Ermənistanın mülki şəxslərə hücumları beynəlxalq təşkilatlar tərəfindən pislənilir

Bakı:

31 °C

41 %

3 m/s

Əlaqə

AZ RU EN

Ana səhifə / Siyasət / Ermənistanın mülki şəxslərə hücumları beynəlxalq təşkilatlar tərəfindən pislənilir

Ermənistanın mülki şəxslərə hücumları beynəlxalq təşkilatlar tərəfindən pislənilir

31.10.2020 [08:41]

Ekspertlərin fikrincə, “Amnesty International”, “Human Rights Watch” kimi təşkilatların Bərdəyə edilən hücumlarla bağlı yaydıqları açıqlamalar işğalçı dövlətin faşist və terrorçu mahiyyətini ifşa edir

Döyüş meydanında ağır məğlubiyyət yaşayan Ermənistanın Azərbaycanın cəbhə xəttindən uzaq ərazilərinə kasetli bombalarla hücum etməsi, dinc əhalini hədəfə alması beynəlxalq ictimaiyyət tərəfindən də pislənilməkdədir. Vurğulanmalıdır ki, Bərdə şəhərinə edilən hücumla bağlı artıq bir sıra tanınmış media resursları reportajlar hazırlayıb təqdim etməkdədirlər. Məsələn, Ermənistan silahlı qüvvələri tərəfindən Azərbaycanın Bərdə şəhərində yaşayış məntəqələrinə hücum zamanı kasetli bombalardan istifadə edilməsi barədə xəbər “VICE News” kanalının jurnalistləri tərəfindən də beynəlxalq ictimaiyyətə çatdırılıb. Kanalın əməkdaşı Hind Hassan rəsmi “İnstagram” hesabında bildirib ki, Bərdə şəhərində raket zərbələri yaşayış evlərinə endirilib.

Eləcə də bir sıra beynəlxalq təşkilatlar - “Amnesty International”, “Human Rights Watch” təşkilatları bununla bağlı açıqlamalar yayıblar. Bu açıqlamalarda qadağan edilmiş silahlardan istifadə və mülki əhaliyə qarşı olan hücumların yolverilməzliyi yer alıb. Qeyd etmək lazımdır ki, Ermənistanın Azərbaycanın mülki vətəndaşlarına qarşı apardığı terror siyasətinə dünya ictimaiyyətinin diqqət yetirməsi, bununla bağlı konkret mövqe səsləndirməsi Prezident İlham Əliyevin apardığı xarici siyasət kursunun uğurudur. Sentyabrın 27-dən başlayaraq ölkə başçısının münaqişənin mahiyyəti, Azərbaycanın haqlı mövqeyi, qarşı tərəfin müharibə cinayətlərinə əl atması ilə bağlı xarici KİV-lərə verdiyi müsahibələr, səsləndirdiyi fikirlər ermənilərin illərdir apardığı yalan təbliğatı darmadağın edib. Bunun nəticəsidir ki, bu gün beynəlxalq aləm Dağlıq Qarabağda baş verənlər və xalqımıza qarşı törədilən cinayətlər haqqında obyektiv münasibət sərgiləyir.

Məsələ ilə bağlı fikirlərini bölüşən Milli Məclisin deputatı Elşad Mirbəşir bildirib ki, Azərbaycan Ordusunun həyata keçirdiyi uğurlu əks-hücum əməliyyatları qısa zamanda işğal altındakı torpaqlarımızın azad olunmasını təmin edib. E.Mirbəşir döyüş meydanında uduzan işğalçı ölkənin mülki vətəndaşları hədəfə almasını, Gəncə, Bərdə, Mingəçevir şəhərinə, o cümlədən cəbhə xəttindən kənardakı digər regionlarımıza olunan hücumları müharibə cinayəti adlandırıb: “Artıq bir neçə təşkilat bununla bağlı mövqeyini açıqlayıb. “Amnesty International”, “Human Rights Watch” təşkilatları Ermənistanın Azərbaycanın Bərdə şəhərinə istifadəsi qadağan olunmuş kasetli raketlərlə zərbələr endirdiyini təsdiqləyib. Onların bu barədə yaydıqları açıqlamalarda bu hücumlar nəticəsində qətlə yetirilən şəxslərin siyahısı qeyd edilib və kasetli sursatlardan mülki əhaliyə qarşı istifadə etmək amansızlıq və məsuliyyətsizlik adlandırılıb. Beynəlxalq təşkilatların sərgilədiyi bu mövqe Azərbaycan Prezidentinin Ermənistan üzərindəki növbəti qələbəsi hesab edilməlidir. Sentyabrın 27-dən indiyə qədər çoxsaylı xarici KİV-lərə müsahibələr verən Azərbaycan Prezidenti öz yüksək intellekti, peşəkar siyasi bacarığı ilə bütün dünyanın diqqətini münaqişənin mahiyyətinə cəlb edə bilib. Artıq dünya birliyi, beynəlxalq təşkilatlar Azərbaycanın ərazi bütövlüyünün təmini ilə bağlı məsələdə bizimlə eyni mövqedən çıxış edir. Bu uğurlar cənab Prezidentimizin apardığı siyasətin nəticələridir. İnanırıq ki, yaxın zamanda qələbəmiz tam təmin ediləcək və işğal altındakı bütün torpaqlarımız azadlığa qovuşacaq”.

“Hüquqi Təhlil və Araşdırmalar” İctimai Birliyinin sədri Ramil İsgəndərli də Azərbaycan dövlətinin öz ərazi bütövlüyünün təmini uğrunda apardığı mübarizənin beynəlxalq hüququn prinsip və normalarına uyğun olduğunu diqqətə çatdırıb. R.İsgəndərli bildirib ki, beynəlxalq birliyin, hüquq müdafiə təşkilatlarının münaqişə ilə bağlı səsləndirdikləri fikirlərdə, yaydıqları bəyanatlarda Azərbaycanın haqlı mövqeyi dəstəklənir. R.İsgəndərli onu da qeyd edib ki, “Amnesty International”, “Human Rights Watch” kimi təşkilatların Bərdə şəhərinə edilən hücumlarla bağlı açıqlamalar yayması, mülki əhalinin hədəfə alındığını və qadağan edilən silahlardan istifadə olunduğunu təsdiqləməsi artıq işğalçı Ermənistanın bütün platformalarda Azərbaycana uduzduğunu deməyə əsas verir: “Milli Ordumuz cəbhə xəttində düşmənə ağır zərbələr endirir, torpaqlarımız işğaldan azad olunur. Bununla paralel olaraq Azərbaycan Prezidentinin rəhbərliyi ilə aparılan uğurlu siyasət digər platformalarda da qələbəmizi şərtləndirir. Artıq beynəlxalq təşkilatlar Ermənistanın dinc insanlara qarşı apardığı terror hərəkətlərini pisləyir. Bu, böyük uğurdur və bu uğurun memarı cənab Prezidentimizdir. Dövlət başçısının səsləndirdiyi hər bir fikir yüksək faktoloji əhəmiyyət daşıyır və arqumentləşdirilib. İnanırıq ki, bütün platformalarda atılan davamlı addımlar yaxın zamanda torpaqlarımızın işğaldan azad olunmasını təmin edəcək”.

Pərviz SADAYOĞLU

Paylaş:

Baxılıb: 448 dəfə