Hansı nəqliyyat vasitələrinə yol vergisi tətbiq ediləcək?

Bakı:

29 °C

53 %

1 m/s

Əlaqə

AZ RU EN

Ana səhifə / Xəbər lenti / Hansı nəqliyyat vasitələrinə yol vergisi tətbiq ediləcək?

Hansı nəqliyyat vasitələrinə yol vergisi tətbiq ediləcək?

25.01.2023 [10:47]

Yeganə BAYRAMOVA

Azərbaycanda ölkə ərazisinə tranzit məqsədilə daxil olan nəqliyyat vasitələrinə yol vergisi tətbiq olunacaq. Bu, Vergi Məcəlləsinə təklif edilən dəyişiklikdə öz əksini tapıb.

Məcəllənin 209-cu maddəsinə dəyişiklik edilməsi ilə bağlı edilən təklifə görə, ölkə ərazisinə daxil olan və həmin ərazidən sərnişin və yük daşınması üçün istifadə edən avtonəqliyyat vasitələrinin sahibləri olan qeyri-rezident şəxslər, habelə ölkə ərazisində avtomobil benzininin, dizel yanacağının və maye qazın istehsalı və ya idxalı ilə məşğul olan şəxslər yol vergisinin ödəyiciləridir.

Mövcud məcəlləyə görə isə Azərbaycan ərazisindən sərnişin və yük daşınması üçün istifadə edən avtonəqliyyat vasitələrinin sahibləri olan qeyri-rezidentlər yol vergisi ödəyicisidir.

Mövzu barədə fikirlərini “Yeni Azərbaycan”la bölüşən nəqliyyat üzrə ekspert İlqar Hüseynli təklif edilən dəyişikliyin kifayət qədər əhəmiyyətli olacağını düşünür. Onun sözlərinə görə, Azərbaycanın yerləşdiyi geosiyasi məkan ölkəyə daxil olan nəqliyyat vasitələrinə yol vergisinin tətbiq olunması üçün uyğundur: “Respublikamız Cənubi Qafqaz ölkələrinə yükdaşımalar həyata keçirilən tranzit qovşaqda yerləşir. Dövlətimizin yol infrastruktrunun hər il daha da inkişaf etdirilməsi üçün kifayət qədər büdcəsi var. Hesab edirəm ki, tranzit nəqliyyat vasitələrinə yol vergisinin tətbiq edilməsi, bu vəsaitlərin yol infrastrukturumuza yönəldilməsi təqdirəlayiq bir haldır. Bu vergini çoxdan tətbiq etməli idik. Dünya praktikasında belə bir təcrübə çoxdan tətbiq olunur”.

Yol vergisinin hesablanması və ödənilməsi ilə bağlı qanunvericiliyin tələblərini şərh edən iqtisadçı Ramin Ramazanov bildirib ki, nəqliyyat vasitələri üçün yol vergisinin hesablanma dərəcələri onların mühərriklərinin həcmindən və Azərbaycan Respublikasının ərazisində qaldığı müddətdən asılı olaraq hesablanır: “Məsələn, Ukrayna vətəndaşı özünəməxsus mühərrikin həcmi 1.800 kubsantimetrədək olan minik avtomobili ilə sentyabr ayının 15-də Azərbaycana gəlib və həmin ayın 25-də Azərbaycanı tərk edib. Maşın ölkə ərazisində bir ayadək qaldığı üçün və mühərrik həcmi 2.000 kubsantimetrədək olduğundan onun ödəyəcəyi vergi məbləği 15 ABŞ dolları təşkil edir. Həmin şəxs Azərbaycanın gömrük sərhədini keçərkən gömrük orqanları tərəfindən ondan 15 ABŞ dolları məbləğində yol vergisi tutulur. Əgər mühərrikin həcmi 4.800 kubsantimetr olsaydı, o halda vergi məbləği 40 ABŞ dolları olacaqdı”.

Paylaş:

Baxılıb: 671 dəfə