Vilnüs Sammiti başa çatdı...

Bakı:

20 °C

88 %

4 m/s

Əlaqə

AZ RU EN

Ana səhifə / Xəbər lenti / Vilnüs Sammiti başa çatdı...

Vilnüs Sammiti başa çatdı...

13.07.2023 [11:00]

Qərb Ukraynaya dəstəyini artırır

Günel ABBASOVA

NATO-nun Vilnüs Sammiti və onun nəticələri mühüm maraq kəsb etməkdədir. Qeyd edək ki, Avroatlantik Alyansa üzv ölkələrin dövlət və hökumət başçılarının iştirakı ilə iyulun 11-12-də Rusiya sərhədindən təqribən 300 kilometr məsafədə yerləşən Vilnüsdə keçirilən Sammit bir sıra məqamları ilə yadda qaldı. Litvanın evsahibliyi ilə keçirilən Zirvə toplantısında alyansa üzvlük üçün müraciət etmiş İsveçlə yanaşı, Yaponiya, Cənubi Koreya, Avstraliya və Yeni Zelandiya da liderlər səviyyəsində təmsil olundu. Sammitə Ukrayna Prezidenti Volodimir Zelenski də iştirak edib.

Qərb ölkələrinin rəsmiləri NATO-nun illik sammitinin keçmiş sovet respublikasında keçirilməsinin Rusiyaya bir mesaj olduğunu bildiriblər. Xatırladaq ki, hələ 1990-cı ildə SSRİ-nin tərkibindən çıxaraq dövlət müstəqilliyini elan etmiş Litva 2004-cü ildə alyansa üzv qəbul olunub. Litva sammitində əsas müzakirə mövzuları Ukrayna və Rusiya ilə bağlı olub. Kiyevlə siyasi münasibətləri növbəti mərhələyə çıxarmaq məqsədlə NATO-Ukrayna Şurası yaradılıb. Şura ilk iclasını Vilnüsdə keçirib.

Təhlükəsizlik tədbirləri gücləndirildi

Sammitlə əlaqədar Litva hökuməti təhlükəsizlik tədbirlərini daha da gücləndirmişdi. Belə ki, NATO sammiti zamanı Litvada pilotsuz təyyarələr və kommersiya uçuşları qadağan edildi. Bu barədə Aerokosmik Məlumat Mərkəzinin direktoru İqnas Daeula istinadən “Bernardinai” nəşrinin məlumatında bildirilib: “Biz dronların məsuliyyətli və qanuni istifadəsini başa düşürük. Bu yüksək səviyyəli sammit zamanı görülən zəruri ehtiyat tədbirlərini tam dəstəkləyirik. Dronların uçuşlarına qoyulan qadağa sammitin keçiriləcəyi yerlər haqqında casus məlumatlarının toplanması təhlükəsi ilə bağlıdır”. Həmçinin qeyd olunub ki, iki gün davam edən sammit zamanı Vilnüs Beynəlxalq Hava Limanı kommersiya uçuşları üçün bağlanıb.

Sammitin təfərrüatları - müharibə biləcəkmi?

Politoloq İlyas Hüseynov “Yeni Azərbaycan”a açıqlamasında bildirib ki, Şimali Atlantika Alyansının Vilnüs Sammiti Rusiya-Ukrayna müharibəsinin perspektivləri, gedişat və nəticələr haqqında müzakirələrlə yadda qaldı: “Ukraynaya yardım paketinin artırılması, mərhələli şəkildə bu işin icrası həm də çox yaxın müddət ərzində Rusiya-Ukrayna müharibəsinin bitməyəcəyinə bir işarədir. Çünki Ukrayna əks hücum haqqında düşünür, torpaqlarının işğaldan azad olunması barədə planlar cızır. Rusiya nəinki tutduğu torpaqları qaytarmaq fikrindədir, hətta daha irəliyə gedərək mövqelənmək əzmindədir. Buna görə də, Qərb Ukraynaya dəstək göstərir, ərazi bütövlüyü kontekstində yardımlar həyata keçirilir. Düzdür Ukrayna NATO üzvlüyünə qəbul edilmir - əsas şərt kimi müharibənin bitməsi və ərazilərin Rusiya işğalından azad olunması tələbidir. Bu tələbin reallaşması hazırda çox çətin görünür. Çünki Rusiya müxtəlif addımlarla, təhdidlərlə, gövdə nümayişi ilə Qərbə və Ukraynaya mesajlar göndərir. Kaxovka su elektrik stansiyasının sıradan çıxarılması, Zaporojye atom elektrik stansiyasının vurulması ilə bağlı fikirlər və digər nüvə təhdidləri də hər zaman aktual olaraq qalmaqdadır”.

Türkiyə Aİ yolunda...

Politoloq qeyd edib ki, Vilnüs sammitində biz həm də Türkiyə ilə bağlı məsələlərin müzakirə olunduğunu gördük: “İsveçin Alyansa üzvlüyü məsələsinə Türkiyə müsbət yanaşmağa doğru addım atdı. Türkiyə burada öz geosiyasi maraqları çərçivəsindən çmıxış etdi və Avropa İttifaqına üzvlük məsələsi yenidən aktuallaşdı. Lakin Türkiyənin F-16 qırıcılarının modern versiyalarını əldə etməsi məsələsi də gündəmə gəldi. Bu, minimum proqram kimi görünməkdədir. Gələcəkdə Qərb, Türkiyə, NATO və ABŞ münasibətlərində biz müəyyən irəliləyişə şahidlik edə bilərik”.

Paylaş:

Baxılıb: 528 dəfə