Milli hədəflərimizdən biri...

Bakı:

12°C

94%

0m/s

Əlaqə

AZ RU EN

Ana səhifə / MEDİA / Milli hədəflərimizdən biri...

Milli hədəflərimizdən biri...

11.05.2023 [11:05]

“Böyük Qayıdış!”

Yeganə BAYRAMOVA

İki ildən artıq dövrün qürurla bəhs etdiyimiz mühüm hadisələrindən biri işğaldan azad edilmiş ərazilərimizdə genişmiqyaslı bərpa-quruculuq işlərinin həyata keçirilməsidir. Vətəndaşlarımızın gələcəkdə bu torpaqlarda rahat, təhlükəsiz yaşayışlarının təmin edilməsi üçün zəruri olan bütün addımlar atılır. 30 illik işğal dövrünün dağıntılarını bərpa-quruculuq işləri, soydaşlarımızın torpaq həsrətini “Böyük Qayıdış” əvəzləyir.

Prezident İlham Əliyevin və Birinci xanım Mehriban Əliyevanın işğaldan azad edilmiş ərazilərə səfərlərinin hər biri bərpa-quruculuq işlərinin miqyasını daha da genişləndirir. Regionların sosial-iqtisadi inkişafının sürətləndirilməsi dövlətimizin siyasətində prioritet məsələdir. Ölkə başçısının son illərdə bölgələrə səfərlərinə diqqət yetirsək görərik ki, bu səfərlərin böyük əksəriyyəti işğaldan azad edilmiş ərazilərimizədir.

Millət vəkili Cavid Osmanov “Yeni Azərbaycan”a açıqlamasında ölkəmizin iqtisadi, siyasi, diplomatik, hərbi uğurlarının göz qabağında olduğunu vurğulayıb. Deputatın sözlərinə görə, hər bir inkişafın əsasında iqtisadi tərəqqi dayanır: “Cənab Prezidentin işğaldan azad edilmiş ərazilərə hər bir səfəri mühüm əhəmiyyət kəsb edən sosial obyektlərin açılışı və təməlqoyma mərasimlərinin keçirilməsi ilə yadda qalır. Həyata keçirilən genişmiqyaslı bərpa-quruculuq işləri ölkəmizin iqtisadi imkanlarının təqdimatıdır. Azad edilmiş şəhərlərimizin, kəndlərin Baş planları hazırlanır. Bütün işlər məhz bu plan əsasında görülür. “Böyük Qayıdışı” daha da sürətləndirmək, bütün işləri vaxtında, eyni zamanda, yüksək keyfiyyətlə görmək əsas hədəflər sırasındadır.

Azərbaycan dünya hərb tarixində imza atdığı ilklə tarixə düşdü. Müharibə başa çatan kimi bu torpaqlarda bərpa-qurculuq işlərinə start vermək qeyri-mümkün görünürdü. Amma Azərbaycan bu işlərə öz maliyyə imkanları hesabına sıfırdan başladı. Dövlət başçısının bu günlər ərzində səfər etdiyi rayonlarda yaşayış məhəllələrinin təməli qoyulması Böyük Qayıdışa çağırışdır. İlham Əliyev bərpa-quruculuq işlərinə başlandığı gündən böyük inamla qeyd edirdi: “Qarabağ bölgəsini nəinki Azərbaycanın, dünyanın ən gözəl bölgələrindən birinə çevirməliyik və əminəm ki, buna nail olacağıq”.

Deputat qeyd edib ki, dövlət başçısının işğaldan azad edilmiş ərazilərə bugünədək reallaşdırdığı səfərlər arasında Qarabağın tacı Şuşaya səfər daha çoxluq təşkil edir: “Prezidentin istər keçirilən tədbirlərdə, istərsə də görülən işlərlə yaxından tanış olmaq məqsədilə etdiyi səfərlər zamanı bu məkandan səsləndirdiyi mesajların hər biri dünənə baxış əsasında gələcəklə bağlı hədəfləri açıqlayır. Bütün bunlar Azərbaycanda Heydər Əliyev siyasətinin davam etməsinin təqdimatıdır. İlham Əliyevin sərəncamları hər il ölkəmizin hərtərəfli inkişafına xidmət edən konkret sahələrin adı ilə bağlı olur. Bu sərəncamlar, həmçinin tariximizə, mədəniyyətimizə, ədəbiyyatımıza bağlılığımızı əks etdirir, ən əsası Azərbaycanı bugünkü inkişaf səviyyəsinə gətirib çıxaran Heydər Əliyev siyasətinin təbliğinə, qalib ölkəmizin qarşısında dayanan möhtəşəm uğurların təqdimatına yönəlir. 2022-ci il “Şuşa İli”, 2023-cü il isə “Heydər Əliyev İli” elan edildi. Şuşanın 270 illiyi çox geniş və böyük təntənə ilə qeyd edildi. Bu il isə Ulu Öndərin 100 illik yubileyini qeyd edirik”.

Parlament üzvünün sözlərinə görə, Azərbaycanın hər ili öz tarixinə uğurlu səhifə kimi yazması qaçılmazdır: “Heydər Əliyev yolu ölkəmizi gələcəyə daha böyük inamla aparır. Otuz illik işğala 44 gündə son qoyan Azərbaycan tarixi Zəfəri ilə malik olduğu bütün imkanları dünyaya təqdim etdi. Bu gün isə şanlı Qələbəmiz Qarabağı və Şərqi Zəngəzuru daha möhtəşəm görmək üçün müasir tələblər əsasında bərpa-quruculuq işlərinin miqyasını genişləndirməyə, “Böyük Qayıdışı” tam şəkildə reallaşdırmağa çağırış edir.

Cəsarətlə deyə bilərik ki, “Böyük Qayıdış” proqramının bundan sonra da uğurla davam etdiriləcəyi barədə verilən nikbin proqnozlara nəinki bizim, dünya ictimaiyyətinin də zərrə qədə? şübhəsi yoxdur və ola da bilməz. Birliyimiz, həmrəyliyimiz sayəsində bu hədəfə də tezliklə nail olacağıq”.

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “İşğaldan azad olunmuş ərazilərə “Böyük Qayıdış” istiqaməti üzrə hazırlanmışdır

Paylaş:

Baxılıb: 536 dəfə