Kamaləddin Qafarov: Laçın Şərqi Zəngəzurun ən abad guşələrindən birinə çevriləcək

Bakı:

22 °C

68 %

2 m/s

Əlaqə

AZ RU EN

Ana səhifə / Xəbər lenti / Kamaləddin Qafarov: Laçın Şərqi Zəngəzurun ən abad guşələrindən birinə çevriləcək

Kamaləddin Qafarov: Laçın Şərqi Zəngəzurun ən abad guşələrindən birinə çevriləcək

01.12.2021 [11:32]

“Bu gün artıq bütün dünya bilir ki, işğal dövründə erməni qəsbkarları torpaqlarımızı zəbt edərək, həmin ərazilərdə bütün infrastrukturu dağıdıb, rayon və şəhərlərimizi viran qoyub, talayıblar. Bu faktlar bir daha göstərir ki, biz hansı ümumbəşəri bəlaya qarşı mübarizə aparmışıq və Ali Baş Komandan cənab İlham Əliyevin rəhbərliyi ilə şanlı Azərbaycan Ordusu bütün Cənubi Qafqazı necə böyük bir təhlükədən xilas edib.

Erməni işğalı dövründə böyük dağıntılara məruz qalmış bölgələrimizdən biri də Laçın rayonu olub. 1992-ci il mayın 18-də Ermənistan tərəfindən Laçın rayonu işğal edildikdən sonra bütün bu infrastruktura dağıdıcı zərbələr vuruldu. Rayonda 217 mədəniyyət, 101 təhsil, 142 səhiyyə müəssisəsi, 462 ticarət, 30 rabitə, 133 idarə və müəssisə, 5 musiqi məktəbi, 1 internat məktəbi, 1 orta texniki peşə məktəbi, 2 avtonəqliyyat və müxtəlif təyinatlı istehsal müəssisələri talan və məhv edilib. 54 dünya, 200-dən çox yerli əhəmiyyətli tarixi abidə vandalizmə məruz qalıb. VI əsrə aid alban Ağoğlan məbədi, XIV əsrə aid Məlik Əjdər türbəsi, Qaraqışlaq kəndində məscid, Zabux kəndində qədim qəbiristanlıq bunların sırasındadır. Laçın Tarix Muzeyi və onun qızıl, gümüş və tunc sikkələrdən ibarət qədim kolleksiyası talan edilib.” Bu sözləri mətbuata verdiyi açıqlamasında Azərbaycan Respublikası Milli Məclisinin deputatı Kamaləddin Qafarov deyib.

Millət vəkili qeyd edib ki, rəsmi İrəvan işğal dövründə törətdiyi cinayətlərlə Cenevrə Konvensiyası ilə üzərinə düşən öhdəliklərini də kobud şəkildə pozub: “Ermənistan işğalçı tərəf olaraq Laçın rayonunda coğrafi adların dəyişdirilməsi, rayonun təbii resurslarının talan edilməsi və qazanc mənbəyinə çevrilməsi, əsasən, Suriyadan olan erməni əsilli qaçqınlar olmaqla məqsədyönlü məskunlaşma siyasəti apararaq, demoqrafik tərkibin dəyişdirilməsi kimi cinayət əməllərinə yol verib. Rayonun işğalını reallaşdıran düşmən qüvvələrinin böyük hissəsi Laçın dəhlizi vasitəsilə daxil olub. Laçın rayonu Şuşadan sonra işğala məruz qalmış ikinci rayondur. Laçın rayonunun işğal altına düşməsi faktiki olaraq Ermənistanla Dağlıq Qarabağ arasında coğrafi bağlantı yaratmışdır. İşğal nəticəsində Laçın rayonunun əhalisi etnik təmizləməyə məruz qalıb, 300-dən artıq hərbi və mülki şəxs həlak olub, itkin düşüb. Rayonun əhalisi 79,1 min nəfər olmaqla respublikanın 57 şəhər və rayonunda müvəqqəti məskunlaşıb. Əhəmiyyətli geostrateji mövqeyə malik Laçının işğalı Azərbaycan iqtisadiyyatına ciddi ziyan vurdu.”

Kamaləddin Qafarov bildirib ki, Azərbaycan Vətən müharibəsində əldə etdiyi tarixi Qələbə ilə həm də illərlə kağız üzərində qalan BMT Qətnamələrinin icrasını təmin etdi: “Məlumdur ki, BMT Təhlükəsizlik Şurasının qəbul etdiyi Qətnamələrdə bütün işğalçı qüvvələrin Azərbaycanın işğal olunmuş rayonlarından dərhal çıxarılması tələb olunurdu. Lakin rəsmi İrəvan həmin Qətnamələri icra etmədi, beynəlxalq təşkilatlar isə onun icrasını tələb etmədilər.

Beləliklə, bu tarixi missiyanı da Azərbaycan təkbaşına həyata keçirmiş oldu. Azərbaycan xalqı özü beynəlxalq qanunların aliliyini və tarixi ədaləti bərpa etdi. Vətən müharibəsində əldə etdiyimiz qələbə nəticəsində imzalanmış 10 noyabr 2021-ci il tarixli üçtərəfli Bəyanata əsasən, dekabrın 1-də Laçın rayonu Azərbaycana təhvil verildi. Bundan əvvəl, noyabrın 9-u Laçın rayonunun Güləbird, Səfiyan və Türklər kəndləri Azərbaycan Silahlı Qüvvələri tərəfindən işğaldan azad edilmişdi”.

K. Qafarov Prezident İlham Əliyevin işğaldan sonra Laçına etdiyi səfərlərin əhəmiyyətindən danışarkən deyib: “Azərbaycanın Vətən müharibəsində tarixi Qələbə əldə etməsindən az sonra işğaldan azad olunmuş digər ərazilərimizlə yanaşı, Laçında da vüsətli bərpa-quruculuq işləri start götürdü. Məlum olduğu kimi, 2021-ci ilin 14 fevral və 16 avqust tarixlərində Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev Laçın rayonunda səfərdə olmuşdur. Dövlətimizin başçısı fevralın 14-də Güləbird kəndində Azərbaycan bayrağını şəxsən qaldırmışdı.

Bu gün də Laçın istiqamətində dövlət sərhədləri möhkəmləndirilir, fərqli təyinatlı infrastruktur layihələri reallaşdırılır. Rayonda generasiya gücü 8 meqavat olan Güləbird Su Elektrik Stansiyasını işə salınıb. Bu stansiya təxminən 7000 nəfər əhalinin elektrik enerjisi ilə təminatında mühüm rol oynayacaq. Burada istehsal olunan elektrik enerjisi Qubadlı rayonunun Xanlıq kəndini, Laçın rayonunun cənub hissəsini və ərazidə yerləşən digər infrastruktur layihələrini elektrik enerjisi ilə təmin edəcək.

Xüsusi olaraq qeyd etmək lazımdır ki, bu gün işğaldan azad olunmuş ərazilərdə, o cümlədən Laçında hava limanının inşası bölgənin beynəlxalq statusunu artıracaqdır. Laçın hava limanının inşası həm də işğaldan azad edilmiş tarixi torpaqlarımızda aparılan abadlıq-quruculuq işlərinin miqyasını göstərir. Mühüm strateji əhəmiyyətə malik olan Laçın aeroportu logistik mərkəzlərin yaradılmasına da böyük töhfə verəcəkdir”.

Paylaş:

Baxılıb: 1190 dəfə