Azərbaycan Cənubi Qafqazın enerji ehtiyatlarına məxsus və digər ölkələrə neft və qaz ixrac edən yeganə ölkədir

Bakı:

25 °C

64 %

1 m/s

AZ RU EN

Ana səhifə / YAP xəbərləri / Azərbaycan Cənubi Qafqazın enerji ehtiyatlarına məxsus və digər ölkələrə neft və qaz ixrac edən yeganə ölkədir

Azərbaycan Cənubi Qafqazın enerji ehtiyatlarına məxsus və digər ölkələrə neft və qaz ixrac edən yeganə ölkədir

23.01.2026 [15:32]

Prezident İlham Əliyevin 20 yanvar 2026-cı ildə Davosda keçirilən Dünya İqtisadi Forumu çərçivəsində “Euronews” televiziya kanalına verdiyi müsahibə Azərbaycanın müasir beynəlxalq münasibətlər sistemində artan siyasi, iqtisadi və geostrateji rolunun növbəti təzahürü kimi qiymətləndirilir. Müsahibə zamanı dövlət başçısı qlobal çağırışlar fonunda Azərbaycanın mövqeyini, strateji prioritetlərini və beynəlxalq əməkdaşlıq istiqamətlərini ardıcıl və prinsipial şəkildə təqdim edib.Prezident İlham Əliyev Azərbaycanın etibarlı və məsuliyyətli tərəfdaş kimi beynəlxalq nüfuzundan bəhs edərək vurğulayıb ki, ölkəmiz enerji təhlükəsizliyi sahəsində Avropa və daha geniş coğrafiya üçün mühüm rol oynayır. Cənub Qaz Dəhlizi kimi strateji layihələrin uğurla icrası Azərbaycanın uzunmüddətli enerji siyasətinin nəticəsi olaraq dəyərləndirilib. Dövlət başçısı eyni zamanda Azərbaycanın enerji strategiyasının yalnız karbohidrogen resursları ilə məhdudlaşmadığını, yaşıl enerji və bərpa olunan mənbələr sahəsində genişmiqyaslı layihələrin həyata keçirildiyini diqqətə çatdırıb.Müsahibədə iqtisadi inkişaf və investisiya mühiti məsələlərinə də xüsusi yer ayrılıb. Prezident İlham Əliyev bildirib ki, ölkəmizdə mövcud siyasi sabitlik, ardıcıl islahatlar və hüquqi təminatlar Azərbaycanın beynəlxalq investorlar üçün cəlbedici məkana çevrilməsini təmin edib. Qeyri-neft sektorunun inkişafı, nəqliyyat-logistika imkanlarının genişləndirilməsi və regional iqtisadi inteqrasiya Azərbaycanın dayanıqlı inkişaf strategiyasının əsas istiqamətləri kimi təqdim olunub.

Regional təhlükəsizlik və sülh məsələlərinə toxunan dövlət başçısı Cənubi Qafqazda yeni reallıqların formalaşdığını vurğulayaraq, Azərbaycanın beynəlxalq hüquqa əsaslanan mövqeyini bir daha bəyan edib. Prezident İlham Əliyev qeyd edib ki, regionda uzunmüddətli sabitlik və inkişaf yalnız qarşılıqlı etimad, suverenliyə hörmət və konstruktiv əməkdaşlıq əsasında mümkündür. Azərbaycanın sülh təşəbbüsləri bu baxımdan regional əməkdaşlıq üçün real imkanlar yaradır.

Davos kimi nüfuzlu beynəlxalq platformada “Euronews”in geniş auditoriyası qarşısında səsləndirilən bu fikirlər Azərbaycanın qlobal siyasətdə prinsipial, müstəqil və balanslı xətt yürüdən dövlət olduğunu bir daha nümayiş etdirdi. Prezident İlham Əliyevin müsahibəsi ölkəmizin beynəlxalq ictimaiyyətə verdiyi aydın mesaj kimi, Azərbaycanın sabitlik, inkişaf və əməkdaşlıq tərəfdarı olan güclü dövlət mövqeyini təsdiqlədi.

Lalə İskəndərova

YAP Qusar rayon təşkilatının fəal üzvü

Paylaş:

Baxılıb: 327 dəfə