Ekspert: Alternativ enerji mənbələrindən istifadə olunması hər hansı qəzanın təsirinin azaldılması üçün əsas prioritetlərdəndir

Bakı:

15 °C

77 %

9 m/s

AZ RU EN

Ana səhifə / İqtisadiyyat / Ekspert: Alternativ enerji mənbələrindən istifadə olunması hər hansı qəzanın təsirinin azaldılması üçün əsas prioritetlərdəndir

Ekspert: Alternativ enerji mənbələrindən istifadə olunması hər hansı qəzanın təsirinin azaldılması üçün əsas prioritetlərdəndir

06.07.2018 [09:34]

Alternativ enerji mənbələrindən istifadə olunması, strateji obyektlərin generatorlarla təmin edilməsi və əlavə tədbirlərin görülməsi gələcəkdə hər hansı bir qəzanın təsirinin azaldılması üçün əsas prioritetlərdəndir.
Bu barədə AZƏRTAC-a iqtisadçı-ekspert Vüqar Bayramov deyib.
Ekspert qeyd edib ki, bir neçə gün əvvəl Mingəçevirdəki İstilik Elektrik Stansiyasında baş vermiş qəza nəticəsində enerji təminatında yaranmış problemlərin qısa zamanda aradan qaldırılması üçün Prezident İlham Əliyevin tapşırığı ilə Dövlət Komissiyası yaradıldı. Dövlət Komissiyasının yaradılması baş vermiş hadisəyə çox çevik reaksiya verilməsi, eyni zamanda, təbii ki, sistemli və operativ işlərin həyata keçirilməsi baxımdan vacibdir. Bu, ondan xəbər verir ki, belə hallar baş verərsə, proses ölkə Prezidenti tərəfindən birbaşa nəzarətə götürülür. Prezidentin nəzarətində olması da qəzanın nəticələrinin araşdırılması və fəsadlarının qısa vaxtda aradan qaldırılması baxımından ciddi bir baza formalaşdırır. Dövlət Komissiyası qəzanın başvermə səbəblərini araşdırmaqla yanaşı, gələcəkdə belə halların baş verməməsi üçün təkliflər planı hazırlayacaq. İyulun 4-də Azərbaycan Respublikasının Prezidenti yanında ölkənin enerji sistemindəki vəziyyətlə bağlı keçirilən müşavirədə qeyd olunduğu kimi, komissiya birmənalı şəkildə yalnız baş vermiş qəzanın səbəblərini qiymətləndirmək deyil, bu istiqamətdə fəaliyyətin təkmilləşdirilməsi, eyni zamanda, gələcəkdə belə halların baş verməsinin qarşısının alınması ilə bağlı təklifləri dövlətimizin başçısına təqdim edəcək ki, bu da məsələyə daha sistemli yanaşmanın nümayiş etdirilməsi baxımından önəmlidir.
Qəza həm cəmiyyətimizə, həm də iqtisadiyyatımıza təsirsiz ötüşmədi. Təqdirəlayiq haldır ki, qəzanın nəticələrini aradan qaldırmaq üçün bir sıra dövlət qurumları, xüsusilə nəqliyyat sektorunda, metroda baş verənlərlə bağlı Fövqəladə Hallar Nazirliyi, Bakı Nəqliyyat Agentliyi və digər qurumlar birgə fəaliyyət göstərərək hadisəyə operativ reaksiya verdilər və peşəkarlıq nümayiş etdirdilər.
Azərbaycanın enerji sektoruna kifayət qədər investisiya yatıran ölkələrdən olduğunu deyən V.Bayramov qeyd edib ki, təkcə 2017-ci ildə Azərbaycanda enerji sektoruna 1,9 milyard manatdan çox investisiya qoyulub. Bu məbləğin böyük bir qismi 2010 və 2014-cü illəri əhatə edib. Həmin dövrdə “Azərenerji”nin xətti ilə bu istiqamətdə 1,6 milyard manat investisiya yönəldilib ki, bu da əvvəlki məzənnə ilə 2 milyard dollardan artıq vəsaitdir. Bu sektor Azərbaycan üçün prioritet sektordur. İnvestisiyanın həcminin artırılması, strukturunun şaxələndirilməsi və xüsusən də alternativ mənbələrdən istifadə edilməsi enerji sahəsində yeni iqtisadi siyasətin əsas prioritetlərindən birinə çevriləcək. Ölkə başçısının qeyd etdiyi kimi, məhz növbəti dövrlərdə də investisiya qoyuluşları bir və ya az sayda mənbədən asılılığın aradan qaldırılmasına imkan verəcək ki, bu baxımdan da mövcud siyasət, investisiya qoyuluşları gələcəkdə belə halların minimumlaşdırılması və ölkənin belə hallardan sığortalanması üçün bir baza formalaşdıracaq.
Ekspert deyib ki, alternativ enerji mənbələrindən istifadə olunması, strateji obyektlərin generatorlarla təmin edilməsi və əlavə tədbirlərin görülməsi nəticəsində gələcəkdə hər hansı bir qəzanın təsirinin azaldılması üçün əsas prioritetlərdəndir. Dövlətimizin başçısı tədbirlər planının hazırlanması ilə bağlı göstəriş verdi. “Güman edirəm ki, bu, həm elektrik stansiyasında tam təftiş və auditin aparılmasına, eləcədə enerji sektorunda daha sistemli fəaliyyətin həyata keçirilməsinə imkan verəcək. Dövlətimizin başçısı bu sahədə peşəkarlığı ilə seçilən beynəlxalq qurumlar tərəfindən qiymətləndirilmənin aparılması ilə bağlı göstəriş verdi. Bu, enerji təhlükəsizliyinin formalaşması, enerji sektorunda fəaliyyətin müasir standarta uyğun qurulması baxımından vacibdir. Son müşavirə, Dövlət Komissiyasının yaradılması, dövlətimizin başçısı tərəfindən verilən tapşırıqlar gələcəkdə enerji sektorunda belə halların qarşısının alınması üçün baza formalaşdırır. Qəzaların minimumlaşdırılması, onların fəsadlarının iqtisadiyyata, cəmiyyətə, ümumi sistemə təsirlərinin azaldılması ilə bağlı tədbirlər həyata keçiriləcək ki, bu da növbəti dövrlərdə vətəndaşların fasiləsiz enerji ilə təminatı baxımından önəmlidir”, - deyə Vüqar Bayramov bildirib.

Paylaş:

Baxılıb: 919 dəfə