44 gün...

Bakı:

17°C

77%

5m/s

Əlaqə

AZ RU EN

Ana səhifə / MEDİA / 44 gün...

44 gün...

17.10.2023 [11:13]

Böyük Zəfərdə payı olan vətənpərvər gənclər

Azərbaycanda gənclər siyasəti dövlət siyasətinin mühüm tərkib hissəsidir. Azərbaycan gəncləri ictimai həyatın bütün sahələrində öz aktiv fəaliyyətləri ilə seçilirlər. Azərbaycan gəncliyi özünəinam ruhunda inkişaf edir, dövlətin göstərdiyi yüksək diqqət və qayğının məsuliyyətini dərk edir, ona göstərilən etimadı doğruldur. Nəticə etibarilə, bu gün ölkəmizdə istedadlı, cəmiyyətə və dövlətə yararlı olmaq istəyən gənclərin fiziki-mənəvi inkişafı, yeni nəslin vətənpərvərlik ruhunun yüksəldilməsi, gənclərin aktiv ictimai fəaliyyətə cəlb olunması və digər istiqamətlərdə mühüm işlər görülür, səmərəli nəticələr əldə edilir. Uğurlu gənclər siyasəti ölkənin etibarlı gələcəyini təmin edən mühüm vasitə olmaqla yanaşı, cəmiyyətin dinamik təbəqəsi qismində çıxış edən gənclər qarşısında yeni perspektivlər açır.

Aparılan bu siyasətin ən parlaq nümunəsini biz 44 günlük Vətən müharibəsində gördük. Vətən müharibəsində Azərbaycan gəncləri həm ön cəbhədə əsgər, həm də arxa cəbhədə informasiya savaşının iştirakçısı kimi bu sınaqdan üzü ağ çıxdı. Bu qələbənin qazanılmasında Azərbaycanın vətənpərvər gənclərinin rolu danılmazdır. Vətənə sevgi, torpağa sədaqət Azərbaycan gəncliyinin tarixdən bu günə qanında, canında olan ən ülvi hissidir.

Hazırda mütəmadi olaraq gənclərdə vətənpərvərlik hisslərinin artırılması məqsədilə tədbirlər, layihələr həyata keçirilir. Yeri gəlmişkən, “Böyük Qayıdış” Gənclər təşkilatı tərəfindən “Zəfərin 44 günü” adı altında həyata keçirilən silsilə tədbirlər çərçivəsində döyüşçü şairlərlə “Mən Vətənəm” adlı görüş təşkil olunub.

Gənclər Dünya Gənc Türk Yazarlar Birliyinin sədri, şair-publisist İntiqam Yaşarın moderatorluğu ilə baş tutan görüşdə Vətən müharibəsində iştirak etmiş istedadlı gənc şairlərimiz Həsən Kür, Nicat Fərman və Emin Pirinin yaradıcılığı ilə yaxından tanış olub, müharibə xatirələrini və şeirlərini dinləyib, fikir mübadiləsi aparıb, həmçinin onları düşündürən suallara cavab tapmaq imkanı əldə ediblər.

Görüşdə çıxış edən Emin Piri qeyd edib ki, görüşün məhz Xankəndidə bayraq ucaldıldığı gün baş tutması olduqca əlamətdardır: “Ölkəmizdə gənclərə vətənpərvərlik hisslərinin təbliğ olunması istiqamətində böyük işlər görülür. Bu gün gənclərimiz də vətənpərvər ruhda yetişir. Çünki Ermənistanın Azərbaycana qarşı olan təxribatları hələ də davam edir, kin-küdurəti dayanmır. Universitet və orta məktəblərdə davamlı tədbirlər aparılmalı, yeni kino, film hazırlanmalı, əsərlər yazılmalıdır. İşlər davamlı və sistemli şəkildə həyata keçirilməlidir. Eyni zamanda, müxtəlif seminarlar, görüşlər təşkil edilməlidir. Bizim qarşımızda duran ən vacib məsələlərdən biri də Vətən sevgisinin dərk edilməsi üçün ölkəmizin tarixini, mədəniyyətini çox yaxşı öyrənməkdir. Əgər biz bunu edə bilsək, uğurla hədəflərimizə doğru irəliləyə bilərik. Əks təqdirdə qarşıda bizi çox dərin dövr gözləyər. Ermənistan hələ də bizə qarşı informasiya müharibəsi aparır və manipulyasiya işlərinə davam edir. Biz bu təbliğatı bağça, məktəb, universitet və digər yerlərdə uşaqlara, gənclərə təlqin etməliyik”.

Gənc şairlər Həsən Kür və Nicat Fərman də çıxış edərək, vətənpərvərliyin təbliğinin çox əhəmiyyətli bir mövzu olduğunu bildiriblər: “Biz bunu Vətən müharibəsində də aydın gördük. Vətənpərvərlik hansısa quru sözlərlə, verlişlərlə təbliğ edilməməlidir. Vətənpərvərlik yalnız ön cəbhədə vuruşmaq deyil, həm də ölkənin inkişafı üçün müasir dövrün tələblərinə uyğun bilik və bacarıqlara yiyələnməkdir. Bu gün cəmiyyətin bütün təbəqələrində, xüsusilə gənclər arasında vətənpərvərliyin gücləndirilməsi istiqamətində elmi baxımdan hazırlanmış sistemli fəaliyyət ölkənin əsas prioritetlərindən biridir. Bu konseptual fəaliyyət və tədbirlər sistemi müvafiq hüquqi sənədlərdə öz əksini taparaq hökumət qurumları, o cümlədən ali və orta ixtisas müəssisələri tərəfindən həyata keçirilir. Gənclər siyasətinin tələblərindən irəli gələn vəzifələr, həyata keçirilən kütləvi tədbirlər, maarifləndirmə və təbliğat işləri bilavasitə gənclərin mənəvi, fiziki, psixoloji hazırlığının təmin edilməsinə, onlarda Vətənə, doğma torpağa məhəbbət hissinin yüksəldilməsinə, eləcə də müasir dünyamızda qloballaşmanın geniş vüsət aldığı bir zamanda milli-mənəvi dəyərlərin qorunub saxlanmasına yönəldilir”.

Günel ABBAS

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə

“Uşaq və gənclərin fiziki və mənəvi inkişafı” istiqaməti üzrə hazırlanmışdır

Paylaş:

Baxılıb: 447 dəfə