“Böyük Qayıdış”ın növbəti addımları...

Bakı:

28 °C

59 %

12 m/s

Əlaqə

AZ RU EN

Ana səhifə / Xəbər lenti / “Böyük Qayıdış”ın növbəti addımları...

“Böyük Qayıdış”ın növbəti addımları...

14.09.2023 [10:55]

Yeganə BAYRAMOVA

Bu gün Azərbaycan xalqı olaraq tariximizin ən əlamətdar, möhtəşəm və qürurlu anlarını yaşayırıq. Zəfər sevincini daddıq, illərlə həsrət qaldığımız torpaqlarımız bütövlüyünə qovuşdu, yüz minlərlə soydaşımız məcburi köçkünlük yükündən azad oldu. Artıq tarixi səlnamələrimizə qızıl hərflərlə həkk olunacaq möhtəşəm bir məqamı-dədə-baba yurdlarımıza “Böyük Qayıdış”ı yaşayırıq. 44 günlük Vətən müharibəsindən sonra Qarabağın, Şərqi Zəngəzurun əzəli sakinləri doğma yurdlarına qayıdırlar.

Zəfərdən sonra bu xoşbəxtliyi ilk yaşayanlar Zəngilanın Ağalı kəndinin sakinləri oldu. Artıq bir ildən çoxdur ki, “ağıllı kənd” konsepsiyası əsasında yenidən salınmış Ağalı kəndinə əhalinin köçürülməsi davam edir.

Dünən Abşeron rayonunun Masazır kəndindən Zəngilan rayonunun yenidən salınmış Ağalı kəndinə növbəti köç karvanı yola salınıb. İndiyədək Bakı, Sumqayıt şəhərlərində və Abşeron rayonunda müvəqqəti məskunlaşmış 25 ailə (123 nəfər) bundan sonra doğma yurdunda yaşamağa başlayacaq. Onlar ermənilərin işğal dövründə tamamilə dağıtdıqları 1-ci, 2-ci və 3-cü Ağalı kəndlərinin sakinləridir.

Evlərin bölgüsü məcburi köçkünlərə yeni yaşayış sahələrinin verilməsinin hazırda qüvvədə olan qaydaları əsasında, şəffaflıq və ədalətlilik prinsipləri əsasında püşkatma ilə aparılıb. Püşkatma sentyabrın 8-də Qaçqınların və Məcburi Köçkünlərin İşləri üzrə Dövlət Komitəsinin Repatriasiya Departamentində keçirilib.

Ağalı sakinləri hərtərəfli dövlət qayğısı ilə əhatə olunduqlarına görə Prezident İlham Əliyevə, Birinci vitse-prezident Mehriban xanım Əliyevaya, torpaqlarımızı işğaldan azad edən əsgər və zabitlərimizə minnətdarlıqlarını ifadə ediblər.

Qeyd edək ki, Ağalı kəndinə ilk köç 2022-ci il iyulun 19-da baş tutmuşdu. Bu mərhələdə 41 ailə (201 nəfər) doğma torpaqlarına qovuşub. Daha sonrakı köç karvanlarında sentyabrın 7-də 12 ailə (63 nəfər), sentyabrın 10-da 13 ailə (62 nəfər), 28 fevral 2023-cü ildə 10 ailə (50 nəfər), martın 3-də 10 ailə (44 nəfər), avqustun 12-də 22 ailə (106) nəfər yola salınıb. Bununla da indiyədək Ağalı kəndində daimi məskunlaşdırılan ailələrin sayı 133-ə (649 nəfərə) çatacaq. Kəndə köçürülmə davam etdiriləcək.

Bu gün Zəngilan özünün yeni dövrünü yaşayır. İşğaldan azad olunduqdan sonra həyatın canlandığı Ağalı kəndinə keçmiş məcburi köçkünlərin qayıdışının davam etməsi prosesinə şahidlik etməyimizin özü də ayrı bir xoşbəxtlikdir. Dövlət siyasətinin əsas prioriteti Qarabağa qayıdış və Qayıdışın tam olaraq icra edilməsidir. Təbii ki, təkcə Zəngilanın Ağalı kəndinə deyil, işğaldan azad olunmuş bütün şəhər və rayonlara “Böyük Qayıdış” həyata keçiriləcək. Kəndlərimiz, şəhərlərimiz yenidən qurulacaq, yurd həsrəti ilə yaşayan məcburi köçkünlər doğma ellərinə dönəcəklər. Həmin yerlərdə həyatın rəngi, ahəngi dəyişəcək. Şübhəsiz ki, dövlətimiz onların layiqli həyatını təmin edir və edəcək də.

Paylaş:

Baxılıb: 546 dəfə