Sülh məramlarını unutmamalıdırlar

Bakı:

22 °C

43 %

8 m/s

Əlaqə

AZ RU EN

Ana səhifə / Siyasət / Sülh məramlarını unutmamalıdırlar

Sülh məramlarını unutmamalıdırlar

25.11.2022 [10:32]

Ermənistanın Azərbaycan ərazisinə hərbi texnikalar daşıması birgə bəyanata ziddir

2020-ci ildə imzalanan üçtərəfli Bəyanat Vətən müharibəsində Azərbaycanın qələbəsini rəsmiləşdirdi. Bununla yanaşı, məğlub Ermənistan bu bəyanata əsasən üzərinə bir sıra öhdəliklər götürüb. Təssüfləndirici haldır ki, münaqişənin bitməsindən ötən iki il ərzində bu öhdəliklərin bəziləri yerinə yetirilməyib. Tam əksinə, Ermənistan yenidən regionda təhlükəsizliyə təhdid yaratmaqda davam edir. Eyni zamanda, üçtərəfli Bəyanata əsasən, regiona gələn Rusiyanın sülhməramlı kontingenti də prosesin məhz razılaşdırılmış formada inkişafını təmin etmir.

Yeri gəlmişkən, noyabrın 23-də Dövlət Təhlükəsizliyi Xidmətinin (DTX) Heydər Əliyev adına Akademiyasının “Şöhrət” muzeyində Azərbaycan Respublikasının Təhlükəsizlik Şurası Katibinin Xidmətinin təşkilatçılığı ilə keçirilən “Vətən müharibəsinin təcrübələri” mövzusunda konfransda da bu məsələyə toxunulub. Çıxış edən DTX-nin rəisinin birinci müavini, general-leytenant Ceyhun Şadlinski qeyd edib ki, iki ölkə arasında münasibətlərin normallaşdırılması istiqamətində görülən işlərə Ermənistandakı revanşist qüvvələrin hər vəchlə maneçilik törətməyə çalışması, bu ölkənin silahlanmaya və ordu quruculuğuna öz imkanlarından artıq maliyyə vəsaiti ayırması, müxtəlif xarici dövlətlərdən müasir silahlar və hərbi təyinatlı avadanlıqlar almağa cəhdlər göstərməsi, sülh müqaviləsinin imzalanmasını bütün mümkün vasitələrdən istifadə etməklə yubatmağa meyil etməsi narahatlıq doğuran məqamlardır. O, vurğulayıb ki, Rusiya sülhməramlı kontingentinin müvəqqəti yerləşdiyi Azərbaycan ərazisinə hərbi texnikaların daşınması, orada müxtəlif təxribat xarakterli tədbirlərin keçirilməsinə şərait yaradılması da xüsusilə diqqət çəkir.

Təbii ki, səslənən narahatlıqlar əbəs deyil. İmzalanan üçtərəfli Bəyanata əsasən öhdəliklərin yerinə yetirilməməsi beynəlxalq hüquqa zidd bir mövqedir. Belə olan halda, Azərbaycan hansı qabaqlayıcı tədbirlər görə bilər?

Məsələ ilə bağlı fikirlərini bölüşən politoloq İlyas Hüseynov bildirib ki, 2020-ci il noyabrın 10-da imzalanan üçtərəfli birgə Bəyanatın 4-cü maddəsinə əsasən Azərbaycan ərazisinə Rusiya sülhməramlı kontingenti daxil olmalı, Ermənistan silahlı qüvvələrinin bölmələri isə regionu tərk etməli idilər. Təəssüflər olsun ki, bu maddə hələ də icra edilməmiş qalır: “Bu isə sülhə və təhlükəsizliyə böyük təhdid törədir. Xatırlatmaq yerinə düşər ki, Rusiyanın müdafiə nazirliyinin təmsilçiləri Bakıda səfərdə olarkən bu maddənin icrası ilə bağlı məsələyə də münasibət bildirmişdilər və qeyd olunmuşdu ki, bu, yaxın zamanda baş verəcək. Hətta bununla bağlı vaxt da vermişdilər. Lakin həmin vəd yerinə yetirilmədi. Bu gün Ermənistan silahlı qüvvələrinin nizami ordusunun Azərbaycan torpaqlarında olması ilə yanaşı, Laçın dəhlizi vasitəsilə qeyri-qanuni silah daşınmasının həyata keçirildiyinin şahidi oluruq. Təkcə bir faktı qeyd etmək lazımdır ki, Azərbaycan işğaldan azad edilmiş ərazilərdə möhkəmlənmə işləri apararkən, infrastruktur layihələri icra edərkən Ermənistan istehsalı olan minalara rast gəlinib. Bu minalar həm də 2021-ci ilin istehsalıdır. Bütün bunlar isə bu kimi qanunsuzluğun yaranmasına şəraitin də formalaşdırıldığını deməyə əsas verir. Burada bütün məsuliyyət Rusiyanın sülhməramlı kontingentinin üzərinə düşür. Çünki Rusiya tərəfi və prezidenti üçtərəfli birgə Bəyanatın icrasına əsas qarant sayılır”.

Politoloqun sözlərinə görə, məhz bu səbəbdən artıq DTX mənsubları da üçtərəfli birgə Bəyanatın bu maddəsinə diqqət çəkirlər. İ.Hüseynovun fikrincə, bu çox doğru yanaşmadır. “Regional təhlükəsizliyin qorunması həm də beynəlxalq təhlükəsizliyə töhfədir. Azərbaycan uzun müddətdir ki, beynəlxalq sülhün və təhlükəsizliyin təmin olunmasında çoxşaxəli fəaliyyəti və səyi ilə seçilir. Ermənistanın destruktiv mövqeyi və onun arxasında duran qüvvələrin buna şərait yaratması isə Azərbaycanı da adekvat addımlar atmağa sövq edir. Rəsmi Bakı BMT nizamnaməsinin 51-ci maddəsinə istinad edərək özünümüdafiə hüququ əsasında kompleks tədbirlər həyata keçirə bilər. Bu hüququ Azərbaycan öz əlində saxlayır. Heç bir dövlət, heç bir güc, heç bir geosiyasi mərkəz bunu unutmamalıdır. Azərbaycanın Vətən müharibəsində qazandığı təcrübə, ordumuzun peşəkarlığı, hərbi kadrlarımızın səriştəsi qarşıya qoyulan bütün hədəflərə çatmağa imkan verir”, -deyə İ.Hüseynov əlavə edib.

P.İSMAYILOV

Paylaş:

Baxılıb: 669 dəfə