Türkiyə-Ermənistan sərhədlərinin açılmasına qəti tələsmək olmaz

Bakı:

26 °C

44 %

7 m/s

Əlaqə

AZ RU EN

Ana səhifə / Xəbər lenti / Türkiyə-Ermənistan sərhədlərinin açılmasına qəti tələsmək olmaz

Türkiyə-Ermənistan sərhədlərinin açılmasına qəti tələsmək olmaz

17.10.2023 [15:33]

1993- cü ilə aid açılım şərtləri köklü dəyişib...

“Ermənistan Türkiyə ilə aranın açılması mövzusunu yenidən gündəmə gətirməyə başladı. Bu ölkənin XİN müavininin açıqlamasını gördüm. Təbii ki, ümidləniblər.

Süveren Azərbaycanda izləri- tozları qalmadı. Ermənilər hesab edirlər ki, əgər Azərbaycanın bütün torpaqları artıq öz əllərindədirsə, daha bundan sonra Türkiyə ilə sərhəd açılmalıdır. Nazir müavini bu cür də deyib :" Top Türkiyənin tərəfindədir"...”

Bu barədə “Bakı xəbər” qəzetinin baş redaktoru Aydın Quliyev özünün facebook səhifəsində yazıb. Paylaşımı təqdim edirik:

“Lakin yox, məsələ ermənilərin təsəvvür etdikləri və ya qələmə verdikləri kimi sadə deyil. “Azərbaycanın bütün torpaqları öz əllərindədir ",- deyib də Türkiyədən sərhəd açılımı təmənnasında olmaq sadəlövhlük deyil, çünki etməni diplomatları və siyasətçiləri sadəlövh deyillər, bu, sadəcə bizi və Türkiyəni aldatmaq cəhdidir . Alınmaz. Çünki…

1 .İllər öncədən - 1993- cü ildə Azərbaycan və Türkiyə tərəfdən deyilmişdi ki, erməni işğalçıları torpaqlardan çıxmayınca, Türkiyə - Ermənistan sərhəddi açıla bilməz. Bu şərt yerinə yetirildimi? Ermənilər özləri könüllü olaraq çıxıb getməyiblər ki... Onları zorla , güclə, minlərlə şəhidin və qazinin qanı bahasına qovduq. Taxtadan paslı mıxı çəkib atan kimi onları çıxardıq. Keçmiş SSRİ məkanında separatizmi ilk olaraq ermənilər Azərbaycanda başlatdılar, postsovet məkanında separatizm ocağına ilk dəfə Azərbaycanda və İlham Əliyev son qoydu. Əgər torpaqlarımızdan könüllü çıxıb getmiş olsaydılar, bu başqa məsələ olardı. Bəs prezident İlham Əliyevin düz 20 il təkrarladığı "xoşluqla işğala son verin, gedin, qonşular kimi sülh içində yaşayaq" bəyanatlarına ermənilər tərəfdən bunca saymazlıq göstərilməsini hara, kimin ayağına yazaq? Minlərlə şəhidimizin, yaralı qazinin ruhları, xatirəsi qarşısında nə cavab verək?

Demək, torpaqlarımızın öz əlimizdə olması Türkiyə- Ermənistan sərhədlərinin açılmasına hələ əsas vermir. Çünki torpaqlar könüllü verilməyib, zorla alınıb. Zorumuz yetərli olmasaydı, torpaqlar hələ də işğalda idi....

2 .Ermənistan hələ Azərbaycanla sərhədləri delimitasiya etməyib və bu məsələdə sonadək maraqlı, səmimi ola bilmir. Prosesin ləngiməsi, baş tutmaması üçün cürbəcür bəhanələr gətirir. Azərbaycanla sərhədlər delimitasiya edilməmiş Türkiyə- Ermənistan sərhədləri necə açıla bilər?! ..

3.Ermənistan Azərbaycanla hələ sülh sazişi imzalamayıb. Azərbaycan bu yolda nə qədər ardıcıldırsa, Ermənistan bir o qədər pozucu, ləngidici mövqedədir. Sülh sazişi yoxdursa, bu o deməkdir ki, Ermənistan Azərbaycana və Türkiyəyə qarşı əsassız ərazi iddialarından hələ imtina etməyib,revanşistlərin baş qaldırmayacağına rəsmi təminat verməyib, uydurma genosid iddialarından rəsmi imtina etməyib. Bunlar yoxdursa, Türkiyə Ermənistanla sərhəddi hansı məntiqlə aça bilər və ya açmalıdır?!...

4.Qardaş Türkiyə 30 il əvvəl Ermənistanla Qars keçid məntəqəsini niyə bağlamışdı? Xatırlayaq. Ermənistanln Mehri dəmiryolunu bağlayaraq Türkiyənin özünün də qarant olduğu Naxçıvanı blokadaya aldığı və Kəlbəcəri işğal etdiyi üçün. Kəlbəcəri geri qaytardıq. Bəs Naxçıvana yol açıldımı? Ermənistanın Zəngəzur dəhlizini açmasına qədər Türkiyə Ermənistanla sərhəd açılışına necə gedə bilər və getməlidir?!...

5.Türk diplomatlarının ASALA tərəfindən silsilə terror faktlarına, eləcə də Azərbaycan Xalq Cümhuriyyətinin dövlət xadimlərinin qətlinə müasir Ermənistan hakimiyyəti müvafiq rəyini bildirməyibsə , Türkiyə ilə hansı açılışdan söhbət gedə bilər?!

6.Azərbaycan- Ermənistan sərhədləri tam demarkasiya olunmayınca , Türkiyə- Ermənistan sərhəddi niyə açılsın ki... Gərək sərhədlər demarkasiya olunsun ki, ardınca lazım bilinən yerlərdə sərhəd- keçid məntəqələri quraşdırılsın ....

Ortada bunca həll edilməmiş problemlər olduğu halda, Türkiyə- Ermənistan sərhədlərinin açılışına getmək böyük və bağışlanmaz səhv olardı....

Necə, buraxaq ki, Türkiyənin üzərindən dünyaya açılaraq öz qəddi- qamətini düzəltsin və " qızmış ayı " kimi yenidən üstümüzə gəlsin?!....

Azərbaycanın öz ərazilərini güclə və misilsiz itkilərlə azad etməsi Türkiyə- Ermənistan sərhədlərinin 1990- cı illərə aid açılması şərtlərini köklü şəkildə dəyişib. Torpaqlarımızı xoşluqla, müharibəsiz qoyub getsəydilər, başqa...

Türkiyə-Ermənistan sərhəddinin açılışına qətiyyən tələsmək olmaz..."

Paylaş:

Baxılıb: 502 dəfə