Azərbaycan muğamı yeni inkişaf mərhələsindədir

Bakı:

28 °C

61 %

8 m/s

Əlaqə

AZ RU EN

Ana səhifə / Siyasət / Azərbaycan muğamı yeni inkişaf mərhələsindədir

Azərbaycan muğamı yeni inkişaf mərhələsindədir

18.03.2009 [13:37]

Məhz Mehriban xanım Əliyevanın diqqət və qayğısı sayəsində gənclərdə milli musiqiyə maraq artmaqdadır
Dünən ölkəmizdə keçiriləcək “Muğam aləmi” Beynəlxalq Muğam Festivalı çərçivəsində reallaşacaq Beynəlxalq Elmi Simpoziuma dair mətbuat konfransı keçirilib. Konfransı təhsil naziri Misir Mərdanov açaraq son illər Azərbaycan mədəniyyətinin, xüsusilə də, muğamının inkişafında YUNESKO və İSESKO-nun xoşməramlı səfiri, Heydər Əliyev Fondunun prezidenti, millət vəkili Mehriban xanım Əliyevanın rolunun əvəzsiz olduğunu deyib. M.Mərdanov bildirib ki, məhz ölkənin birinci xanımının muğama göstərdiyi diqqət və qayğı nəticəsində gənclərdə bu sahəyə böyük maraq oyanıb. Beynəlxalq Muğam Festivalında iştirak etmək haqqı qazanan respublika müsabiqəsinin gənc qaliblərinin istedadlarından razılıq edən nazir onların püxtələşməsi üçün dövlət tərəfindən yaradılan imkanlardan danışıb. Nazir onu da bildirib ki, Azərbaycanda ilk dəfədir ki keçiriləcək simpoziumda ABŞ, Fransa, Böyük Britaniya, Almaniya, İtaliya, Niderland, Türkiyə, Macarıstan, çin, Tunis, Rusiya, özbəkistan, Tacikistandan olan alimlər və musiqi xadimləri iştirak edəcəklər. Simpoziuma dəvət olunanlar arasında Avropa, Amerika və Asiyada ənənəvi Şərq musiqisini tədqiq edən 30-a yaxın alim, musiqi xadimi, tədqiqatçı var. Simpoziumda etnomusiqişünaslıq elminin məşhur simalarından Nyu-York şəhər Universitetinin professoru, YUNESKO-nun eksperti Stiven Blam, Nyu-Yorkun Kolumbiya Universitetinin fəxri professoru Diter Kristensen, Niderlanddan YUNESKO yanında ənənəvi musiqi sahəsi üzrə Beynəlxalq Şuranın vitse-prezidenti Uim van Zanten, Fransadan professor Jan Dyurinq, Berlindən Humbolt Universitetinin professoru Yurqen Elsner, Kaliforniya Universitetinin fəxri professoru Hiromi Lüter Sakata, eləcə də, MDB ölkələrindən özbəkistandan Rövşən Yunusov, Moskva Konservatoriyasının professoru Violetta Yunusova, Düşənbədən “Akademiya makoma”nın direktoru Abduvali Abduraşitov iştirak edəcəklər. Seksiyaların iclasında Azərbaycanın, İranın, Türkiyənin, Pakistanın, Hindistanın, Tunisin, özbəkistanın və Tacikistanın musiqi mədəniyyətinə həsr olunan məruzələr dinləniləcək.
Simpoziumun mahiyyətindən söhbət açan Bəstəkarlar İttifaqının sədri Firəngiz Əlizadə bildirib ki, muğama yaxın olan musiqi ənənələrinə həsr olunan elmi görüşlər xüsusi tarixi əhəmiyyət kəsb edir. Xalq artistinin sözlərinə görə, simpoziumun işinə BBC radiosunun “Word Routes” musiqi proqramının aparıcıları, tanınmış musiqi xadimləri professor Lyusi Düran və Ceyms Parkin, “Pan Rekords” kompaniyasının sahibi Bernard Kleykami, Şərq və Asiya musiqisinin Böyük Britaniyada təbliğçisi “Azian Serkyüt” kompaniyasının meneceri Viram Casani və digər tanınmış simalar qatılacaq. Sözügedən festival və simpozium sayəsində Azərbaycan muğamının daha da inkişaf edəcəyini vurğulayan F.Əlizadə paralel olaraq muğamın dünyada populyarlıq qazanacağını dilə gətirib.
Xatırladaq ki, mart ayının 20-də Beynəlxalq Muğam Mərkəzində təntənəli açılışı baş tutacaq “Muğam aləmi” I Beynəlxalq Muğam Festivalının prezidenti Heydər Əliyev Fondunun prezidenti, YUNESKO və İSESKO-nun xoşməramlı səfiri Mehriban xanım Əliyevadır. Heydər Əliyev Fondu, Mədəniyyət və Turizm Nazirliyi, Azərbaycan Bəstəkarlar İttifaqının təşkilatçılığı, Təhsil Nazirliyi, Azərbaycan Milli Elmlər Akademiyası və Azərbaycan Mədəniyyətinin Dostları Fondunun dəstəyi ilə reallaşacaq festival konsertlərində 10 ölkədən musiqiçilər çıxış edəcəklər. Konsertlər beş gün müddətində Beynəlxalq Muğam Mərkəzində keçiriləcək. Konsertlərdə Azərbaycan muğam ustalarının ifasında 7 əsas Azərbaycan muğamı ifa olunacaq. Festival çərçivəsində Azərbaycan Dövlət Filarmoniyasında keçiriləcək konsertlərdə Silvio Sergio Barbato və Fəxrəddin Kərimovun dirijorluğu ilə F.Əmirovun “Şur”, “Kürd Ovşarı”, “Gülüstan Bayatı-Şiraz” simfonik muğamları, Niyazinin “Rast” simfonik muğamı, o cümlədən, Aqşin Əlizadənin “Muğamvari” simfoniyası, Nazim Əliverdibəyovun “Bayatı-Şiraz” xor muğamı, Cahangir Cahangirovun “Füzuli” kantatası səsləndiriləcək. O ki qaldı Azərbaycan Dövlət Opera və Balet Teatrında Azərbaycan bəstəkarlarının muğam operalarına, tamaşaçılara ü.Hacıbəylinin “Leyli və Məcnun”, Z.Hacıbəyovun “Aşıq Qərib” operası təqdim olunacaq. Caz Mərkəzində isə etno-caz musiqisi axşamları planlaşdırılıb.
Onu da qeyd edək ki, I Beynəlxalq Muğam Festivalında iştirak etmək üçün YUNESKO-nun baş direktoru Koisiro Matsuura da Azərbaycana təşrif buyuracaq. Səfər çərçivəsində martın 19-da baş direktor YUNESKO-nun və İSESKO-nun xoşməramlı səfiri, millət vəkili Mehriban xanım Əliyeva ilə görüşəcək. O ki qaldı sözügedən festivalın təntənəli bağlanış mərasiminə, tədbir martın 25-də Heydər Əliyev Sarayında reallaşacaq.
Turanə QADİR

Paylaş:

Baxılıb: 1758 dəfə