Sadə ermənilər Paşinyandan üz döndərir

Bakı:

26 °C

46 %

1 m/s

Əlaqə

AZ RU EN

Ana səhifə / Dünya / Sadə ermənilər Paşinyandan üz döndərir

Sadə ermənilər Paşinyandan üz döndərir

23.01.2019 [09:43]

Yaxud işğalçı ölkədə yeni qarşıdurmalar gözlənilir
İşğalçı Ermənistanda sosial-iqtisadi və siyasi gərginlik davam edir. Buna səbəb isə Sarkisyan rejimini əvəzləyən Nikol Paşinyanın səriştəsizliyi, həmçinin onun Ermənistanı böhrandan çıxara biləcək hər hansı bir proqrama və peşəkar komandaya malik olmamasıdır. Daha doğrusu küçədən hay-küylə hakimiyyətə gələn Paşinyan bu vaxta kimi sadə erməniləri boş vədlərlə, belə demək mümkünsə, “yola verib”. Amma artıq bir neçə gündür ki, rəsmən baş nazir təyin olunan bu şəxs dalana dirəndiyinin fərqindədir. Çünki bu gün sadə ermənilər ondan boş sözlər eşitmək istəmir, konkret iş tələb edirlər.
Erməni mətbuatının məlumatına görə, N.Paşinyanın iddialarının əksinə olaraq, sosial-iqtisadi sahədə irəliləyiş əldə etmək üçün xarici investisiyaların Ermənistana cəlb olunması ehtimalı mövcud deyil. Üstəlik Paşinyan Ermənistandakı ən ciddi və uzunmüddətli problemlərdən olan yoxsulluq və işsizliyin aradan qaldırılması istiqamətində heç bir real addım ata bilməyib. Bunun tam əksinə olaraq o, son “fəaliyyətləri” ilə Ermənistanda işsizlərin sayının artmasına bilavasitə şərait yaradır. Ən azı ona görə ki, Paşinyanın “dövlət orqanlarının və nazirliklərin səbəbsiz şəkildə ləğv edilməsi” planı reallaşarsa bu, minlərlə vətəndaşın işsiz qalmasına gətirib çıxaracaq. Belə ki, Ermənistan vətəndaşlarının sosial vəziyyətini yaxşılaşdırmaq əvəzinə, onların illərdir çalışdıqları qurumlardan qovulması və ixtisara salınması artıq kifayət qədər narazılıq yaradıb.
Digər tərəfdən, 2019-cu ilin dövlət büdcəsində, demək olar ki, yeni iş yerlərinin açılması üçün xərclər nəzərdə tutulmur. Bu halda isə Ermənistanda əhalinin qalan hissəsi də yaşamaq üçün yeganə seçim kimi ölkəni tərk etməlidir. Halbuki N.Paşinyan seçkiqabağı çıxışlarında guya əhalinin ölkədən çıxmasının dayandırılması, hətta köçüb gedənlərin geri qayıtması üçün şərait yaradacağını vəd edirdi. Əksər ekspertlərin qənaətinə görə indiki halda baş nazir onun hakimiyyəti dövründə Hindistandan qaçıb gəlmiş qaraçı-erməni qarışığı olan miqrantlarla kifayətlənməli olacaq.
Ermənistanın ölkədən qaçmağa macal tapmayan kasıb vətəndaşlarının xidmət keçdiyi ordunun acınacaqlı vəziyyəti də narazılıq yaradan səbəblərdəndir. Yeri gəlmişkən əhalini uzun müddətdir narahat edən məsələnin - kasıb uşaqlarının qeyri-döyüş şəraitində ölməsi faktlarının ilin yekunlarına dair Baş prokurorluğun yaydığı məlumatlarla təsdiqlənməsi böyük əks-səda doğurub. Həmin məlumatlara görə, keçən il 63 əsgər ölüb, bu itkilər əksər hallarda intihar və qəza nəticəsində baş verib. Baş prokurorluğun mətbuat xidmətindən yayılan məlumatda deyilir ki, onların 38 nəfəri hərbi xidmətlə əlaqədar, 25-i isə xidmətlə bağlı olmayan hallarda dünyasını dəyişib. Yalnız 7 əsgərin döyüş şəraitində öldürülməsi əsgər valideynlərinin qəzəbini daha da artırıb. Bundan başqa, ordunun alt paltarla təminatından tutmuş döyüş sursatına qədər təchizatının bərbad vəziyyətdə olması faktı dəfələrlə N.Paşinyanın diqqətinə çatdırılsa da, bu sahədə də heç bir tədbir görülməyib. Bu müddətdə həm müdafiə naziri, həm də baş qərargah rəisinin dəyişdirilməsi ordudakı problemlərin həllində heç bir rol oynamayıb.
Digər tərəfdən, xarici siyasət istiqamətində, o cümlədən Avropa İttifaqı ilə münasibətlərdə ciddi irəliləyiş əldə edilməyib. Əksinə, parlamentin yeni seçilmiş sədri Ararat Mirzəyan Ermənistan-Aİ müqaviləsinin 2019-cu ildə ratifikasiya olunmasının mümkün olmadığını bildirib. Bu isə onu göstərir ki, N.Paşinyanın apardığı ikiüzlü xarici siyasət Avropada normal qarşılanmır. Və Qərb onu ciddi siyasi fiqur, iradəli lider kimi qəbul etmədiyi üçün Paşinyana dəstək verməkdə tərəddüd göstərir. Bu uğursuzluğun müqabilində N.Paşinyan səhvlərini düzəltmək əvəzinə, pərtliyini ört-basdır eləmək üçün gah əhalini onu düzgün başa düşməməkdə, gah da mətbuatı onun fəaliyyətinə düzgün qiymət verməməkdə günahlandırır.
Bir sözlə görünən odur ki, N.Paşinyanın vaxtilə verdiyi vədlərin əksinə olaraq, işğalçı ölkədə konkret dəyişiklik və nəticələr əldə edilməyib. Buna görə də sıravi vətəndaşların mövcud hakimiyyətlə əvvəlki arasında heç bir fərq görmədiyi üçün bundan sonra ona dəstək verəcəyi real görünmür. Ekspertlərin qənaətinə görə, Paşinyanın fəaliyyətsizliyi onun ən qızğın tərəfdarlarının da kəskin şəkildə azalmasına gətirib çıxarıb və yuxarıda bəhs edilən problemlərin həll olunmaması işğalçı ölkədə əhalinin narazılığını daha da gücləndirəcək. Bu isə ölkədə yeni qarşıdurmaları qaçılmaz edir.
Qaşqay ZİYƏDDİNOĞLU

Paylaş:

Baxılıb: 2278 dəfə