38 ölkənin dini liderləri Azərbaycanda...

Bakı:

14°C

88%

3m/s

Əlaqə

AZ RU EN

Ana səhifə / MEDİA / 38 ölkənin dini liderləri Azərbaycanda...

38 ölkənin dini liderləri Azərbaycanda...

04.05.2024 [12:15]

Yeganə BAYRAMOVA

Ölkəmiz dünyanın humanitar ideya mərkəzlərindən biridir. Bu baxımdan Azərbaycan qlobal məsələlərin müzakirə olunduğu beynəlxalq əhəmiyyətli Zirvə görüşlərinə uğurla ev sahibliyi edir. Multikultural dəyərləri təşviq edən qlobal ideyalarımız bölgənin, həmçinin bütün bəşəriyyətin mənafeyinə xidmət göstərir. Məsələn, bir neçə gün öncə-mayın 1-də Azərbaycanın ev sahibliyi etdiyi VI Ümumdünya Mədəniyyətlərarası Dialoq Forumu çərçivəsində Dini liderlərin Bakı görüşünü xüsusi vurğulaya bilərik. Tədbirə dünyanın 30-dan çox ölkəsindən dini liderləri qatılmışdı.

Mədəniyyətlərarası Dialoq Forumu Prezident İlham Əliyevin təşəbbüsü ilə dünyanın nüfuzlu beynəlxalq qurumları - UNESCO, BMT-nin Sivilizasiyalar Alyansı, ICESCO və Dünya Turizm Təşkilatını tərəfdaş kimi cəlb edən yeganə platformadır. Prezidentin müəllifi olduğu, 2008-ci ildən mədəniyyətlərarası dialoqun inkişafını nəzərdə tutan “Bakı Prosesi” beynəlxalq ictimaiyyəti narahat edən humanitar problemlərin dövlət rəsmiləri, ictimai-siyasi xadimlər, dini liderlər, nüfuzlu alim və ekspertlər arasında səmərəli fikir mübadilələrinin aparılmasına əlverişli imkan yaradıb.

Azərbaycanda heç vaxt dini qarşıdurma olmayıb

Mövzunu “Yeni Azərbaycan”a şərh edən Milli Məclisin İctimai birliklər və dini qurumlar komitəsinin üzvü, deputat Azər Badamov bildirib ki, Azərbaycan dünyada sayılıb-seçilən, müstəqil siyasət yeridən, suveren dövlət imici qazanıb. Onun sözlərinə görə, bunu ölkəmizdə keçirilən nüfuzlu beynəlxalq təşkilatların tədbirləri də təsdiqləyir: “Respublikamız daha bir mötəbər tədbirə ev sahibliyi etdi. Artıq ölkəmiz bu sahədə zəngin təcrübəyə malikdir. Təbii ki, söhbət “Sülh və qlobal təhlükəsizlik naminə dialoq” mövzusunda keçirilmiş VI Ümumdünya Mədəniyyətlərarası Dialoqdan gedir. Belə mötəbər tədbirlərin keçirilməsi üçün Azərbaycan artıq ənənəvi bir məkana çevrilib. Bu gün də ənənə qorunub saxlanılır. İctimai-siyasi quruluşdan asılı olmayaraq, Azərbaycanda heç vaxt milli və dini zəmində nəinki qarşıdurma, heç anlaşılmazlıq da olmayıb. Bütün dövrlərdə Azərbaycanda müxtəlif

xalqların nümayəndələri bir ailə kimi yaşayıb və daim bir-biriləri ilə dostluq münasibətləri qurublar”.

Ölkəmiz dünyada sabitlik məkanıdır...

Deputat qeyd edib ki, artıq dünyanın mötəbər təşkilatları öz tədbirlərini Azərbaycanda keçirməyə üstünlük verir. Bunun əsas səbəbi ölkəmizin dünyada sabitlik məkanı kimi imic qazanmasıdır: “Çünki siyasi, iqtisadi və digər sahələrdə bir-birinin ardınca uğurlar qazanan, əsl tolerantlıq nümunəsi olan Azərbaycanı beynəlxalq ictimaiyyətə daha yaxından tanıtmağın böyük əhəmiyyəti var. Əslində, Azərbaycan artıq dünyanın inkişaf etmiş dövlətləri sırasına qoşulmaqdadır. Lakin buna baxmayaraq, müxtəlif ölkələrdən gəlmiş nümayəndələrin bu inkişafı öz gözləri ilə görmələri daha vacibdir. Paralel olaraq tədbir iştirakçıları ölkəmizin sivilizasiyalararası dialoqa, multikultural dəyərlərin qorunmasına verdiyi töhfələrlə şəxsən tanış olublar”.

Azərbaycan mədəniyyətlərin qovuşduğu məkandır

Millət vəkili budəfəki forumda 110 ölkənin nümayəndəsinin iştirak etdiyini bildirib. O, forumun çox mühüm və nüfuzlu beynəlxalq platforma olduğunu deyib: “Dövlət başçısı forumda çıxışı zamanı dedi ki, Azərbaycanın təşəbbüsü ziyalıları, siyasətçiləri, qərar qəbul edənləri, media nümayəndələrini, vətəndaş cəmiyyətini bir araya gətirir. Təəssüflər olsun ki, dünyada yeni münaqişələri, yeni qeyri-sabitlik məkanlarını və təhdidləri görürük. Məsələlərin həllində Azərbaycanın öz təcrübəsi var. Əsrlər boyu Azərbaycan mədəniyyətlərin qovuşduğu məkan olub. Bizim coğrafi mövqeyimiz, Şərq ilə Qərb arasında yerləşməyimiz bu tendensiyaya imkan yaradıb. Çoxmədəniyyətli və böyük etnik müxtəlifliyə malik Azərbaycan cəmiyyəti əsrlər boyu ən mühüm dəyərləri - tolerantlığı, qarşılıqlı hörməti, dostluq və tərəfdaşlıq kimi dəyərləri qoruyub. Azərbaycanda yaşayan insanlar, müxtəlif etnik qrupların və dinlərin təmsilçiləri bir ailə kimi yaşayırlar. Onlar Azərbaycanın dəyərli vətəndaşlarıdır”.

Parlament üzvü vurğulayıb ki, dövlət başçısı forumda Azərbaycanın COP29-a yekdil qərarla ev sahibliyi edən ölkə seçildiyini də xatırladıb: “Bununla yanaşı, bu forum həm də dini liderlərin Şuşada keçirdikləri görüş ilə yadda qalacaq. Görüşdə 38 ölkəni və 10 beynəlxalq təşkilatı təmsil edən müsəlman, xristian, yəhudi, buddist, induist və digər dinlərin liderləri və nümayəndələri iştirak ediblər. Forum çərçivəsində dini liderlərin Şuşa görüşünün Bəyannaməsi qəbul olunub”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Dini və milli tolerantlıq, millətlərarası münasibətlərin inkişaf etdirilməsi” istiqaməti üzrə hazırlanmışdır

Paylaş:

Baxılıb: 554 dəfə