Siyasi qüvvələr birləşərsə...

Bakı:

15°C

82%

4m/s

Əlaqə

AZ RU EN

Ana səhifə / Analitik / Siyasi qüvvələr birləşərsə...

Siyasi qüvvələr birləşərsə...

02.03.2022 [10:15]

NURLAN

Rusiya-Ukrayna müharibəsinin davam etdiyi şəraitdə ekspertlər, siyasətçilər və sadə insanlar bir çox məsələlərdən bəhs edir, müxtəlif məqamları diqqətə çatdırırlar. Bunlardan biri də müharibə dövründə və şəraitində ölkə daxilində siyasi qüvvələrin iqtidara, dövlətə dəstək vermələrinin vacibliyidir. Bu baxımdan, Azərbaycanın 44 günlük müharibədə göstərdiyi nümunəyə xüsusi diqqət yetirilir, bu örnəyin faydalı və önəmli olduğu qeyd edilir. Söhbət siyasi qüvvələrin vahid mövqedən çıxış edərək birlik - həmrəylik nümayiş etdirməsindən gedir.

Azərbaycanın 44 günlük Vətən müharibəsində möhtəşəm qələbəsini təmin edən mühüm amillərdən biri də milli həmrəylik, o cümlədən siyasi birlik faktoru olub. Vətən müharibəsində siyasi partiyaların mütləq əksəriyyəti xarici təhdidlərə qarşı birlik nümayiş etdirdi, birgə bəyanat və müraciətlər imzalandı. Siyasi qüvvələr Ali Baş Komandanın yanında olduqlarını və ölkədə milli birliyin qorunub saxlanılmasının vacibliyini əks etdirən dəyişməz mövqe ortaya qoydular. Biz postmüharibə dövründə də bu qətiyyətli dəstəyi və birliyi müşahidə edirik. Siyasi qüvvələrin bəyanatlarında Vətən müharibəsi nəticəsində əldə olunmuş Zəfərin Azərbaycanın müstəqillik tarixində müstəsna əhəmiyyəti qeyd olunur, həmin Qələbəni Azərbaycana bəxş etmiş Müzəffər Ali Baş Komandan, Prezident İlham Əliyevə və Silahlı Qüvvələrimizin cəsur hərbçilərinə, həmçinin müharibə günlərində Ali Baş Komandanın ətrafında dəmir yumruq kimi birləşmiş Azərbaycan xalqına minnətdarlıq bildirilir. Bütün bunlar isə siyasi birliyin güclənməsinə və Azərbaycanın hərb meydanında qazandığı tarixi Qələbənin diplomatik müstəvidə möhkəmlənməsinə, yəni tarixi-strateji prosesə çevrilməsinə mühüm töhfələr verir.

Bu gün informasiya resurslarında, o cümlədən sosial şəbəkələrdə bu ictimai-siyasi-ideoloji düsturun Ukrayna üçün də aktual və əhəmiyyətli olduğu vurğulanır. Əlbəttə, müharibədə məğlub olmamaq - qalib gəlmək üçün hərbi-strateji amillərlə yanaşı, ictimai-siyasi müqavimət faktoru da çox önəmlidir. Burada isə əsas yük, yaxud güc daxili siyasi proseslərin iştirakçısı olan qüvvələrin üzərinə düşür. Bu, həm xalqın vahid məqsəd - eyni amal uğrunda səfərbər olunması, həm daxili platformada ziddiyyət olmaması, həm də kənar siyasi müdaxilələrin, o cümlədən dezinformasiya və psixoloji savaşın qarşısının alınması baxımından əhəmiyyətlidir.

Bu gün Ukrayna ictimai-siyasi mühitinə nəzər saldıqda aktivliyin və çoxpartiyalı sistemin olduğunu görürük. Ali qanunverici orqan olan Ukrayna Ali Radasında Xalqın Xidmətçisi, Gələcək üçün, İnam, Həyat üçün Müxalifət Platforması, Avropa Həmrəyliyi, Ana Vətən kimi partiyalar təmsil olunurlar. Bununla yanaşı, parlamentdə təmsil olunmayan müxtəlif təmayüllü (sol, sağ-mərkəz və s.) partiyaların fəaliyyəti müşahidə edilir. Sonuncu seçkilərdə 22 siyasi partiyanın nümayəndələrinin iştirakı isə siyasi fəallığın aşağı olmadığını göstərir. Beləliklə, mövqeyindən və təmayülündən asılı olmayaraq, Ukraynada siyasi partiyalar ictimai rəyə təsir göstərə bilən və ictimai təşkilatlanma prosesinə töhfə verə bilən fəal qüvvə kimi səciyyələndirilə bilər. Ona görə də bu təsisatların müharibə fəallığına böyük önəm verilir.

Volodimir Zelenski bir müddət əvvəl siyasi qüvvələri vahid mövqedən çıxış edərək dövlətə dəstək verməyə çağırmışdı. Ukrayna mediasının yaydığı məlumatlardan aydın olur ki, siyasi qüvvələrin bu çağırışa reaksiyaları - cavabları müsbət xarakterlidir. Ekspertlər isə ictimai-siyasi səfərbərliyin təmin olunmasının hərbi-strateji fəaliyyət qədər önəmli olduğunu vurğulayırlar. Çünki müharibə təkcə döyüş meydanında texnikalar vasitəsilə aparılmır - qarşıdurma informasiya-təbliğat və diplomatiya müstəvisini də əhatə edir. Hibrid savaş şəraitində insan amili, ictimai müqavimət həlledicidir. Burada isə siyasi qüvvələrin üzərinə ciddi tarixi-siyasi məsuliyyət düşür. Azərbaycan nümunəsi bu reallığı təsdiqləyir. Azərbaycanın müharibə taktikası bu gün dünyanın nüfuzlu ali hərbi məktəblərində necə öyrənilirsə, ictimai-siyasi həmrəylik örnəyi də strateji araşdırma mərkəzlərinin tədqiqatlarında, politoloji mənbələrdə öz əksini tapır və tapacaq.

Paylaş:

Baxılıb: 800 dəfə