Sərdar Cəlaloğlu: Ən müxtəlif ideologiyaya malik olan partiyaların Dağlıq Qarabağ məsələsində vahid mövqedən çıxış etməsi bütün dünyaya bir mesajdır

Bakı:

30 °C

47 %

3 m/s

AZ RU EN

Ana səhifə / Siyasət / Sərdar Cəlaloğlu: Ən müxtəlif ideologiyaya malik olan partiyaların Dağlıq Qarabağ məsələsində vahid mövqedən çıxış etməsi bütün dünyaya bir mesajdır

Sərdar Cəlaloğlu: Ən müxtəlif ideologiyaya malik olan partiyaların Dağlıq Qarabağ məsələsində vahid mövqedən çıxış etməsi bütün dünyaya bir mesajdır

08.10.2020 [09:28]

“Hesab edirəm ki, indiki məqamda bütün siyasi qüvvələr hər bir məsələyə işğal altında olan torpaqlarımızın azad edilməsi kontekstindən yanaşmalıdır. Çünki hərbi strategiyanın tərkibinə daxil olan elementlərdən biri döyüş ruhunun yüksək olması məsələsidir. Düzdür, döyüşdə sərkərdələrin istedadı, qabiliyyəti, əsgərlərin cəsarəti də vacibdir. Amma onlardan öndə gələn və vacib olan mənəvi-psixoloji cəhətdən ordunun döyüş ruhunun yüksək olmasıdır. Çünki əsgərlər həmin ruh yüksəkliyini orduya daşıyaraq qələbənin əsasını qoymuş olurlar. Orduda xidmət edənlərin xalqın içindən çıxan övladlarımız olduğunu nəzərə aldıqda, ilk növbədə, xalqın birliyi və həmrəyliyinin mühüm amil olduğu ortaya çıxır”.
Bu fikirləri Azərbaycan Demokrat Partiyasının (ADP) sədri Sərdar Cəlaloğlu deyib.
ADP sədrinin sözlərinə görə, ölkəmizdəki siyasi qüvvələrin, o cümlədən müxalifət partiyalarının indiki məqamda əsas vəzifəsi cəmiyyətdə qələbəyə inamın daha da gücləndirilməsi olmalıdır: “Bu məqsədə nail olmaq strateji cəhətdən, yəni qələbənin təmin olunması baxımından olduqca önəmlidir. Ona görə ki, xalqda birlik və həmrəyliyin, gələcəyə inamın yüksək olması zəfəri daha da yaxınlaşdıracaq. Bu mənada, əksər siyasi partiyaların birlik və həmrəylik nümayiş etdirməsi, vahid mövqedən çıxış etməsi Azərbaycan xalqının mənəvi gücünü qat-qat artırmış olur. Digər tərəfdən, bildiyimiz kimi, siyasi partiyaların hər biri müxtəlif, ayrı-ayrı ideologiyaların daşıyıcılarıdır. Ən müxtəlif ideologiyaya malik olan partiyaların Dağlıq Qarabağ məsələsində vahid mövqedən çıxış etməsi bütün dünyaya, beynəlxalq ictimaiyyətə bir mesajdır. Bütün dünyaya elan edilib ki, Vətən müharibəsi aparılan ölkədə fərqli mövqeyə yer yoxdur”.
“İndiyə qədər Dağlıq Qarabağ münaqişəsinin müharibə və ya sülh yolu ilə həll edilməsi məsələsində iqtidarla müxalifət arasında fərqli mövqedən çıxışların şahidi olsaq da, Azərbaycan Ordusunun əks-hücum əməliyyatlarından sonra nümayiş etdirilən həmrəylik və 50 siyasi partiyanın təmsilçilərinin iştirak etdiyi videokonfrans formatında keçirilən son tədbir məsələnin yalnız bir həll yolu olduğunu ortaya qoydu. Azərbaycanın siyasi qüvvələri bütün dünyaya elan etdi ki, Ermənistan öz işğalçılıq siyasətindən əl çəkmədiyi üçün problem yalnız müharibə yolu ilə həll edilməlidir. Bu gün haqlı olduğumuzu bütün dünyaya sübut etmək üçün siyasi qüvvələrin birmənalı şəkildə dövlətin yanında olması çox vacibdir”, - deyə S.Cəlaloğlu bildirib.
Partiya sədrinin sözlərinə görə, 50 siyasi partiya rəhbərinin videokonfrans formatında keçirilən son görüşü bir daha ümummilli məsələlərdə iqtidar və müxalifət arasında heç bir fikir ayrılığı olmadığını göstərib: “Azərbaycanda mövcud olan siyasi qüvvələrin vahid mövqedən çıxış etməsi, hakimiyyətə dəstək bəyanatı sübut etdi ki, siyasi partiyaların əksəriyyəti Azərbaycan xalqının, dövlətinin maraqlarına xidmət edir. Təbii ki, bu birliyin, həmrəyliyin əldə edilməsində ilin əvvəlindən aparılan siyasi dialoqun, Azərbaycanda yeni siyasi münasibətlər sisteminin formalaşmasına keçid prosesinin baş tutmasının rolunu da qeyd etmək lazımdır”.
Q.ZİYƏDDİNOĞLU

Paylaş:

Baxılıb: 460 dəfə