Yanaşma fərqi nəzərə alınmalıdır...

Bakı:

24 °C

42 %

3 m/s

Əlaqə

AZ RU EN

Ana səhifə / Xəbər lenti / Yanaşma fərqi nəzərə alınmalıdır...

Yanaşma fərqi nəzərə alınmalıdır...

20.05.2023 [11:40]

Ş.XANKİŞİYEVA

Mayın 17-də Böyük Britaniyanın Azərbaycandakı Səfirliyinin binası qarşısında, sonradan isə ABŞ-ın Azərbaycandakı səfirliyinin öz ərazisinin həyətində LGBT bayrağı qaldırması bir sıra müzakirələrə yol açıb. Səfirlikdən bununla bağlı verilən şərhdə isə göstərilir ki, Beynəlxalq IDAHOBIT günündə Birləşmiş Ştatlar dünyadakı bütün LGBTQI+-a məxsus olan fərdlərin insan hüquqlarını bir daha təsdiq edir, onların verdikləri töhfələri qeyd edir, və bu fərdlərə qarşı davam edən ayrı-seçkiliyə və zorakılığa son qoymaq öhdəliyini üzərinə götürür.

Qeyd edildiyi kimi, baş verənlər istər cəmiyyətdə, istərsə də əhali arasında müzakirələrə səbəb olub. Ümumiyyətlə, bu kimi hallar bir çox cəmiyyətlərdə olduğu kimi Azərbaycan cəmiyyətinə də yaddır. O baxımdan ki, milli-mənəvi detalları hər zaman üstün bəşəri dəyər kimi qəbul edən, inkişaf etdirən Azərbaycan cəmiyyətinin mühüm bir hissəsi belə halların kütləvi nümayişinə müsbət reaksiya vermir. Sadəcə olaraq, bu kimi məsələlərin bəzi məqamlarda cəmiyyətdə fərqli assosiasiya yaratmasını göz önünə almaq lazımdır. Bu baxımdan, həmin “bayraqlar”ın qaldırılması təəssüf doğurur.

Məsələ ilə bağlı fikirlərini “Yeni Azərbaycan”a bölüşən politoloq Tural İsmayılov bildirib ki, hər bir xalqın özünün milli-mənəvi dəyərlər sistemi mövcuddur. Onun fikrincə, bir çox ölkələr diplomatik fəaliyyətlərini qurarkən və yaxud da ölkələrdəki konsulluq və səfirliklərinin fəaliyyətlərini tənzimləyərkən mütləq şəkildə aid olduqları ölkənin milli-mənəvi dəyərlərinə uyğun davranış sərgiləməlidirlər: “Hesab edirəm ki, Azərbaycanda cinsi azlıqların məsələsini, xüsusilə siyasiləşdirməyə cəhd edən bəlli dairələr daim olub. Zaman-zaman cinsi azlıqlar feminizm və ya başqa yad idealogiyalar vasitəsilə Azərbaycan cəmiyyətində qarışıqlıq yaratmağa çalışıbılar. Amma nəticədə, bu tip cəhdlər heç bir uğura nail olmayıb. Təssüfləndirici haldır ki, bu hadisə Azərbaycanla yaxın münasibətdə olan dövlətlərin səfirliklərinin qarşısında baş verib. Təbii ki, bu kimi məsələlər heç bir halda dövlətlərarası münasibətlərə təsir göstərmir. Amma həmin ölkə səfirlikləri də mütləq şəkildə bəzi məsələləri diqqətdə saxlamalıdır”.

Politoloqun fikrincə, həmin dövlətlərin səfirlikləri, eləcə də digər institutlar yerləşdikləri ölkələrin şərtlərinə uyğun davranmalıdırlar. Azərbaycan da bu məsələdə mühafizəkar bir ölkədir. “Hesab edirəm ki, cəmiyyətin, xalqın yanaşmasını nəzərə almadan LGBT bayrağının qaldırılması doğru bir şey deyil. Bütövlükdə hər bir səfirlik və diplomatik korpus nümayəndəlikləri müəyyən tədqiqatlar aparmalı - bəzi məsələlərdə təbii ki, mənsub olduqları ölkələrin yanaşması ilə səfirlik fəaliyyəti göstərdikləri ölkələrin yanaşması arasındakı fərqlər nəzərə alınmalıdır. Necə ki, bu gün Azərbaycanın xaricdəki diplomatik korpusları yerləşdikləri ölkələrin dəyərlərinə uyğun davranışlar nümayiş etdirirlər. Azərbaycanda olan əsasən Qərb ölkələrinin səfirliklərinin də buna uyğun davranması mütləq şərt kimi çıxış edir. Bu baxımdan LGBT bayrağının Azərbaycanda “dalğalandırılması” və hansısa “hüquqlar” məsələsinin tez-tez siyasi manipluyasiya vasitəsinə çevirmək avrzuları əsla qəbul edilən hal deyil”, - deyə T.İsmayılov əlavə edib.

Paylaş:

Baxılıb: 697 dəfə