Rəqibi öz evində mat edən “Qarabağ”

Bakı:

10°C

93%

3m/s

Əlaqə

AZ RU EN

Ana səhifə / İdman / Rəqibi öz evində mat edən “Qarabağ”

Rəqibi öz evində mat edən “Qarabağ”

11.08.2022 [12:04]

Mütəxəssislərin qapıdan yan keçən “şərh zərbələri”

Günel ABBAS

Səfər oyunlarında şahlanan “Köhlən atlar”

Məğlubiyyətdən uzun müddətdir uzaq olan, bu anlayışı özünə yaxın buraxmayan bir komandadan danışacağam bu gün. “Qarabağ” - Ferençvaroş oyunun nəticələri, “Köhlən atlar”ın səfərdə 3-1 hesabı ilə nəticələnən oyunu bu gün təkcə “Qarabağ” komandasının azarkeşlərinin yox, bütün Azərbaycan xalqının və futbol sevərlərin qüruruna çevrildi. Ağdamın “Qarabağ” komandası səfərdə rəqibi öz meydanında mat etməyi bir növ adət halına çevirib. Tofiq Bəhramov stadionunda gerçəkləşən oyunun ilk mərhələsində hesabı 1-1 ilə bağlasaq da, səfərdə böyük fərqlə qalibiyyət gətirəcəyinə əmin idim və bunu açıq şəkildə bəyan etmişdim. Əslində, təkcə mən yox, bütün “Qarabağ” sevərlər bu qənaətdə idilər. Biz hamımız “Qarabağ”ın azarkeşlərini ard-arda sevindirməsinə alışmışıq. Bilirik ki, ilk oyunda stadionda 30 mindən artıq azarkeşin dəstəyi “Qarabağ”ı səfər oyununda da ayaqda tutacaq. Əslində, bu sevgi komandamızın üzərinə həm də məsuliyyət qoyur. Oyunçular bilir ki, 30 mindən də çox adam səfər oyununda mavi ekranlardan onları izləyir. Hər qol sevincinə bir yox, beş stadion böyüklüyündə reaksiya verirlər. “Qarabağ” azarkeşləri oyunun son dəqiqəsinə qədər izləyir və uzaqdan da olsa, enerjini ötürməyi bacarırlar. “Qarabağ” təkcə Ağdamın, Qarabağın yox, Azərbaycan futbolunun ən böyük uğuru, hədiyyəsidir. “Qarabağ” həm də Allahverdi Bağırovdan Qurban Qurbanova “ötürülən” mirasdır. Bu mirasa layiqincə sahib çıxan Qurban Qurbanovun komandası isə meydanlarda əsl oyun sərgiləyir.

İndi vurulan qolları...

Bizim üçün bu qələbə gözlənilən olsa da, bir sıra mütəxəssislərin fikrincə, Qurban Qurbanovun oyunçuları Çerçesovun komandasına qalib gələ bilməyəcəkdi. Şərh verənlər bir çox məqamları unudur, yan keçirdilər. Əvvəla bizim komandamız matçlarda bütün imkanlarından istifadə edir. Meydanda komandanın hər bir üzvü oyunçudan daha çox, döyüşçüyə çevrilirlər. Şərhçilər özləri də bilmədən unutdular və yanıldılar. Qarabağla bacarmaq üçün yaxşı komanda olmaqdan daha artığını etməlisən, yeri gələndə döyüşçüyə çevrilməyi bacarmalısan. Yeri gələndə ayağında, qolunda yüngül xəsarətlər olsa da, bunu hakimlərin nəzərində böyütmək yerinə, komandanı düşünərək oyuna davam etməlisən. Bu, bizim döyüşçülərin “yaralansaq da, oyuna davam edirdik” şüarıdır. Komandamızın oyunçularının hər biri qapıya gələn zərbənin qarşısını almaq üçün sözün həqiqi mənasında sinəsini sipər edir. Onlar bunun üçün qarşılaşa biləcəkləri heç bir təhlükədən boyun qaçırmırlar.

Elə bu cəsarət və əzmkarlığın nəticəsidir ki, hər iki oyunda rahatlığı hərəkətlərindən bəlli olan rəqib komandanın baş məşqçisi sonda üzündə o qəribə ifadəylə duruxdu. Bu ifadə “Qarabağ” oyunçularının azarkeşlərə bəxş etdiyi daha bir sevinc, daha bir qürurdur. Bəli, “kabab qoxusu gələn meydan”ın sahibi rəqibi elə öz evində məyus etdi. Oyunun şərhçisi Pərviz Musayevin də dediyi kimi, indi rəqib komandaya qapıya vurulan qolları çıxarmaq qalır.

Qapıçıların “Şah”ı

Qarabağın qüruru təkcə müdafiəçilər, hücumçular deyil. Həm də adı və oyunlarda göstərdiyi performansı ilə dillər əzbəri olan qapıçı Şahruddindir. Onu əbəs yerə qapıçıların “Şah”ı adlandırmırlar. Oyunu izləyərkən belə qənaətə gəlirsən ki, bu adam sanki bütün topları maqnit kimi öz üzərinə çəkir. O, hardadırsa, top da o istiqamətə gəlir, ya da əksinə, top gələn istiqamətdən həmin an Şahruddin təhlükənin qarşısını alır. Əliylə zərbənin qarşısını ala bilmədiyi anlarda bütün gücünü sərf edərək ən son məqama kimi savaşır. Onun sayəsində qapımıza vurulmayan hər qol an məsələsidir. Bu mənada Şahruddinin oyunda göstərdiyi performansı xüsusi qeyd etməsək, olmaz.

Azarkeşlər bu gün “Qarabağ”la sözün bütün mənalarında qürur duyur. Bundan sonra da fəxr ediləsi məqamlar çox olacaq. “Qarabağ”ın qol vurub, böyük hesabla rəqibi məğlub edəcəyi oyunların komandanın öz evində, Ağdamda keçiriləcəyi günlər də uzaqda deyil...

Paylaş:

Baxılıb: 695 dəfə