Azərbaycanla Belarus arasında strateji tərəfdaşlıq qurulub

Bakı:

20°C

68%

6m/s

Əlaqə

AZ RU EN

Ana səhifə / Gündəm / Azərbaycanla Belarus arasında strateji tərəfdaşlıq qurulub

Azərbaycanla Belarus arasında strateji tərəfdaşlıq qurulub

14.11.2009 [11:00]

Prezident Aleksandr Lukaşenkonun adından Azərbaycan Respublikasının Prezidenti İlham Əliyevin şərəfinə rəsmi nahar təşkil olunub
AzərTAc-ın məlumatına görə, noyabrın 12-də Belarus Respublikası Prezidentinin iqamətgahında Prezident Aleksandr Lukaşenkonun adından Azərbaycan Respublikasının Prezidenti İlham Əliyevin şərəfinə rəsmi nahar təşkil olunub.
Belarus Prezidenti Aleksandr Lukaşenko dövlətimizin başçısını salamlayaraq deyib: “Hörmətli İlham Heydər oğlu! Əziz dostlar! Bu gün əməkdaşlığımız haqqında çox danışılmışdır. İntensiv əlaqələrimiz təkcə dövlət başçıları səviyyəsində deyil, həm də ticarət-iqtisadi münasibətlərə, birgə müəssisələrin yaradılmasına, tam siyasi dəstəyə, dünyanın inkişafı gündəliyinə vahid baxışa əsaslanır. Deməli, bizim aramızda, dövlətlərimiz arasında strateji tərəfdaşlıq qurulmuşdur. Elə bir sual yoxdur ki, biz onu Azərbaycan tərəfi qarşısında qoyaq və İlham Heydər oğlunun, Azərbaycan Prezidentinin dəstəyini almayaq. Bizim heç bir dövlətlə belə münasibətlərimiz olmamışdır və yoxdur ki, razılığa gələk və Azərbaycanla olduğu kimi, hər şey həyata keçsin”.
Aleksandr Lukaşenko xalqımızın ümummilli lideri Heydər Əliyevin Azərbaycan-Belarus münasibətlərinin yüksək səviyyəyə qalxması sahəsindəki xidmətlərini xatırladaraq deyib ki, məhz görkəmli dövlət xadimi Heydər Əliyevin həyata keçirdiyi tədbirlər sayəsində ölkələrimiz arasında əməkdaşlıq daha da genişlənib: “Hazırda Prezident İlham Əliyev əməkdaşlıq əlaqələrimizin inkişafına öz töhfəsini verir”.
İkitərəfli münasibətlərin səviyyəsindən danışan Belarus Prezidenti ölkəsinin Azərbaycanda bir çox layihələrdə yaxından iştirak etdiyini bildirib.
“Bu, hər iki ölkə arasında olan qarşılıqlı anlaşmanın nəticəsidir”, - deyən Belarusun dövlət başçısı bildirib ki, dost Azərbaycan zəngin sərvətlərə malikdir və bu da ölkənin daha da güclənməsinə, xalqın rifah halının yaxşılaşmasına xidmət edir.
Azərbaycan Prezidenti İlham Əliyev təşəkkür edərək deyib: “Hörmətli Aleksandr Qriqoryeviç! Əziz dostlar! Bir daha gözəl Belarus torpağına dəvətə görə Aleksandr Qriqoryeviçə səmimi qəlbdən təşəkkürümü bildirmək istəyirəm. Mənim ünvanıma, Azərbaycanın, Azərbaycan xalqının ünvanına dediyiniz xoş sözlərə görə Sizə çox minnətdaram”.
Prezident İlham Əliyev deyib ki, dövlət başçılarının mütəmadi görüşləri, qarşılıqlı səfərləri ikitərəfli münasibətlərin inkişafına təkan verir. Ulu öndər Heydər Əliyevin xatirəsinə göstərdiyi ehtirama görə, Belarus Prezidentinə təşəkkür edən Azərbaycan dövlətinin başçısı ölkələrimizin müstəqilliyinin ilk illərində çətin sınaqlardan çıxdığını və uğurlu inkişaf yoluna qədəm qoyduğunu diqqətə çatdıraraq deyib: “1993-cü ildən, Heydər Əlirza oğlu hakimiyyətə gələn kimi tərəqqi, inkişaf başlandı. Bu gün biz əminliklə gələcəyə baxa bilərik. Mən burada üç il əvvəl olmuşam. Mən dəyişiklikləri, qayda-qanunu, yaşayış səviyyəsini görürəm. Bizi çox şey birləşdirir. İlk növbədə, bu, öz xalqına sədaqət, gələcək nəsillər qarşısında məsuliyyət, qarşıda duran məqsəddir. Məqsəd dövlətin, ölkənin müstəqilliyinin möhkəmləndirilməsi, inkişaf etmiş, dinamik, yüksək səviyyəyə və yaşayış keyfiyyətinə malik cəmiyyət qurmaqdır. Demək istəyirəm ki, münasibətlərimizə strateji tərəfdaşlıq kimi qiymət verməyinizlə tamamilə razıyam. Biz buna nisbətən qısa vaxtda nail olmuşuq. Bunu qeyd etmək mənə də çox xoşdur. Bizim ikitərəfli münasibətlərimiz nadir münasibətlərdir. Bütün məsələlər hər hansı bürokratiyasız, ləngiməsiz, operativ, səmərəli və etibarlı şəraitdə həll edilir. Mən çox şadam ki, bizim aramızda belə şəxsi dostluq münasibətləri yaranmışdır. Bu, ikitərəfli münasibətlərimizin bütün spektrinə sirayət edir. Biz ticarət dövriyyəsinin artmasını, siyasi sahədə qarşılıqlı fəaliyyəti, birgə həyata keçirdiyimiz layihələrin konkret nəticələrini görürük və artıq gələcək üçün perspektiv planlar qururuq”.
Sonda Prezident İlham Əliyev dost Belarus xalqına rifah, əmin-amanlıq, sabitlik və çiçəklənmə arzulayıb.

Paylaş:

Baxılıb: 1173 dəfə