Şuşa sakinlərinin sayı 570 nəfər oldu!

Bakı:

14°C

82%

3m/s

Əlaqə

AZ RU EN

Ana səhifə / Xəbər lenti / Şuşa sakinlərinin sayı 570 nəfər oldu!

Şuşa sakinlərinin sayı 570 nəfər oldu!

31.07.2024 [10:38]

Mayın 10-u xalqımız üçün əziz və unudulmaz bir tarixdir. Həmin gün ümummilli liderimiz Heydər Əliyevin doğum günüdür. Ancaq son illərdə bu tarix başqa mənada da bizləri xoşbəxt edir. Çünki ölkə başçısı Ulu Öndərin doğum gününü onun vəsiyyəti olan, azadlığını görməsə də azad olunacağına əmin olduğu Şuşada qeyd edir.

Bu il isə 10 may tarixində Prezident İlham Əliyev və birinci xanım Mehriban Əliyeva Şuşada birinci yaşayış kompleksinin açılışında iştirak etdilər, şəhərə köçmüş ilk sakinlərlə görüş keçirdilər. Bəli, nəhayət o gün gəlib çatmışdı. Şuşaya ilk və möhtəşəm köç reallaşmışdı. Heydər Əliyevin doğum gününə təsadüf edən bu əlamətdar hadisə təbii ki, hər birimizin sevincinə və qüruruna səbəb oldu. Qeyd edək ki, ilkin mərhələdə birinci yaşayış kompleksinə köç qrafikinə əsasən 20 ailə olmaqla 88 nəfər köçürüldü.

Məlumat üçün bildirək ki, Şuşaya ikinci köç mayın 14-də baş tutub. Bu mərhələdə 38 ailə-136 nəfər köçürülüb. Üçüncü köç mayın 25 də reallaşıb. Bu zaman 32 ailə - 125 nəfər köçürülüb. Dördüncü köç karvanı mayın 30-da yola salınıb. Həmin gün 57 nəfərdən ibarət 15 ailəyə mənzillərin açarları təqdim edilib. Nəhayət, iyunun 12-də mədəniyyət paytaxtımıza beşinci köç karvanı yola salınıb. Bu mərhələdə isə 21 ailə-85 nəfər doğma torpaqlarına qovuşub.

6-cı köç karvanı...

Ötən gün Prezident İlham Əliyevin tapşırığına uyğun olaraq Şuşaya növbəti-6-cı köç karvanı reallaşıb. İyulun 30-da respublikanın müxtəlif ərazilərində yataqxana, sanatoriya, pioner düşərgəsi, yarımçıq tikililər və inzibati binalarda müvəqqəti məskunlaşmış ailələrdən ibarət növbəti köç karvanı Bakı şəhərinin Qaradağ rayonundan yola salınıb. Bu mərhələdə Şuşa şəhərinə daha 21 ailə - 79 nəfər köçürülüb.

Xatırladaq ki, indiyədək Şuşa şəhərində 147 ailənin, yəni 570 nəfərin daimi məskunlaşması təmin edilib.

Heç vaxt ümidlərini itirmədilər...

Şuşa sakinləri doğma yurda qayıdışın sevincini yaşayırlar. Keçmiş məcburi köçkünlər qürur hissi keçirərək ilk təəssüratlarını bölüşüblər. Sakinlərin sözlərinə görə, həyatın amansız sınaqları ilə üz-üzə qalsalar da, heç bir zaman ümidlərini itirməyiblər.

Onlar burada yaradılmış şəraitdən məmnundurlar. Şuşa sakinləri Prezident İlham Əliyevə, Azərbaycan Ordusuna, torpaqlarımızın işğaldan azad edilməsi uğrunda canından keçmiş şəhidlərə, fədakar qazilərə minnətdar olduqlarını bildiriblər.

Şuşada elə bir tarix yazıldı ki...

30 ildən də çoxdur ki, bunu gözləyirdik. Şuşanın qədimi küçələrində Azərbaycan övladlarının qaçıb əyləndiyi, gülüşləri ilə hər yana səs saldığı, böyüyüb başa çatdığı günü gözləyirdik. Şuşada elə bir tarix yazıldı ki, yüz illər keçsə də unudulmayacaq. Hər kəs bu tarixi nailiyyətə imza atanlara qibtə edəcək, həsəd aparacaq. Azərbaycan xalqı, şuşalılar bu torpaqda əbədi yaşayacaq, qurub yaradacaq və sonrakı nəsillərə əmanətlər qoyacaqlar. Əsrlər keçsə də Azərbaycanın şanlı bayrağı Şuşanın səmasında dalğalanmağa davam edəcək...

Yeganə BAYRAMOVA

Paylaş:

Baxılıb: 383 dəfə