Laqeydlik və ya qərarsızlıq vaxtı deyil...

Bakı:

29 °C

53 %

1 m/s

Əlaqə

AZ RU EN

Ana səhifə / Xəbər lenti / Laqeydlik və ya qərarsızlıq vaxtı deyil...

Laqeydlik və ya qərarsızlıq vaxtı deyil...

15.09.2023 [10:55]

Dörd gün sonra BMT Baş Assambleyasının 78-ci sessiyası başlayacaq

Sentyabrın 19-da Nyu-Yorkda Birləşmiş Millətlər Təşkilatının (BMT) Baş Assambleyasının 78-ci sessiyası baş tutacaq. Sessiya BMT-nin mənzil-qərargahında öz işinə başlayacaq. Həmin gün BMT Baş Assambleyasının hazırkı rəhbəri, macarıstanlı diplomat Çaba Korosi 77-ci sessiyaya yekun vuracaq. Yeni sessiyaya Trinidad və Tobaqonun sabiq Baş naziri və BMT yanında daimi nümayəndəsi Denis Fransis rəhbərlik edəcək.

BMT yarandığı 1945-ci ildən Nizamnaməsinə uyğun olaraq hər il Baş Assambleyanın sessiyası keçirilir. 78-ci sessiyanın gündəliyinə də bir sıra mühüm məsələlər daxildir. Müxtəlif ölkələrin dövlət, hökumət başçıları və xarici işlər nazirlərinin iştirak edəcəyi sessiyada iştirakçı şəxslər öz ölkələrinin problemini yüksək tribunadan səsləndirəcəklər.

193 ölkə iştirak edəcək

BMT-yə üzv olan 193 ölkədən dövlət və hökumət nümayəndələrinin qatılacağı yüksək səviyyəli həftəyə ənənəvi olaraq sentyabrın 20-də start veriləcək. Həftədə Türkiyə Prezident Rəcəb Tayyib Ərdoğan da iştirak edəcək. Həftə ərzində Davamlı İnkişaf Məqsədləri üzrə fəaliyyətin sürətləndirilməsi, iqlim dəyişikliyi, qlobal istiləşmə, quraqlıq və yeraltı su mənbələrinin tükənməsi, dünyadakı qida çatışmazlığı, enerji böhranı və digər aktual məsələləri müzakirə olunacaq.

Bu liderlər Nyu-Yorka getməyəcəklər

Assambleyanın 78-ci yüksək səviyyəli həftəsi ənənəvi olaraq Braziliya prezidenti Luis İnasio Lula da Silvanın çıxışı ilə açılacaq. Ondan sonra ABŞ prezidenti Cozef Bayden söz alacaq. Qeyd edək ki, Bayden bu il BMT Baş Assambleyasına qatılacaq “Böyük beşlik” liderlərindən yeganə olacaq. Rusiya, Böyük Britaniya, Çin və Fransa liderləri bu il Nyu-Yorka səfər etməyi planlaşdırmırlar.

Quterreşdən çağırış...

Yeri gəlmişkən, BMT-nin Baş katibi Antonio Quterreş 78-ci sessiya qabağı dünya liderlərinə çağırış edib. O, qeyd edib ki, dünya liderlərinin real, praktiki qərarlar qəbul etmək üçün bir araya gəlməsinin vaxtıdır. Quterreşin sözlərinə görə, indi mövqe tutmaq, laqeydlik və ya qərarsızlıq vaxtı deyil: “Siyasət, diplomatiya və effektiv liderlik kompromisdən ibarətdir. Dünya liderlərinin ümumi rifah üçün ortaq gələcəyin dizaynında kompromis əldə etmək üçün xüsusi məsuliyyəti var. Buna da gələn həftə Nyu-Yorkda başlamalıyıq”.

77-ci sessiyada nələr baş vermişdi?

Xatırladaq ki, Baş Assambleyanın 77-ci sessiyası ötən il sentyabrın 20-də toplanıb. Sessiyada iştirak edən dünya liderləri bir sıra aktual və qlobal problemləri müzakirə etmişdilər. Müzakirə olunan əsas mövzular iqlim böhranı və Ukraynadakı müharibə idi. Sessiyaya cəmi bir gün qalmış Rusiya prezidenti Vladimir Putin müharibəyə daha çox hərbi personalı səfərbər etdiyini elan etmişdi. Rusiya liderinin bu açıqlaması isə bir çox ölkələr tərəfindən qınaq obyektinə çevrilmişdi.

Baydenin Rusiya açıqlaması

Amerika prezidenti Cozef Bayden 77-ci sessiyada çıxış növbəsi çatanda ilk olaraq Rusiyaya səslənmişdi. Bayden Putinin BMT-nin nizamnaməsinin əsas prinsiplərini pozduğunu qeyd edərək Amerikanın Ukraynaya dəstəyini səsləndirib. O, çıxışında Moskvanın Avropaya qarşı nüvə silahından istifadə etmək üçün açıq-aşkar təhdidlər etdiyini və nüvə silahının yayılmaması rejiminin öhdəliklərinə məhəl qoymadığını deyib. Bayden eyni zamanda bildirib ki, ABŞ başa düşür ki, nüvə müharibəsində qaliblər ola bilməz və bu müharibə heç vaxt baş verməməlidir. Bundan əlavə, o, ABŞ-ın dünyada nə baş verməsindən asılı olmayaraq təhlükəli silahlara nəzarət tədbirləri görməyə hazır olacağına söz vermişdi.

Azərbaycanın Milli Bəyanatı...

Xatırladaq ki, BMT Baş Assambleyasının ötənilki sessiyasında Azərbaycanı xarici işlər naziri Ceyhun Bayramov təmsil etmişdi. Sessiyanın ümumi müzakirələrində Milli Bəyanatla çıxış edən nazir bildirmişdi ki, koronavirus pandemiya şəklində uzunmüddətli çağırışların dünya ölkələri arasında həmrəyliyinə ehtiyac yaradıb. C.Bayramov pandemiya ilə mübarizədə respublikamızın 80-dən çox ölkəyə yardım göstərdiyini vurğulamış, həmçinin Azərbaycanın beynəlxalq bazarlara enerji resurslarının etibarlı təchizatçısı olaraq qaldığını qeyd etmişdi. XİN rəhbəri ölkəmizin işğaldan azad olunmuş ərazilərində kənd və şəhərlərin sıfırdan bərpa olunduğunu diqqətə çatdırmışdı.

C.Bayramov çıxışında həmçinin BMT ilə Azərbaycan arasında əlaqələrə toxunaraq, Ermənistanın Azərbaycana qarşı təcavüzü, ikinci Qarabağ müharibəsindən də danışmışdı.

Ölkəmizə təşəkkür...

Bu günlərdə BMT Baş Assambleyasının hazırkı, 78-ci sessiyasının prezidenti Dennis Frensis Qoşulmama Hərəkatına (QH) üç il müddətində sədrliyi dövründəki səmərəli fəaliyyətlərinə görə Azərbaycana təşəkkür edib. O, BMT-nin Nyu-Yorkdakı qərargah binasında Azərbaycanın ev sahibliyi ilə baş tutan QH-nin Əlaqələndirmə Bürosunun səfirlər səviyyəsindəki görüşündə çıxış edib. Frensis Azərbaycanın QH-na üç illik sədirliyi dövründə aktiv və dolğun fəaliyyətlərindən, reallaşdırdığı genişmiqyaslı layihələrdən bəhs edib: “Bizi narahat edən müxtəlif məsələlərin həlli yollarını axtararkən, sizi və Qoşulmama Hərəkatının Koordinasiya Bürosunun dəstəyinə arxalanmağa davam etməyə çağıracağam. Geosiyasi vəziyyətin çoxtərəfliliyə inamın əngəllədiyini, münaqişələrin və qeyri-sabitliyin çox olması dayanıqlı inkişaf məqsədlərinə nail olunmasına imkan vermir. Pandemiyanın və iqlim dəyişikliyinin təsirləri bir çox cəmiyyətləri sıxışdırmaqda davam edir.

BMT Baş Assambleyasının 78-ci sessiyasında bütün bunlar hamımızı narahat edən məsələlər olmalıdır. Baş Assambleyanın bu 78-ci sessiyasında mən xüsusi olaraq Qoşulmama Hərəkatına güvənəcəyəm və Sülh, Rifah, Tərəqqi və Davamlılıq kimi dörd şüarıma xüsusi diqqət yetirəcəyəm”.

D.Frensis Azərbaycanın BMT-dəki daimi nümayəndəsi Yaşar Əliyevlə görüşündə ona beynəlxalq təşkilata verdiyi töhfələrə görə xüsusi təşəkkür edib.

Yeganə BAYRAMOVA

Paylaş:

Baxılıb: 591 dəfə