Ümummilli lider Heydər Əliyevin zəngin irsi qiymətli xəzinədir

Bakı:

13 °C

82 %

5 m/s

Əlaqə

AZ RU EN

Ana səhifə / YAP xəbərləri / Ümummilli lider Heydər Əliyevin zəngin irsi qiymətli xəzinədir

Ümummilli lider Heydər Əliyevin zəngin irsi qiymətli xəzinədir

19.04.2014 [14:04]

YAP Xəzər rayon təşkilatı Ulu öndər Heydər Əliyevin anadan olmasının 91-ci ildönümü münasibətilə silsilə tədbirlərə start verib
Ümummilli liderimiz Heydər Əliyevin anadan olmasının 91-ci ildönümü münasibətilə Yeni Azərbaycan Partiyasının (YAP) Xəzər rayon təşkilatı silsilə tədbirlərə start verib. Belə ki, dünən YAP Xəzər rayon təşkilatının, Xəzər rayon İcra Hakimiyyətinin və Xəzər İnkişaf Fondunun birgə təşkilatçılığı ilə tədbirlər keçirilib. Tədbir iştirakçıları öncə Fəxri xiyabana gələrək Ümummilli lider Heydər Əliyevin xatirəsini dərin ehtiramla yad edib, məzarı önünə gül dəstələri qoyublar. Görkəmli oftalmoloq alim, akademik Zərifə xanım Əliyevanın da xatirəsi yad olunub, məzarı üzərinə tər güllər düzülüb.
Sonra tədbir iştirakçılarının Dövlət Bayrağı Meydanına ekskursiyası təşkil olunub. Tədbirdə Xəzər rayon İcra Hakimiyyətinin başçısı Gülağa İslamov, YAP Xəzər rayon təşkilatının sədri, partiyanın Siyasi Şurasının üzvü Namiq Əhmədov, təşkilatın sədr müavini, Milli Məclisin deputatı Rauf Əliyev də iştirak ediblər. Məlumat verilib ki, Dövlət Bayrağı Meydanının təməli 2007-ci il dekabrın 30-da Prezident İlham Əliyevin iştirakı ilə qoyulub. 2010-cu il sentyabrın 1-də isə Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin iştirakı ilə Dövlət Bayrağı Meydanının təntənəli açılış mərasimi keçirilib.
YAP Xəzər rayon təşkilatının və rayon ictimaiyyətinin nümayəndələri Prezident İlham Əliyevin təşəbbüsü ilə meydanda səkkizguşəli ulduz formasında yaradılmış Dövlət Bayrağı Muzeyi ilə də tanış olublar. Bildirilib ki, muzeydə müxtəlif dövrlərdə Azərbaycan ərazisində mövcud olmuş dövlətlərin, xanlıqların, o cümlədən, İrəvan xanlığının bərpa olunmuş bayraqları, həmçinin, XVII-XVIII əsrlərə aid bayraqların uc elementləri, gerblər, Azərbaycan Respublikasının müxtəlif illərdə qəbul olunmuş konstitusiyaları, poçt markaları, pul nişanlarının nümunələri, orden və medalları, Ümummilli lider Heydər Əliyevin rəhbərliyi ilə müstəqil Azərbaycan dövlətinin yaranması, formalaşması və inkişafını, Prezident İlham Əliyevin ölkəmizin tərəqqisi ilə bağlı fəaliyyətini əks etdirən çoxsaylı fotolar və sənədlər, Ulu öndər Heydər Əliyevin və Prezident İlham Əliyevin ali dövləti vəzifəyə seçildikdən sonra andiçmə mərasimlərində öpdükləri dövlət bayraqları, Silahlı Qüvvələrin Ali Baş Komandanının bayrağı, Silahlı Qüvvələrin qoşun növlərinin döyüş bayraqları və mərasim geyimləri nümayiş olunur.
YAP Xəzər rayon təşkilatının, Xəzər İnkişaf Fondunun və rayon ictimaiyyətinin nümayəndələri, həmçinin, Heydər Əliyev Mərkəzi ilə də tanış olublar. Ziyarətçilərə dünya memarlığının nadir incilərindən sayılan Heydər Əliyev Mərkəzi haqqında məlumat verilib. Bildirilib ki, Mərkəz Azərbaycan xalqının Ümummilli lideri Heydər Əliyevin dövlətçilik fəlsəfəsinin, azərbaycançılıq məfkurəsinin, Ulu öndərin irsinin dərindən öyrənilməsi və tədqiqi istiqamətində fəaliyyət göstərir. Həmçinin, Mərkəz Azərbaycanın tarixinin, dilinin, mədəniyyətinin və digər milli sərvətlərinin beynəlxalq aləmdə tanıdılması və təbliği, elm, təhsil, mədəniyyət, səhiyyə, idman, ekologiya və iqtisadiyyatın müxtəlif sahələrinin inkişafına xidmət edən layihələr həyata keçirir.
Mərkəzdə yaradılmış Heydər Əliyev Muzeyi ilə tanışlıq zamanı diqqətə çatdırılıb ki, Muzey Ümummilli liderin 90 illik yubileyi ərəfəsində istifadəyə verilib. Muzeydə toplanan məlumatlar ziyarətçilərə interaktiv formada çatdırılır. Üç mərtəbədən ibarət muzeydə Ümummilli lider Heydər Əliyevin şərəfli həyat yolu, Ulu öndər barədə maraqlı faktlar foto və videomateriallar vasitəsilə təqdim olunur. Muzey forma ilə yanaşı, məzmun orijinallığı ilə də seçilir. Burada materiallar iki paralel kontekstdə verilir. Ziyarətçilərə Ümummilli lider Heydər Əliyevin 1923-cü ildən 2003-cü ilədək ömür yolu ilə yanaşı, müxtəlif tarixi dövrlərdə Azərbaycanın ictimai-siyasi həyatında, mədəniyyət, iqtisadiyyat, idman sahələrində baş verən önəmli hadisələr barədə məlumatlar çatdırılır. Qonaqlar Muzeydə 1969-cu ildən 2003-cü ilədək Ulu öndər Heydər Əliyevin Azərbaycana rəhbərlik etdiyi dövrlərdə xidməti istifadəsində olan avtomobillərə baxıblar. Qeyd edilib ki, muzeyin ən maraqlı bölmələrindən biri də Ulu öndərin müxtəlif ölkələrin rəhbərləri ilə görüşlərini əks etdirən multimedia zalıdır. Buradakı qlobusda ölkələrin üzərinə toxunmaqla arxa fonda Ulu öndər Heydər Əliyevin dövlət başçıları ilə görüşlərinin və Ümummilli liderə təqdim edilən hədiyyələrin fotoları əks olunur. Ziyarətçilər Mərkəzdə yerləşən “Azərbaycan inciləri” Müzeyi ilə də tanış olublar. Tədbir iştirakçıları Mərkəzdən zəngin təəssüratlarla ayrılıblar.
Sonra jurnalistlərə açıqlama verən YAP Xəzər rayon təşkilatının sədri Namiq Əhmədov bildirib ki, müstəqil Azərbaycan dövlətinin qurucusu, Ümummilli lider Heydər Əliyevin zəngin irsi qiymətli xəzinədir. Ona görə də, bu zəngin irs daim öyrənilməlidir. N.Əhmədov onu da deyib ki, YAP Xəzər rayon təşkilatı Ulu öndərin anadan olmasının 91-ci ildönümü münasibətilə tədbirlər keçirəcək. Belə ki, Xəzər rayonunun yaradıcılıq mərkəzlərində, ümumtəhsil məktəblərində fəaliyyət göstərən istedadlı gənc rəssamların sərgisinin təşkili, Quba rayonunda Xəzər və Quba gənclərinin iştirakı ilə Heydər Əliyev Fondunun yaradılmasının 10 illiyi münasibətilə elmi seminarın keçirilməsi, internat və uşaq evlərindəki valideyn himayəsindən məhrum olan şagirdlər üçün və s. müxtəlif tədbirlərin keçirilməsi nəzərdə tutulur.
YAP Xəzər rayon təşkilatının sədr müavini, millət vəkili Rauf Əliyev isə bildirib ki, Ümummilli lider Heydər Əliyevin anadan olmasının 91-ci ildönümü münasibətilə Azərbaycanda müxtəlif tədbirlər həyata keçirilməkdədir: “Ulu öndər Heydər Əliyev müstəqil Azərbaycanın qurucusudur. Tarixi təcrübə göstərir ki, zəngin təbii və iqtisadi sərvətlərə malik olan ölkələrdə müstəqilliyin qorunub saxlanılması bəzən onun əldə edilməsindən daha çətin və mürəkkəb olur. Düşmən təcavüzünə məruz qalan və müstəqilliyinin ilk illərində təcrübəsiz dövlət rəhbərləri tərəfindən idarə olunan Azərbaycanda isə bu, daha da çətin idi. Ölkəni bu ağır vəziyyətdən 1993-cü ilin iyun ayında xalqın təkidli tələbi ilə yenidən hakimiyyətə qayıdan Ümummilli lider Heydər Əliyev xilas etdi. Dahi şəxsiyyət Heydər Əliyevin əsasını qoyduğu və Prezident İlham Əliyev tərəfindən daha da inkişaf etdirilən strateji kurs Azərbaycanı zirvələrə doğru gedən ölkələr qrupunda öncül mövqeyə çıxarıb. Bu gün Heydər Əliyev Fondunun prezidenti, millət vəkili Mehriban xanım Əliyeva tərəfindən də respublikamızda, o cümlədən, Xəzər rayonunda böyük sosial və humanitar layihələr həyata keçirilir. Bütün bunlar xalqımız tərəfindən yüksək qiymətləndirilir”.
Nardar BAYRAMLI

Paylaş:

Baxılıb: 994 dəfə