Həmsədrlər münaqişənin həlli istiqamətində olan təşəbbüsləri dəstəkləməlidirlər

Bakı:

17°C

77%

6m/s

Əlaqə

AZ RU EN

Ana səhifə / Müsahibə / Həmsədrlər münaqişənin həlli istiqamətində olan təşəbbüsləri dəstəkləməlidirlər

Həmsədrlər münaqişənin həlli istiqamətində olan təşəbbüsləri dəstəkləməlidirlər

23.05.2009 [10:54]

Əli Əhmədov: Əgər bir qurum uzun müddət öz vəzifəsini yerinə yetirə bilmirsə, ən azından, formatın dəyişdirilməsi haqqında düşünmək lazımdır
Milli Məclisin dünənki iclasında Yeni Azərbaycan Partiyasının Sədr müavini-İcra katibi, millət vəkili Əli Əhmədov Minsk qrupu həmsədrlərinin son zamanlar verdikləri bəyanatlara etiraz edib. O, jurnalistlərlə söhbətində də bildirib ki, vasitəçilər öz üzərlərinə düşən missiyanı lazımi səviyyədə yerinə yetirməlidirlər:
- Biz dəfələrlə qeyd etmişik ki, ATƏT-in Minsk qrupunun həmsədrləri, onların təmsil etdikləri dövlətlər Ermənistan-Azərbaycan münaqişəsinin tənzimlənməsi ilə bağlı müəyyən işlər görüblər. Ancaq, eyni zamanda, istər Azərbaycan cəmiyyətinin ayrı-ayrı nümayəndələri, istərsə də ölkə Prezidenti cənab İlham Əliyev bu qurumun fəaliyyətinin Azərbaycan ictimaiyyətini kifayət qədər təmin etmədiyi barədə fikirlər səsləndirib. Bildiyiniz kimi, Minsk qrupu 17 ildir ki, fəaliyyət güstərir, ancaq bu müddət ərzində Ermənistan-Azərbaycan, Dağlıq Qarabağ münaqişəsinin tənzimlənməsi, nizama salınması mümkün olmayıb. Təbii ki, bu fakt Minsk qrupunun özünü də narahat etməlidir. Qeyd etdiyim kimi, 17 il heç də az müddət deyil və bu müddət ərzində onlar, yəqin ki, öz fəaliyyətlərinin hər hansı bir son nəticəyə gətirib çıxarmaması üzərində düşünməlidirlər. Bu, məsələnin birinci tərəfidir. Məsələnin ikinci tərəfinə gəlincə, ümumiyyətlə, vasitəçilik məntiqi onu tələb edir ki, Minsk qrupunun həmsədrləri onların yerinə yetirmək istədiyi missiya ilə bağlı hansısa müsbət təşəbbüs kimin tərəfindənsə və yaxud hansısa bir məqamla əlaqədar irəli sürülürsə, onu gərək müdafiə etsinlər, dəstəkləsinlər. Əgər Dağlıq Qarabağ münaqişəsinin nizama salınmasına yönəldilmiş hər hansı bir təşəbbüs istər Minsk qrupunun üzvləri, istər bu qrupa daxil olmayan dövlətlər və yaxud qurumlar tərəfindən irəli sürülürsə, o zaman sözügedən qrupa həmsədrlik edən dövlətlərin istənilən nümayəndəsi də bunu dəstəkləməlidir. Amma biz bunun əksini görürük. Bu hal bir neçə dəfə təkrar olunub. O cümlədən, BMT-nin Təhlükəsizlik Şurasında Azərbaycanın təşəbbüsünə əsasən sözügedən münaqişə ilə əlaqədar məsələ müzakirə olunarkən Minsk qrupunun həmsədrləri tamamilə əks mövqe tutdular. Digər bir tərəfdən, son zamanlar Türkiyə ilə Ermənistan arasında sərhədlərin açılması məsələsinin Dağlıq Qarabağ münaqişəsinin nizama salınması ilə əlaqələndirilməsi barədə bəyanatlar səslənəndə Minsk qrupunun həmsədrlərindən biri, konkret olaraq, Fransanı təmsil edən Bernar Fasye ortaya tamamilə fərqli müvqe qoydu. Qeyd etdiyim kimi, vasitəçilik məntiqindən çıxış etsək, istər-istəməz cənab Fasye də bu fikrə gəlməliydi, yəni, Qarabağ münaqişəsinin tənzimlənməsi ilə bağlı müsbət xarakter daşıyan məlum təşəbbüsü dəstəkləməliydi. Bütün bunların hamısını ümumiləşdirərək qeyd etmək istəyirəm ki, həmsədrlər onların missiyalarını yerinə yetirmələrinə dəstək verə biləcək istənilən müsbət təşəbbüsləri müdafiə etməyə borcludurlar, bu, onların vəzifəsidir.
- Əli müəllim, prezidentlərin növbəti görüşü Sankt-Peterburq şəhərində keçiriləcək. Bu görüşdən nəticə gözləmək olarmı? Görüş öncəsi belə bir fikirlər səslənir ki, problemin həlli ilə bağlı baza prinsipləri razılaşdırıla bilər...
- Hər bir görüşün keçirilməsində müəyyən gözləntilər var. Əgər gözləntilər olmasaydı, bu görüşlər keçirilməzdi. Əlbəttə, Azərbaycan münaqişənin nizama salınması üçün bütün addımların atılmasına tərəfdardır. Amma, təəssüf ki, münaqişə hələ də həll olunmayıb. Eyni zamanda, Sankt-Peterburq görüşündən bəzi gözləntilər var ki, bu haqda müəyyən fikirlər səslənir.
- Həmsədrlər bəyan ediblər ki, 2009-cu ildə problemin həllində nəticə əldə oluna bilər...
- Ermənistan-Azərbaycan, Dağlıq
Qarabağ münaqişəsi mürəkkəb münaqişədir və problemin həll olunması da böyük səylər tələb edir. Bütün səylərimiz ondan ibarətdir ki, münaqişə tezliklə həll olunsun. Azərbaycan qədər münaqişənin tezliklə həll olunmasına çalışan hər hansı tərəf təsəvvür etmək mümkün deyil. Amma problemin həll olunmamasının səbəbi işğalçı Ermənistanın indiyədək danışıqlar prosesində qeyri-konstruktiv mövqe tutmasıdır və işğalçı ölkə bu mövqeyini hələ də davam etdirir.
- Qeyd etdiniz ki, Minsk qrupu həmsədrlərinin fəaliyyəti Azərbaycan cəmiyyətini qane etmir. Bu qurumun fəaliyyətinə qarşı cəmiyyətin bütün təbəqələrində narazılıq artmaqdadır. Belə olan halda vasitəçilik missiyasının formatına yenidən baxmaq olarmı?
- Hesab edirəm ki, vasitəçilər öz missiyasını yerinə yetirməyi, sadəcə, regiona səfər etmək və bəyanat verməkdə görməməlidir. Bunu Azərbaycan Prezidenti də vurğulayıb. Əlbəttə, münaqişə tərəflərinin mövqeyinin yaxınlaşması istiqamətində müəyyən addımlar atılıb. Bunu qiymətləndirməmək olmaz. Amma fakt odur ki, münaqişə həll olunmayıb, Azərbaycanın işğal olunmuş torpaqları azad edilməyib, qaçqınlar, məcburi köçkünlər öz yurdlarına qayıtmayıblar. Ona görə də, biz, Minsk qrupunun fəaliyyətinə qiymət verərkən tərəflərin yaxınlaşması istiqamətində səylərə və reallıqların indiyədək dəyişməməsinə istinad edərək mövqeyimizi bildiririk. Məsələyə yanaşmam bundan ibarətdir ki, əgər bir qurum uzun müddət öz vəzifəsini yerinə yetirə bilmirsə, ən azından, formatın dəyişdirilməsi haqqında düşünmək lazımdır.

Paylaş:

Baxılıb: 1295 dəfə