Ermənistanda ümidsizliyə qapılmış insanların sayı artır

Bakı:

24 °C

58 %

3 m/s

Əlaqə

AZ RU EN

Ana səhifə / Dünya / Ermənistanda ümidsizliyə qapılmış insanların sayı artır

Ermənistanda ümidsizliyə qapılmış insanların sayı artır

13.06.2020 [09:32]

Rusiyalı ekspertin sözlərinə görə, indiki vaxtda məyusluq hissi keçirən erməni əhalisi düşdüyü ağır vəziyyətdən çıxmaq üçün yeni xilaskar axtaracaq
Sosial-iqtisadi tənəzzül dövrü keçirən işğalçı Ermənistanda pandemiyanın yaratdığı problemlərin həllində acizlik nümayiş etdirən Paşinyan hakimiyyətinin yarıtmaz fəaliyyəti nəticəsində vəziyyət daha da ağırlaşıb. Artıq bir çox xarici ölkənin, o cümlədən Rusiyanın media orqanlarında koronavirus pandemiyasının Ermənistanda ağır fəsadlar yaratması barədə çoxsaylı materiallara rast gəlmək olur.
Rusiyanın nüfuzlu “pravda.ru” saytında MDB Ölkələri İnstitutunun Ermənistan filialının direktoru Aleksandr Markarovun Ermənistanda vəziyyət barədə müsahibəsini bu qəbildən hesab etmək olar. “Koronavirus Paşinyanın vədlərini puç edib” sərlövhəli müsahibədə hazırda Ermənistanda baş verənlərə, o cümlədən daxili ziddiyyətlər və qalmaqalların çoxalmasına, “koronavirus böhranı”na qədər baş nazir Nikol Paşinyanın verdiyi çoxsaylı vədlərə və onun planlarının uğursuzluğa düçar olmasına həmçinin digər məsələlərə aydınlıq gətirilib. A.Markarovun sözlərinə görə, koronavirus və onun doğurduğu iqtisadi dəyişikliklər ölkədə mövcud olan iqtisadi və sosial vəziyyətə təsir göstərməyə bilməzdi. Yəni, koronavirus, hətta ehtimal edilən perspektivləri də aradan qaldırıb. Paşinyanın populist vədlərinə gəlincə, A.Markarovun sözlərinə görə, onun seçkiqabağı vədlərindən biri Ermənistan diasporundan investisiyalar cəlb etmək olub. A.Makarov deyib ki, erməni diasporu o qədər də bədxərclik etməyib, vəd edilən sərmayələr yalnız qismən həyata keçirilib. Gözlənilən həcmdə investisiya qoyuluşu baş tutmayıb, yəni N.Paşinyanın vəd etdiyi kimi, diasporun milyonlarla dollar məbləğində sərmayəsinin respublikaya axacağı barədə gözləntilər özünü doğrultmayıb. İndiki qeyri-müəyyənlik şəraitində isə iri investisiyalardan söhbət açmaq mümkün deyil. A.Makarov yeni hakimiyyətə böyük ümid bəsləyən sadə ermənilərin peşmançılığına da diqqət çəkib: “Paşinyanın “100 gün” və “500 gün” müddətinə vəd etdiyi planların heç biri yerinə yetirilməyib. Buna görə də ümidsizliyə qapılmış insanların sayı artır və çox güman ki, əgər bundan sonra da nəticə olmasa, vaxt keçdikcə daha da artacaq. Yaxın zamanda ümumi daxili məhsulun (ÜDM) artımını təmin edə biləcək real planlar yoxdur və bu vəziyyətdə ola da bilməz. Deməli, ümidsizliyin artması ehtimalı çoxalır”.
Ekspertin sözlərinə görə, koronavirusun bütün planları alt-üst etdiyi indiki vaxtda məyusluq hissi keçirən erməni əhalisi düşdüyü vəziyyətdən çıxmaq üçün yeni xilaskar axtaracaq.
Qaşqay ZİYƏDDİNOĞLU

Paylaş:

Baxılıb: 730 dəfə