BSU-da “Xəlifə günü”

Bakı:

33 °C

34 %

5 m/s

Əlaqə

AZ RU EN

Ana səhifə / Sosial / BSU-da “Xəlifə günü”

BSU-da “Xəlifə günü”

16.12.2014 [09:45]

Bakı Slavyan Universiteti (BSU) yarandığı gündən bir çox maraqlı layihələr həyata keçirir ki, bunlardan biri də “Bir günlük Xəlifə” özünüidarəetmə günüdür. Xatırladaq ki, bu layihə Azərbaycanın ali təhsil ocaqları arasında yeganə olaraq BSU-da 2002-ci ildən etibarən hər ilin 13 dekabr tarixində həyata keçirilir. Belə ki, məhz həmin gün universitetin rektor, prorektor, dekan və s. rəhbər vəzifələrində tələbələr tərəfindən səsvermə yolu ilə seçilmiş “xəlifə”lər fəaliyyət göstərirlər. Həmin “xəlifə”lər bir günlük universitetdə tədris prosesi, inzibati və s. işlərlə bağlı qərarlar qəbul edə, həmçinin, yeniliklər həyata keçirə bilərlər. “Xəlifə”lərin qəbul etdiyi qərarlar tam olaraq hüquqi qüvvəyə malik olur. Onu da qeyd edək ki, “xəlifə”lər 13 dekabrdan sonra “Kölgə kabineti” tərkibində bir il müddətində seçildikləri rəhbər vəzifələrini davam etdirirlər.
Ötən illərdən fərqli olaraq bu il “Xəlifə günü” dekabrın 15-nə təsadüf edib. Öncəliklə “xəlifə”lərin iş günü ali təhsil ocağının foyesində yerləşən Ümummilli lider Heydər Əliyevin büstü önünə əklil və gül dəstələri qoymaqla başlayıb. Sonra “xəlifə”lər, BSU, BDU və ADU-nun Beynəlxalq münasibətlər fakültələrində təhsil alan tələbələrin iştirakı ilə “Beynəlxalq münasibətlərin tarixi və hazırkı zamanda elmi baxış nəzərindən tədrisi” mövzusunda “dəyirmi masa” keçiriblər.
Növbəti tədbir ali təhsil müəssisəsi nəzdində fəaliyyət göstərən Türkiyə Araşdırmaları Mərkəzində baş tutub. Türkiyə səfirliyinin müşaviri Abdülqaffar Büyükfırat tələbələrlə görüşüb. Görüş çərçivəsində “Bir millət, iki dövlət” adlı qısametrajlı film nümayiş olunub.
“Xəlifə günü” Ukrayna Respublikasının Azərbaycandakı Fövqəladə və Səlahiyyətli səfiri Aleksandr Pavloviç Mişşenko BSU-nun Ukrayna Tədris-Mədəniyyət Mərkəzində tələbələrlə görüşüb.
Çexiya Respublikasının Azərbaycandakı səfirliyinin nümayəndəsi, xanım Branislava Vaqnerova ali təhsil ocağının qonağı olub və tələbələrlə Çexiyanın iqtisadiyyatı, mədəniyyət və incəsənəti haqqında maraqlı söhbət aparıb. Görüş zamanı görkəmli çex rəssamı Alfonso Maria Muchoya həsr olunmuş prezentasiya keçirilib. Magistratura şöbəsində qonaq olan Azərbaycan Respublikasının Prezidenti yanında Bilik Fondunun icraçı direktoru Oktay Səmədov və tanınmış kulturoloq, professor Fuad Məmmədovla “Pulla alına bilməyən dəyərlər” mövzusunda disput-klubda görüş keçirilib. “Bədən dilimiz nədən bəhs edir” psixoloji seminarında jurnalist Rövşən Məmmədov və psixoloq Fidan Ağayeva magistrant və tələbələrlə maraqlı diskussiyalar aparıblar.
“Xəlifə günü” çərçivəsində Oxford Universitetində təhsil alan azərbaycanlı tələbələrlə BSU tələbələrinin görüşü yaddaqalan olub.
Daha sonra isə “Xəlifə günü” çərçivəsində bir sıra digər maraqlı tədbirlər də keçirilib.

Paylaş:

Baxılıb: 1019 dəfə