YAP Nizami rayon təşkilatı Gənclər Birliyinin IV hesabat-seçki konfransı keçirilib

Bakı:

11 °C

82 %

7 m/s

Əlaqə

AZ RU EN

Ana səhifə / YAP xəbərləri / YAP Nizami rayon təşkilatı Gənclər Birliyinin IV hesabat-seçki konfransı keçirilib

YAP Nizami rayon təşkilatı Gənclər Birliyinin IV hesabat-seçki konfransı keçirilib

24.02.2015 [11:18]

Konfransda Gənclər Birliyinin yeni sədri, müavinləri, İdarə Heyəti, Şura üzvləri və YAP GB-nin növbəti konfransına nümayəndələr seçilib
Fevralın 21-də Yeni Azərbaycan Partiyası (YAP) Nizami rayon təşkilatı Gənclər Birliyinin IV hesabat-seçki konfransı keçirilib.
Tədbirdə çıxış edən YAP Nizami rayon təşkilatının sədri, Milli Məclisin deputatı Sədaqət Vəliyeva bildirib ki, hazırda YAP Nizami rayon təşkilatının 11253 nəfər üzvü var, onlardan 5511 nəfərini gənclər, 5293 nəfərini isə qadınlar təşkil edir, rayon təşkilatının 149 ərazi ilk partiya təşkilatı fəaliyyət göstərir: “1993-cü ildə yaradılmış Nizami rayon təşkilatı mühüm inkişaf yolu keçib, üzvlərinin və ərazi təşkilatlarının sayı əhəmiyyətli dərəcədə artıb. Nizami rayonunda əhalinin YAP-a axını, ilk ərazi partiya təşkilatlarının yaradılması Ulu öndər Heydər Əliyevin əsasını qoyduğu siyasi kursa və Onun layiqli davamçısı, Prezident İlham Əliyevə inamdan irəli gəlir”.
YAP Nizami rayon təşkilatı Gənclər Birliyinin III konfransdan ötən müddət ərzində görülmüş işlərə dair hesabatını təqdim edən rayon təşkilatı GB-nin sədri, YAP Gənclər Birliyi Ofisinin rəhbəri Əli Pənahov qeyd edib ki, GB-nin III konfransında üzvlərinin sayı 4256 nəfər idisə, bu gün bu rəqəm 5511-dir. Bu müddət ərzində YAP Nizami rayon təşkilatı Gənclər Birliyi bir çox işlər görüb, öz sıralarını daha da genişləndirib: “YAP Nizami rayon təşkilatı Gənclər Birliyinin üzvlərinin 2357 nəfərini qadınlar təşkil edir. Gənc üzvlərimizin 3061 nəfəri ali, 1470 nəfəri orta ixtisas, 980 nəfəri orta təhsillidir, 3 nəfəri isə elmlər namizədidir. Gənclərin 2042 nəfəri təhsil, 1573 nəfəri səhiyyə, 324 nəfəri idarəetmə sahəsində, qalan üzvlər isə digər idarə və müəssisələrdə çalışır, onların 378 nəfəri tələbədir. Sıralarımızda olan gənclərin 3 nəfəri Avropa çempionu, 2 nəfəri dünya çempionu, 1 nəfəri paralimpiya medalçısı, 28 nəfəri respublika çempionu, 6 nəfəri idman ustası, 2 nəfəri Prezident Mükafatçısı, 9 nəfəri isə ustalığa namizəddir. 12 gəncimiz isə 23 dekabr 2014-cü ildə keçirilən bələdiyyə seçkilərində seçicilərin etimadını qazanaraq bələdiyyə üzvü seçiliblər. Hesabat dövründə YAP Nizami rayon təşkilatı Gənclər Birliyinin sıralarına 1255 nəfər qəbul olunub”.
Sonra hesabat ətrafında çıxışlar olub.
Çıxış edən YAP Nizami rayon təşkilatı Gənclər Birliyinin üzvləri Elşəm Mirzəyev, Asif Əliyev, Ayan Yusifova və başqaları III konfransdan ötən müddət ərzində görülmüş işlərə dair hesabatı qənaətbəxş hesab etdiklərini bildirib və gənclərin fəaliyyətini yüksək qiymətləndiriblər.
Sonra təşkilati işlərə baxılıb, YAP Nizami rayon təşkilatı Gənclər Birliyinin Şura üzvləri, İdarə Heyəti və YAP Gənclər Birliyinin növbəti konfransına nümayəndələr seçilib.
Konfrans iştirakçılarının yekdil səsverməsinə əsasən Sevinc Abdullayeva YAP Nizami rayon təşkilatı Gənclər Birliyinin sədri, həmçinin, sədrin müavinləri seçiliblər.
Təşkilati məsələlərdən sonra çıxış edən YAP Nizami rayon təşkilatı Gənclər Birliyinin sədri Sevinc Abdullayeva göstərilən etimada görə partiya rəhbərliyinə minnətdarlığını bildirib. Qeyd edib ki, YAP Nizami rayon təşkilatı Gənclər Birliyi bundan sonra da rayonun və respublikanın ictimai-siyasi, sosial-mədəni həyatında aktiv olacaq, veriləcək tapşırıqları vaxtında və effektiv yerinə yetirəcəkdir.
Çıxış edən Milli Məclis sədrinin I müavini, YAP İdarə Heyətinin üzvü Ziyafət Əsgərov deyib ki, gənclərimiz ölkəmizi beynəlxalq aləmdə layiqincə təmsil edir, Azərbaycanla bağlı həqiqətlərin dünya ictimaiyyətinə çatdırılmasında, mədəni-mənəvi irsimizin təbliğ olunmasında fəallıq nümayiş etdirir: “Bütün bunlar gəncliyimiz üçün dövlət tərəfindən yaradılmış əlverişli imkanlar, verilmiş mükəmməl təhsil və özünü təsdiqləmək üçün ideal məkan əsasında ərsəyə gəlib. Müasir Azərbaycan gəncləri unutmurlar ki, onlar müstəqil dövlətin azad gəncləri olaraq, bugünkü uğurlara məhz Ümummilli lider Heydər Əliyevin əsasını qoyduğu və hazırda Prezident İlham Əliyevin davam etdirdiyi siyasi kurs nəticəsində sahib olublar”.
YAP İcra katibinin müavini, Milli Məclisin deputatı Siyavuş Novruzov bu gün partiyanın sıralarında 650 minə yaxın üzvün olduğunu bildirib və qeyd edib ki, onların arasında gənclər xüsusilə fərqlənirlər.
YAP İcra katibinin müavini vurğulayıb ki, Yeni Azərbaycan Partiyası Azərbaycan siyasi palitrasında milli siyasi iradəni təmsil edən avanqard siyasi qüvvədir və partiyanın fəaliyyəti xalqımızın ali mənafeyinin ifadəsi kimi çıxış edir: “Bu gün Prezident İlham Əliyevin Sədri olduğu YAP-ın nüfuzu getdikcə artmaqdadır. Partiyanın cəmiyyətin inkişafına yönəlmiş çoxsaylı sosial layihələr reallaşdırması, gəncləri dövlətçilik və milli maraqlar ətrafında sıx birləşdirməsi onun tərəfdarlarının sayının artmasına səbəb olub. Ümummilli lider Heydər Əliyevin əsasını qoyduğu inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan Cənubi Qafqazın lider dövlətinə çevrilib”.
YAP Siyasi Şurasının üzvü, Nizami rayon İcra Hakimiyyətinin başçısı Tahir Budaqov çıxışında deyib ki, Azərbaycan gəncliyi ölkənin ictimai-siyasi, sosial-iqtisadi və digər sahələrində aktiv fəaliyyət göstərir, intellektual imkanları və yaradıcılığı ilə dövlətçiliyimizin möhkəmləndirilməsi işinə öz töhfəsini verir.
Tahir Budaqov bildirib ki, Azərbaycan dövləti siyasətində gənclərə üstünlük verməklə bərabər bu istiqamətdə siyasəti gənclərin bilavasitə iştirakı ilə formalaşdırıb həyata keçirir. Bu, onu göstərir ki, Azərbaycan dövləti gənc nəslə həm etibar edir, onun qayğıları ilə məşğul olur, həm də gənclərin ideyalarını, təkliflərini bilavasitə özlərindən alaraq həyata keçirir. Prezident İlham Əliyevin müvafiq Sərəncamla təsdiqlədiyi “2015-2025-ci illərdə Azərbaycan gənclərinin İnkişaf Strategiyası”nın qəbul edilməsi məhz bu siyasətin bariz nümunəsidir.
Çıxış edənlər bir daha Yeni Azərbaycan Partiyasının Sədri, Prezident İlham Əliyevin gənclərə göstərdiyi diqqət və qayğıdan bəhs ediblər. Yeganə milli siyasi qüvvə olan YAP-ın gənclərin fəaliyyəti və inkişafı üçün hərtərəfli şərait yaratdığı bildirilib.
Çıxışlardan sonra konfrans işini yekunlaşdırıb.