İsveçrə Prezidenti Didye Burkhalter Milli Məclisdə olub

Bakı:

24 °C

56 %

4 m/s

Əlaqə

AZ RU EN

Ana səhifə / Siyasət / İsveçrə Prezidenti Didye Burkhalter Milli Məclisdə olub

İsveçrə Prezidenti Didye Burkhalter Milli Məclisdə olub

03.06.2014 [09:26]

İyunun 2-də Milli Məclisin sədri Oqtay Əsədov Azərbaycan Respublikasında rəsmi səfərdə olan İsveçrə Konfederasiyasının Prezidenti Didye Burkhalter ilə görüşüb.
AzərTAc xəbər verir ki, Oqtay Əsədov Azərbaycan-İsveçrə əlaqələrindən, ölkələrimizin müxtəlif sahələrdəki əməkdaşlığından danışıb. Bildirilib ki, Azərbaycanda 40-a yaxın İsveçrə şirkəti fəaliyyət göstərir. Xüsusi vurğulanıb ki, bu şirkətlərin böyük əksəriyyəti qeyri-neft sektorunda çalışır. Azərbaycan çox sürətlə inkişaf edir və artıq ölkəmiz İsveçrənin enerji sektoruna investisiya qoymağa başlayıb.
Milli Məclisin sədri Azərbaycan ilə İsveçrə arasında əməkdaşlığın möhkəmləndirilməsində dövlət başçılarının qarşılıqlı səfərlərinin və parlamentlərarası əlaqələrin mühüm rol oynadığını vurğulayıb. Oqtay Əsədov bu səfərin əlaqələrimizin inkişafına yeni təkan verəcəyini deyib.
Azərbaycan-İsveçrə siyasi, iqtisadi əlaqələrinin yüksək səviyyədə olduğunu qeyd edən Milli Məclisin sədri diqqətə çatdırıb ki, indiyədək ölkələrimiz arasında əməkdaşlığa dair 26 sənəd imzalanıb və 7 sənəd imzalanma ərəfəsindədir. O.Əsədov deyib ki, yüksək səviyyəli səfərlər və görüşlər zamanı aparılan danışıqlar, əldə olunmuş razılaşmalar, imzalanmış sənədlər əməkdaşlığımızın hərtərəfli inkişafı üçün möhkəm hüquqi baza yaradır. O, vurğulayıb ki, hər iki ölkə bir çox beynəlxalq təşkilatlarda uğurla əməkdaşlıq edir.
Bildirilib ki, Azərbaycan ATƏT Parlament Assambleyasının 23-cü sessiyasına ev sahibliyi edəcək. Eyni zamanda, ölkəmiz 6 ay müddətində Avropa Şurası Nazirlər Komitəsinə sədrliyi həyata keçirir.
Ermənistan-Azərbaycan, Dağlıq Qarabağ münaqişəsinə toxunan O.Əsədov bildirib ki, ATƏT-in Minsk qrupu problemin həlli ilə məşğul olsa da, hələ ki, bu istiqamətdə heç bir nəticə yoxdur. Eyni zamanda, BMT Təhlükəsizlik Şurası münaqişəyə dair dörd qətnamə qəbul edib. Lakin Ermənistan bu qətnamələrə məhəl qoymur və hələ də torpaqlarımızın 20 faizini işğal altında saxlayır. Milli Məclisin sədri deyib ki, ATƏT-in Minsk qrupunun bu məsələ ilə bağlı daha fəal olması üçün imkanlar yaradılmalıdır.
Prezident Didye Burkhalter Azərbaycan ilə İsveçrə arasında əlaqələrin yüksək səviyyədə olduğunu bildirib.
Azərbaycana, eyni zamanda, ATƏT-in fəaliyyətdə olan sədri kimi səfərə gəldiyini deyən ali qonaq Prezident İlham Əliyev ilə görüşündə Ermənistan-Azərbaycan, Dağlıq Qarabağ münaqişəsi haqqında geniş fikir mübadiləsinin aparıldığını bildirib. İsveçrə Prezidenti qeyd edib ki, tərəflərin fikirlərini dinləmək və məlumatlı olmaq çox vacibdir. Prezident Didye Burkhalter növbəti iki gün ərzində Gürcüstanda və Ermənistanda olacağını və bu səfərlərin Dağlıq Qarabağ münaqişəsinin həlli prosesini intensivləşdirməyə töhfə verəcəyinə ümidvar olduğunu deyib.
Görüşdə gələcək əməkdaşlıq imkanları, qarşılıqlı maraq doğuran digər məsələlərə dair müzakirələr aparılıb.

Paylaş:

Baxılıb: 794 dəfə