Azərbaycana qarşı “qara piar” kampaniyası erməni lobbisi tərəfindən idarə edilir

Bakı:

18 °C

77 %

7 m/s

Əlaqə

AZ RU EN

Ana səhifə / Siyasət / Azərbaycana qarşı “qara piar” kampaniyası erməni lobbisi tərəfindən idarə edilir

Azərbaycana qarşı “qara piar” kampaniyası erməni lobbisi tərəfindən idarə edilir

11.06.2015 [09:35]

Bu prosesdə Avropanın müxtəlif institutlarında yer alan, əslində isə, aşkar lobbi fəaliyyəti ilə məşğul olan şəxslərin, o cümlədən, ölkəmizdəki “beşinci kolon”un nümayəndələrinin xidmətlərindən istifadə edilir
Müasir beynəlxalq münasibətlər sisteminin müstəqil aktoru olan Azərbaycan beynəlxalq dialoq və əməkdaşlıq məkanı kimi çıxış edir. Cənubi Qafqaz regionunun lider dövləti olan ölkəmiz həm də beynəlxalq miqyasda etibarlı strateji tərəfdaş kimi tanınır və Azərbaycanla əməkdaşlıq siyasi, iqtisadi, geopolitik nöqteyi-nəzərdən mühüm əhəmiyyət kəsb edir. Eyni zamanda, Azərbaycan dünya iqtisadiyyatına uğurla inteqrasiya edir, beynəlxalq əməkdaşlıq və təhlükəsizlik platformalarının formalaşdırılmasında əhəmiyyətli rol oynayır. Bir sözlə, ölkəmiz pozitiv beynəlxalq imicə malik olan suveren aktor kimi tanınır.
Sadalananlarla yanaşı, müstəqil inkişaf strategiyasına malik olan Azərbaycan bu gün beynəlxalq miqyasda müasir demokratik ölkə kimi tanınır. Ümumiyyətlə, ölkəmizin daxili siyasət kursunun mühüm istiqamətlərindən birini demokratik təsisatların təkmilləşdirilməsi, insan və vətəndaş hüquq və azadlıqlarının təmin və müdafiə edilməsi təşkil edir. Azərbaycanda demokratiya və onun başlıca atributları olan vətəndaş cəmiyyəti və hüquqi dövlətin mütləq komponentlərinin təşəkkül tapmasını, həmçinin, inkişafını təmin edən əsas amillərdən biri məhz davamlı hüquqi islahatların həyata keçirilməsidir. Bununla yanaşı, Azərbaycanda insan və vətəndaş hüquqları milli dövlətimizin Konstitusiya tələblərinə görə qorunur və ölkəmizdə hər bir vətəndaş qanunla müəyyən olunmuş qaydada öz hüquq və azadlıqlarından sərbəst surətdə istifadə edə bilir. Mötəbər beynəlxalq tədbirlərə ev sahibliyi edən, səmərəli beynəlxalq əlaqələrə malik olan, qlobal miqyasda etibarlı strateji tərəfdaş kimi tanınan ölkəmizdə ictimai-siyasi institutlar, o cümlədən, media qurumları qanunlar çərçivəsində sərbəst və azad fəaliyyət mexanizminə malikdirlər.
Sadalanan pozitiv məqamlara və nailiyyətlərə baxmayaraq, Azərbaycanın müasir dünya siyasəti və beynəlxalq münasibətlər sistemindəki mövqeyinin davamlı surətdə möhkəmlənməsindən narahatlıq keçirən bəzi xarici dairələr ölkəmizə qarşı təzyiq mexanizmi formalaşdırmağa çalışırlar. Xüsusilə də, ilk Avropa Oyunları ərəfəsində anti-Azərbaycan dairələr və erməni lobbisi yenə də Azərbaycana qarşı “qara piar” kampaniyasında fəallaşıblar. Bu kontekstdə birinci Avropa Oyunları ilə bağlı spekulyasiya xarakterli çağırışlar diqqət çəkir. Bu çağırışların yayımlandığı media qurumlarına, eləcə də, bəyanatların məzmununa nəzər saldıqda görünür ki, kampaniyanın arxasında islamofob, ermənipərəst dairələr, o cümlədən erməni lobbisi durur. Yeri gəlmişkən, bu istiqamətdə ortaya çıxan növbəti fakt da sadalanan məqamları sübuta yetirir. Belə ki, Amerika Erməni Milli Komitəsinin (ANCA) icraçı direktoru Aram Hamparyan özünün “Twitter” səhifəsində ilk Avropa Oyunlarını boykot etməyə çağırıb. Qeyd edək ki, ANCA Amerikada fəaliyyət göstərən ən böyük və ən radikal erməni təşkilatıdır. Uzun illər ərzində erməni terror təşkilatı ASALA-nın maliyyə və ideologiya mənbəyi rolunda çıxış edib. Bu qurumun adı dəfələrlə ABŞ-da çirkli pulların yuyulması, şantaj və müxtəlif konqresmenlərin ələ alınması qalmaqallarında çəkilib.
Bunlarla yanaşı, ilk Avropa Oyunları ərəfəsində Azərbaycana qarşı təzyiq kampaniyasında anti-Azərbaycan dairələri Avropanın müxtəlif institutlarında yer alan, əslində isə, aşkar lobbi fəaliyyəti ilə məşğul olan şəxslərin xidmətlərindən istifadə edirlər. İyunun 8-də bir sıra avropalı parlamentarilərin qurumun sessiyasının açılış iclasında ölkəmizə qarşı şou xarakterli kampaniya təşkil etmələri bu qəbildəndir.
Məsələ ondan ibarətdir ki, bu prosesdə bir sıra yerli və transmilli media orqanları aktiv iştirak edir, aldıqları direktivlər əsasında Azərbaycanın beynəlxalq imicinə kölgə salmağa çalışırlar. Xüsusilə də, ölkə daxilində “beşinci kolon”un ruporu funksiyasını yerinə yetirən mətbuat orqanları erməni lobbisi ilə sinxron hərəkət edirlər. Dolayısıyla, daim Azərbaycan dövlətinə qarşı antimilli dairələrlə eyni cəbhədə yer alan “Azadlıq” qəzeti kimi media qurumları dezinformasiya xarakterli məlumatları və subyektiv mülahizələrə söykənən - ittiham xarakterli fikirləri dövriyyəyə buraxmaqla “qara piar” kampaniyasına “töhfə”lər verir, bu məsələlərlə bağlı ictimaiyyəti manipulyasiyaya məruz qoyurlar.
Nurlan QƏLƏNDƏRLİ

Paylaş:

Baxılıb: 612 dəfə