Suveren və legitim hüququmuzdur

Bakı:

20 °C

82 %

15 m/s

Əlaqə

AZ RU EN

Ana səhifə / Siyasət / Suveren və legitim hüququmuzdur

Suveren və legitim hüququmuzdur

26.04.2023 [11:02]

Xarici İşlər Nazirliyi Ermənistana və onun havadarlarına cavab verdi

Nardar BAYRAMLI

Azərbaycanla Ermənistanın şərti dövlət sərhəddində, Laçın-Xankəndi yolunun başlanğıcında dövlətimiz tərəfindən sərhəd nəzarət-buraxılış məntəqəsinin yaradılması rəsmi İrəvanı və onun havadarlarını ciddi şəkildə “narahat” edib. Ermənistan Xarici İşlər Nazirliyi bəyanat yayaraq Laçın yolunda nəzarət-buraxılış məntəqəsinin yaradılmasının guya 10 noyabr üçtərəfli bəyanatına və Beynəlxalq Ədalət Məhkəməsinin qərarına zidd olduğunu iddia edib. Rəsmi İrəvan dolayısı ilə bu hadisəyə görə Rusiyanı ittiham edərək Moskvanı “dəhlizin qanunsuz blokadasını aradan qaldırmağa” çağırıb.

Ermənistanın Laçın yolunda qanunsuz əməlləri

Azərbaycanın Xarici İşlər Nazirliyi (XİN) isə öz bəyanatında Ermənistanın iddialarının əsassız olduğunu vurğulayıb. Bildirilib ki, Azərbaycan Hökuməti Ermənistan tərəfinin Laçın-Xankəndi yolundan 2020-ci il 10 noyabr tarixli üçtərəfli Bəyanata zidd şəkildə sistemli və genişmiqyaslı qanunsuz məqsədlər üçün sui-istifadənin davam etdiyini və bundan qaynaqlanan təhlükəsizlik hədələrini nəzərə alaraq, Azərbaycan ilə Ermənistan arasında sərhəddə yolun başlanğıcında nəzarətin təmin edilməsi məqsədilə müvafiq tədbirlər həyata keçirib: “Məlum olduğu kimi, üçtərəfli Bəyanatın imzalanmasından keçən iki il yarım müddət ərzində Azərbaycan tərəfi davamlı şəkildə Laçın yolunun Ermənistan tərəfindən genişmiqyaslı sui-istifadə hallarına diqqəti cəlb edib. Bu cür sui-istifadə hallarına Azərbaycan ərazisində qalmaqda davam edən erməni silahlı qüvvələrinin şəxsi heyətinin rotasiyası, silah və sursatın daşınması, terrorçuların keçidi, habelə təbii sərvətlərin və mədəni mülkiyyətin qanunsuz daşınmasını misal göstərmək olar. Yoldan minaların daşınaraq sonradan Azərbaycan Respublikasının suveren ərazilərində basdırılması xüsusilə ağır fəsadlar doğurur. 2022-ci ilin avqust ayından etibarən Laçın və Kəlbəcər rayonlarının ərazisində 2021-ci il Ermənistan istehsalı olan 2700-dən çox piyada əleyhinə mina aşkar edilib. Aydındır ki, bu minalar üçtərəfli Bəyanata zidd olaraq Azərbaycan ərazisinə məhz Laçın yolu vasitəsilə daşınıb. Sonuncu dəfə 2023-cü il aprelin 22-də Azərbaycan Ordusunun hərbi yük maşını ermənilər tərəfindən basdırılmış 2021-ci il istehsalı minaya düşərək partlayıb və 3 hərbi qulluqçumuz yaralanıb. Müharibənin sonundan etibarən 294 azərbaycanlı mina qurbanı olub”.

Bununla yanaşı, bəyanatda qeyd edilib ki, aprelin 22-də Ermənistana məxsus yük avtomobilləri ilə iki ədəd hərbi məqsədlər üçün yaşayış konteynerlərinin və hərbi avtomobillər konvoyunun üçtərəfli Bəyanata və beynəlxalq hüququn norma və prinsiplərinə zidd olaraq Azərbaycan ərazisinə keçirildiyi Azərbaycan Müdafiə Nazirliyinin müşahidə kameraları tərəfindən qeydə alınıb. Daha sonra Ermənistan tərəfindən Laçın-Xankəndi yolunun başlanğıcında Azərbaycan ərazisinə ən yaxın məntəqədə hərbi yaşayış konteynerlərinin yerləşdirilməsi və hərbi infrastruktur qurmaq fəaliyyəti müşahidə edilib. Qeyd edilən təhdidlər və təxribatlar nəzərə alınaraq Laçın yolunun başlanğıcında sərhəd-nəzarət mexanizminin təsis edilməsi yoldan hərəkət üzrə şəffaflığı, qanunun aliliyini və beləliklə, hərəkətin təhlükəsizliyini təmin edəcək. Sərhəd təhlükəsizliyinin təmin edilməsi, habelə hərəkətin təhlükəsizliyinin həyata keçirilməsi Azərbaycan Hökumətinin preroqativi və milli təhlükəsizlik, dövlət suverenliyi, qanunun aliliyi üçün zəruri şərtdir.

Müvafiq şərait yaradılacaq

“Üçtərəfli Bəyanat üzrə öhdəliklərə uyğun olaraq Laçın yolundan vətəndaşların, nəqliyyat vasitələrinin və yüklərin hərəkətinə Azərbaycan Respublikası tərəfindən təhlükəsizlik zəmanəti olan bu əlavə tədbir çərçivəsində Azərbaycanın Qarabağ bölgəsində yaşayan erməni sakinlərin bu məntəqədən hər iki istiqamətdə Ermənistana və Azərbaycana şəffaf və nizamlanan keçidi üçün müvafiq şərait yaradılacaq. Yuxarıda qeyd edilən nəzarət mexanizmi Rusiya sülhməramlı kontingenti ilə əlaqələndirmə şəraitində həyata keçiriləcək. Azərbaycan tərəfi Ermənistanla birgə sərhəddə nəzarət-sərhəd rejiminin şəffaf və təhlükəsiz fəaliyyəti naminə əməkdaşlığa hazır olduğunu bildirir”-deyə XİN-in bəyanatında vurğulanıb.

Fransanın iddiaları əsassızdır

Ermənistanın havadarlarına gəlincə, Fransanın Avropa və Xarici İşlər Nazirliyinin bəyanatında bildirilir ki, Paris Azərbaycanın Laçın dəhlizinin girişində nəzarət-buraxılış məntəqəsi qurmasını “pisləyir, bunun atəşkəs sazişi çərçivəsində götürülmüş öhdəliklərə zidd olduğunu və danışıqlar prosesinə zərər verdiyini hesab edir”. Fransa rəsmi Bakını “beynəlxalq öhdəliklərinə riayət etməyə, xüsusən Beynəlxalq Ədalət Məhkəməsinin 22 fevral tarixli qərarında qeyd edilmiş, məcburi olan müvəqqəti tədbirləri həyata keçirməyə” çağırıb. Ölkəmizin Fransanın iddialarına cavabı gecikməyib. Belə ki, Xarici İşlər Nazirliyinin mətbuat katibi Ayxan Hacızadə bununla bağlı deyib ki, Fransa Avropa və Xarici İşlər Nazirliyinin mətbuat katibi Ann-Kler Lejandr tərəfindən verilmiş bəyanat tamamilə əsassızdır. Onun sözlərinə görə, Azərbaycan tərəfindən öz suveren ərazisində sərhəd nəzarət-buraxılış məntəqəsi təsis edilməsi ölkəmizin suveren və legitim hüququdur: “Guya bu addımın üçtərəfli Bəyanata, hər hansı bir beynəlxalq sənədə və ya məhkəmə qərarına zidd olduğu iddiasının heç bir əsası yoxdur. Azərbaycan hər zaman olduğu kimi, öz öhdəlikləri çərçivəsində Laçın-Xankəndi yolunda hərəkət edən vətəndaşların, nəqliyyat vasitələrinin və yüklərin təhlükəsizliyinə zəmanət verir və bu istiqamətdə müvafiq tədbirləri davam etdirəcək”. Azərbaycan bölgədə sülh, sabitlik və inkişafın təmin edilməsində maraqlıdır. Dövlətimiz ərazi bütövlüyü və suverenlik kimi beynəlxalq hüquq prinsiplərinə hörmət əsasında Ermənistanla münasibətlərin normallaşdırılmasının tərəfdarıdır. Fransa isə bu kimi birtərəfli mövqe sərgiləməklə prosesə mane olmamalıdır.

Paylaş:

Baxılıb: 556 dəfə