Ankarada TÜRKSOY Yazıçılar Birliyi təsis edilib

Bakı:

16 °C

94 %

5 m/s

Əlaqə

AZ RU EN

Ana səhifə / Xəbər lenti / Ankarada TÜRKSOY Yazıçılar Birliyi təsis edilib

Ankarada TÜRKSOY Yazıçılar Birliyi təsis edilib

08.03.2023 [11:15]

Türk dünyası mədəniyyətini bir araya gətirərək dünyada tanıdılmasında və təbliğ olunmasında əhəmiyyətli rol oynayan Beynəlxalq Türk Mədəniyyət Təşkilatı-TÜRKSOY-un nəzdində Yazıçılar Birliyi yaradılıb.

Bu barədə “Yeni Azərbaycan”ın Türkiyə Bürosuna açqlamasında TÜRKSOY-un Baş Katibi Sultan Raev bildirib.

Baş Katib deyib ki, birliyin yaradılması onun təşəbbüsü və qurumun təşkilatçılığı ilə baş tutub: “Hesab edirəm ki, bu birlik Türk dünyası ədəbiyyatına yeni bir nəfəs gətirəcək. Məqsədimiz Türk coğrafiyasında yaşayan yazıçıların bir-birini tanımasına, əsərlərinin tanıdılmasına və ortaq problemlərini müəyyən edərək həll olunmasına dəstək verməkdir. Ona görə də biz türk ədəbiyyatının gələcəyini müzakirə etməliyik”.

Sultan Raev TÜRKSOY-un baş katibi olaraq ən mühüm vəzifələrindən birinin türk dünyası mədəniyyətlərini bir-birinə yaxınlaşdırmaq, onlar arasında ünsiyyəti gücləndirmək olduğunu vurğulayıb: “Bu baxımdan türk mədəniyyətinin lokomotivi ədəbiyyatdır. Ədəbiyyat mədəniyyətin ana damarıdır. TÜRKSOY-un müqəddəs borcu bütün türk boylarının mədəniyyətinə möhkəm körpü olmaq, qardaş türk boylarını ədəbiyyat və mədəniyyət vasitəsi ilə bir-birinə yaxınlaşdırmaq, onları birliyə, həmrəyliyə dəvət etməkdir. Ən mühüm şüarımız isə İsmayıl Qaspralının dediyi kimi, dildə, fikirdə, işdə birlikdir”.

Qeyd edək ki, martın 6-da qurumun Ankaradakı məkanında “TÜRKSOY Yazıçılar Birliyi” təsis toplantısı keçirilib.

TÜRKSOY-un baş katibi Sultan Raevin ev sahibliyi ilə keçirilən tədbirdə Azərbaycan Yazıçılar Birliyinin Beynəlxalq Əlaqələr Katibi Səlim Babullaoğlu, Qazaxıstan Yazıçılar Birliyinin sədri Uluqbek Esdaulet, Qırğızıstan Yazıçılar Birliyinin sədri Nurlanbek Kalıbekov, Özbəkistan Yazıçılar Birliyinin sədri Sirojiddin Seyid, Türkiyə Yazıçılar Birliyinin İdarə Heyətinin üzvü Mahmut Erdemir, Avrasiya Yazarlar Birliyinin sədri Yakup

Ömeroğlu və Türkmənistanın Türkiyədəki səfirliyinin ikinci katibi Handurdi Turayev iştirak ediblər.

Toplantıda, həmçinin çıxış edənlər təmsil etdikləri qurumun yaradıcılığından və TÜRKSOY-un ədəbiyyat sahəsindəki mühüm fəaliyyətindən bəhs edərək, yaradılan birliyin Türk coğrafiyasının ədəbiyyat sahəsinə yeni təkan verəcəyinə inandıqlarını vurğulayıblar.

Açılış çıxışlarından sonra iclas sessiyalarla davam edib. İclasın sonunda “TÜRKSOY Yazıçılar Birliyi”nin yaradılması haqqında sənəd iştirakçılar tərəfindən imzalanıb.

Qəbul edilən qərara əsasən, Qazaxıstan Yazıçılar Birliyinin rəhbəri Uluqbek Esdaulet TÜRKSOY Yazıçılar Birliyinin sədri seçilib. Bundan əlavə, TÜRKSOY Yazıçılar Birliyinin ilk toplantısının bu ilin mart ayının sonunda Özbəkistanda keçirilməsi qərara alınıb.

Sevil Hilalqızı Ünal,

Ankara

Paylaş:

Baxılıb: 575 dəfə