbaycanın bu günü və gələcəyi üçün ən möhkəm dayaqlardan biridir. 31 Dekabr – qürur günümüz, birlik günümüz və milli varlığımızın bayramıdır.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 343 dəfə