AZƏRTAC ilə VNA arasında əməkdaşlıq Azərbaycan-Vyetnam münasibətlərinin inkişafına böyük töhfə verəcək

Bakı:

22 °C

70 %

11 m/s

AZ RU EN

Ana səhifə / Siyasət / AZƏRTAC ilə VNA arasında əməkdaşlıq Azərbaycan-Vyetnam münasibətlərinin inkişafına böyük töhfə verəcək

AZƏRTAC ilə VNA arasında əməkdaşlıq Azərbaycan-Vyetnam münasibətlərinin inkişafına böyük töhfə verəcək

04.03.2017 [10:42]

Son illərdə Azərbaycan ilə Vyetnam arasında bütün istiqamətlərdə, o cümlədən media sahəsində əməkdaşlıq inkişaf edir. Bu xüsusda AZƏRTAC ilə Vyetnam Xəbər Agentliyi (VNA) arasında imzalanmış əməkdaşlıq sazişi böyük əhəmiyyət kəsb edir.
Bu fikirlər Azərbaycanın Vyetnamdakı səfiri Anar İmanovun Vyetnam Xəbər Agentliyinin baş direktoru, Vyetnam Kommunist Partiyasının Mərkəzi Komitəsinin üzvü Nquyen Duk Loi ilə görüşündə səslənib. Görüşün məqsədi səfirliklə VNA arasında əməkdaşlıq məsələlərini müzakirə etmək olub. Bu barədə AZƏRTAC-a səfirlikdən məlumat verilib.
Səfir A.İmanov AZƏRTAC ilə VNA arasında əməkdaşlığın ölkələrimiz və xalqlarımız arasında dostluq münasibətlərinin inkişafına böyük töhfə verəcəyinə inandığını söyləyib. O, həmçinin səfirliyin Vyetnam KİV-ləri ilə, o cümlədən VNA-nın nəzdində fəaliyyət göstərən “Vietnam News” və “Vietnam Plus” qəzetləri ilə məhsuldar əməkdaşlığının qurulduğunu diqqətə çatdırıb. Səfir Vyetnam Xəbər Agentliyi ilə əməkdaşlığın daha da möhkəmləndirilməsinin önəmini qeyd edib. O, ölkəmizin tarixi, mədəniyyəti, sosial-iqtisadi inkişafı, Ermənistan-Azərbaycan, Dağlıq Qarabağ münaqişəsi barədə məlumatların müntəzəm olaraq Vyetnam ictimaiyyətinə çatdırılmasında VNA-nın kömək göstərməsini xahiş edib.
Nquyen Duk Loi Azərbaycan ilə Vyetnam arasında tarixən mövcud olan əməkdaşlığın müasir dövrdə də davam etdirilməsinin sevindirici hal olduğunu vurğulayıb. O, 2014-cü ildə Bakı Beynəlxalq Humanitar Forumunda və 2016-cı ildə Dünya Xəbər Agentliklərinin V Konqresində iştirak etmək məqsədilə Azərbaycana səfər etdiyini və ölkəmizdə gedən dinamik inkişafın onda böyük təəssürat yaratdığını söyləyib. Baş direktor AZƏRTAC ilə VNA arasında əməkdaşlıq sazişi imzalandıqdan sonra mütəmadi olaraq hər iki agentliyin informasiya mübadiləsi həyata keçirdiyini diqqətə çatdırıb. O, VNA-nın səfirliklə əməkdaşlığa hər zaman hazır olduğunu qeyd edib və bununla bağlı agentliyin nəzdində fəaliyyət göstərən KİV-lərə də lazımi tapşırıq veriləcəyini bildirib.
Görüşdə A.İmanov cari il sentyabrın 23-də Azərbaycanla Vyetnam arasında diplomatik əlaqələrin qurulmasının 25 ilinin tamam olduğunu söyləyib və bununla əlaqədar il ərzində müxtəlif tədbirlərin keçirilməsinin planlaşdırıldığını bildirib. Səfir bu tədbirlərin işıqlandırılmasında, eləcə də iki ölkə arasında dostluq münasibətlərinin tarixi, mövcud vəziyyəti haqqında ictimaiyyətin məlumatlandırılmasında KİV-lərin mühüm rol oynadığını qeyd edərək, VNA-nın məsələ ilə bağlı dəstəyini əsirgəməməsini xahiş edib. O, həmçinin diplomatik əlaqələrin qurulmasının 25 illiyi münasibətilə cari ilin sentyabr ayında Azərbaycanın xarici işlər nazirinin VNA-da, Vyetnam xarici işlər nazirinin isə AZƏRTAC-da müsahibələrinin yayılmasını təklif edib.
Nquyen Duk Loi diplomatik əlaqələrin qurulmasının 25 illiyi münasibətilə keçiriləcək tədbirlərin işıqlandırılmasında, iki ölkə arasında əlaqələr barədə məlumatların yayımlanmasında VNA-nın zəruri kömək göstərəcəyini bildirib. O, müsahibə ilə bağlı təklifi də müsbət qiymətləndirib.
Görüşdə səfirliklə VNA arasında əməkdaşlığın davam etdirilməsi barədə razılığa gəlinib.

Paylaş:

Baxılıb: 489 dəfə