Yeni Azərbaycan Partiyası Ağdam rayon təşkilatı bələdiyyə seçkilərinə fəal şəkildə hazırlaşır

Bakı:

14 °C

77 %

9 m/s

AZ RU EN

Ana səhifə / YAP xəbərləri / Yeni Azərbaycan Partiyası Ağdam rayon təşkilatı bələdiyyə seçkilərinə fəal şəkildə hazırlaşır

Yeni Azərbaycan Partiyası Ağdam rayon təşkilatı bələdiyyə seçkilərinə fəal şəkildə hazırlaşır

07.11.2014 [09:32]

İsgəndər Quliyev: Əsas məqsədimiz YAP üzvü olan gənclərin və qadınların seçkilərdə uğur qazanmasına nail olmaqdır
“Azərbaycan daha bir vacib siyasi proses ərəfəsindədir. Belə ki, dekabrın 23-də ölkəmizdə növbəti bələdiyyə seçkiləri keçiriləcək. Azərbaycan müstəqillik əldə etdikdən sonra ölkəmizdə keçirilən bütün seçkilərin qalibi olan Yeni Azərbaycan Partiyası (YAP) növbəti bələdiyyə seçkilərinə də fəal şəkildə hazırlaşır”.
Bunu “Yeni Azərbaycan” qəzetinə açıqlamasında YAP Ağdam rayon təşkilatının və rayon təşkilatı Seçki Qərargahının sədri İsgəndər Quliyev deyib. Onun sözlərinə görə, oktyabrın 29-da keçirilən Yeni Azərbaycan Partiyasının rayon və şəhər təşkilatları sədrlərinin ümumrespublika müşavirəsində partiyanın İcra Katibliyi tərəfindən verilən tövsiyə və tapşırıqlar hər yerdə olduğu kimi, YAP Ağdam rayon təşkilatında da tam məsuliyyətlə yerinə yetirilməkdədir: “Fəaliyyət proqramına uyğun olaraq YAP Ağdam rayon təşkilatının Seçki Qərargahı yaradılıb. Seçki Qərargahının iclası keçirilib, bu günə qədər görülmüş işlər müzakirə olunub, konkret vəzifələr müəyyən edilib. Qeyd etmək lazımdır ki, seçki kampaniyalarının keçirilməsi ilə bağlı rayon təşkilatının böyük seçki təcrübəsi var. Bütün seçkilərdə olduğu kimi, bələdiyyə seçkilərini də uğurla başa vurmaq üçün geniş imkanlarımız var”.
İsgəndər Quliyev bildirib ki, Ağdam rayonu üzrə 119 saylı Ağdam kənd Seçki Dairəsinin 39 seçki məntəqəsində 32952 nəfər seçici qeydiyyatdadır: “Onu da qeyd edim ki, hazırda YAP Ağdam rayon təşkilatı 80 ərazi ilk partiya təşkilatında 5793 nəfər partiya üzvünü birləşdirir. Onlardan 2353 nəfəri qadınlar, 1660 nəfəri isə gənclərdir. Eyni zamanda, rayon təşkilatı tərəfindən Ağdam rayonunda 14 bələdiyyə üzrə 132 nəfər bələdiyyə üzvlüyünə namizəd irəli sürülüb. İrəli sürülən namizədlərin 53 nəfəri gənclər, 50 nəfəri isə qadınlardır. Əsas məqsədimiz YAP üzvü olan gənclərin və qadınların seçkilərdə uğur qazanmasına nail olmaqdır”.
Onun sözlərinə görə, bələdiyyə seçkiləri ilə əlaqədar olaraq ziyalılardan ibarət təbliğat-təşviqat qrupları yaradılıb. Bundan başqa, dairədə və 39 seçki məntəqəsində məşvərətçi səs hüquqlu üzvlər, həmçinin, müşahidə aparacaq şəxslər müəyyənləşdirilib.
Yeri gəlmişkən, bəhs olunan məsələlər YAP Ağdam rayon təşkilatının Seçki Qərargahının növbəti toplantısında da geniş müzakirə edilib. İclası giriş sözü ilə açan YAP Ağdam rayon təşkilatının Seçki Qərargahının sədri İsgəndər Quliyev bələdiyyə seçkilərinə hazırlıq işlərinin gedişi, habelə təbliğat kampaniyasına hazırlıq vəziyyəti, bələdiyyə seçkiləri ilə əlaqədar səlahiyyətli nümayəndələrin təyin edilməsi və namizədlərin irəli sürülməsi ilə bağlı yığıncaq iştirakçılarına ətraflı məlumat verib.
Daha sonra çıxış edən Seçki Qərargahının üzvləri - Elbrus Hüseynov, Hafiz Əzimzadə, Teyyub Nəcəfov və başqaları dekabrın 23-də keçiriləcək bələdiyyə seçkilərinə hazırlıq işləri ilə bağlı fikir və təkliflərini bildiriblər.

Paylaş:

Baxılıb: 979 dəfə