Ulu Öndərin xeyir-duası

Bakı:

25 °C

40 %

3 m/s

Əlaqə

AZ RU EN

Ana səhifə / Xəbər lenti / Ulu Öndərin xeyir-duası

Ulu Öndərin xeyir-duası

29.04.2023 [11:38]

Azərbaycan mədəniyyətinin inkişafına və milli mənəvi dəyərlərimizin mühafizə olunub gələcək nəsillərə çatdırılmasına böyük diqqət və qayğı ilə yanaşan ulu öndərimiz Heydər Əliyev kitaba və kitab nəşrinə həmişə böyük dəyər vermişdir. Heydər Əliyev dərin mütaliəsi sayəsində tarixi hadisələrə tarixçi kimi müdaxilə edir, ədəbiyyat məsələlərinə ədəbiyyatşünas alim kimi münasibət göstərir, şair, yazıçı və dramaturqlarımızın əsərlərinə yaradıcı yanaşırdı. O həmişə gəncləri mütaliə etməyə çağırmış, kamil insan kimi yetişməyin yeganə yolunun mütaliədən keçdiyini söyləmişdir.

“Təhsil” nəşriyyatı müstəqilliyimizin yaşıdıdır. Onun fəaliyyətinin ən çətin ilk dövrü Ulu Öndərin hakimiyyət illərinə təsadüf edir. O zaman yeni, milli təhsil sisteminin qurulması məsələsi ölkədə ən mühüm və təxirəsalınmaz vəzifələrdən biri kimi gündəmə gəlmişdi. Bu çətin məsələnin həll edilməsi yeni fənn proqramlarının hazırlanması və onların əsasında yazılmış yeni dərsliklərin nəşr olunmasından başlanmalı idi. Bu sahədə Təhsil Nazirliyinin, Mətbuat və İnformasiya Nazirliyinin üzərinə böyük məsuliyyət düşürdü. İndiyə qədər hər il təkrar-təkrar nəşr olunan, on illərlə dəyişməyən dərsliklər artıq yenidən yazılmalı, müasir dövrün , müstəqil Azərbaycan məktəbinin tələbinə uyğun olmalı idi. Birmənalı qeyd olunmalıdır ki, nəşriyyat heç də sadəcə icraçı bir qurum deyil, əksinə əksər məqamlarda sifarişçi, yaradıcı, istehsalçı və yayımçı bir mədəniyyət və kommersiya müəssisəsidir. Nəşriyyatın rəhbərliyi çalışmalıdır ki, sadalanan bütün parametrlər üzrə işlər yüksək səviyyədə olsun. Bu isə xüsusilə həmin dövrdə o qədər də asan deyildi. “Təhsil” nəşriyyatı fəaliyyətə cəmi 8 nəfər yaradıcı heyətlə başladı. İlk aylarda heç bir maliyyə imkanı, hətta oturmağa binası belə olmayan nəşriyyat az b?r zamanda yığcam, bacarıqlı, öz işinə güvənən professional bir kollektiv yaradaraq məqsədinə nail olmağı bacardı və milli dərsliklərimizin yaranması üçün əlindən gələni etdi. Onun gərgin fəaliyyətinin nəticəsi olaraq bütün dərsliklər yeniləndi. Təsadüfi deyil ki, nəşriyyat yarandığı gündən keçən qısa vaxt ərzində 2003-cü ildən başlayaraq hər il “İlin kitabı” adına layiq görülən “Ata yurdu” (5-ci sinif üçün dərslik), 8-9-cu siniflər üçün “Azərbaycan dili”, 10-11-ci siniflər üçün “Azərbaycan dili” dərslikləri kimi seçilən kitablar nəşr etmişdir. “Təhsil” nəşriyyatı tarix dərsliklərinin yazılmasına da öz töhfəsini vermişdir.

“Ata yurdu” dərsliyindən danışarkən haşiyə çıxmaq istəyirəm. Bu dərsliyin hazırlanmasında tarix elmləri doktoru, AMEA-nın həqiqi üzvü Yaqub Mahmudlu xeyli əmək sərf etmişdi. Dərsliyin üz qabığındakı xəritədə ölkəmizin ərazisi ilə birlikdə Azərbaycanın Araz çayının sağ sahilində qalan tarixi torpaqları da əks olunmuşdu. Buna görə İran İslam Respublikası Azərbaycan dövlətinə etiraz məktubu göndərmişdi. O zaman Heydər Əliyev tariximizə bu cür münasibətə görə dərsliyin müəllifini və nəşriyyatı nəinki cəzalandırmamış, əksinə təqdir etmişdi. Təsadüfi deyil ki, bu məsələdən sonra dərslik “İlin kitabı”, “Təhsil” nəşriyyatı isə 2003-2005-ci illərdə “İlin nəşriyyatı” fəxri adına (diplomuna) layiq görülmüşdü. Biz bunu Ulu öndərin xeyir-duası kimi qəbul etdik və sonrakı illərdə nəşriyyatımız yeni uğurlara imza atdı. 2005-ci il MDB ölkələrinin “kitab sənəti” II Beynəlxalq müsabiqəsində ən yüksək balla qalib gələn “Qarabağ: real tarix, faktlar və sənədlər” kitabımız ən böyük uğurumuz oldu. Nəşriyyatımız Qarabağ həqiqətlərini dünyaya çatdırmaq üçün bu kitabı rus, ingilis, fransız, ərəb və türk dillərində nəşr etdi.

Torpaqlarımızın işğaldan azad olunması Ulu ?ndərin ən böyük arzusu idi. Şükürlər olsun ki, 44 günlük Vətən müharibəsində xalqımız, ordumuz, əsgərlərimiz, Ali Baş Komandanımız Ulu Öndərin arzularını gerçəkləşdirdi. İndi Qarabağda böyük quruculuq işləri gedir. Bu böyük işdə bizim də öz missiyamız var, çünki kitablar həmişə dövrünün aynası olub və bu, indi də belədir. Biz çalışacağıq ki, öz missiyamızı layiqincə yerinə yetirək.

Tural AXUNDOV

“Təhsil Nəşriyyat-Poliqrafiya” MMC-nin baş direktoru

Paylaş:

Baxılıb: 446 dəfə