Dünənim, bu günümsən, səninlədir gələcək...

Bakı:

28 °C

36 %

5 m/s

Əlaqə

AZ RU EN

Ana səhifə / Sosial / Dünənim, bu günümsən, səninlədir gələcək...

Dünənim, bu günümsən, səninlədir gələcək...

09.05.2018 [17:15]

Tarixdə elə şəxsiyyətlər var ki, illər ötdükcə, zaman keçdikcə o, özünün bütün böyüklük və əzəməti ilə sanki yenidən doğulur, yenidən dünyaya gəlib müasirimizə çevrilir və onun göstərdiyi yol, verdiyi məsləhətlər sanki bir kompas kimi bizə istiqamət verir, çıraq kimi qaranlıqlara işıq tutur. Əməlləri ilə xalqımızın tarixinə öz adını əbədi olaraq həkk etmiş dünya şöhrətli siyasətçi, müdrik və uzaqgörən dövlət rəhbəri Heydər Əliyev məhz belə şəxsiyyətlərdəndir. Ən çətin, taleyüklü və həlledici məqamlarda Onun ağır məsuliyyət yükünü üzərinə götürərək xilaskar rolunu oynamağı millətin nicatı və xoşbəxtliyi, eyni zamanda belə bir dühaya sahib olmağı xalqın sərvətidir.
AZƏRTAC xəbər verir ki, Azərbaycan Tibb Universitetində Ulu öndər Heydər Əliyevin anadan olmasının 95 illiyinə həsr olunmuş tədbir keçirilib.
Tədbiri giriş sözü ilə açan universitetin rektoru, professor Gəray Gəraybəyli xalqımızın Ümummilli lideri Heydər Əliyevin respublikamıza rəhbərlik etdiyi dövrdə onu geridə qalmış aqrar ölkədən qabaqcıl texnologiya, sənaye və mədəniyyət ölkəsinə çevirməsi, ötən əsrin 90-cı illərində ikinci qayıdışında isə müstəqilliyin möhkəmləndirilməsi, əbədi və dönməz xarakter alması yolunda çəkdiyi zəhmət, göstərdiyi çox böyük xidmətlərdən bəhs edib. O, qeyd edib ki, məhz Onun diqqət və qayğısı sayəsində ölkəmizdə yüzlərlə xəstəxana, klinika, müalicə müəssisəsi yaradılıb, yeni tibbi texnologiyalar səhiyyə ocaqlarının istifadəsinə verilib.
“Heydər Əliyev xalqımızın dünəninin, bu gününün qurucusu, gələcəyinin qarantıdır. O, özünün xilaskarlıq missiyasını yerinə yetirərək Azərbaycanı 90-cı illərin ağır siyasi və hakimiyyət böhranından xilas etdi, yeni neft müqavilələri imzaladı, Onun təşəbbüsü ilə paytaxtımızda çoxlu iqtisadi və mədəni tədbirlər keçirildi. Ulu öndərin apardığı müdrik və gələcəyə hesablanmış siyasətlə dünyanın bütün diqqətinin ölkəmizə yönəlməsinə nail oldu”, - deyə çıxış edən Yeni Azərbaycan Partiyası Nəsimi rayon təşkilatının sədri, Milli Məclisin deputatı Məlahət İbrahimqızı bu böyük şəxsiyyətin xalqımız, millətimiz qarşısındakı əvəzsiz xidmətlərini yada salıb. O, Ulu öndərlə bir dövrdə yaşadığı üçün özünün iftixar hissi keçirdiyini, bugünkü orta nəslin isə belə müdrik şəxsin müasiri olduğu üçün fəxr etməyə haqqı olduğunu söyləyib.
Universitetin I daxili xəstəliklər kafedrasının dosenti Nağdəli Zamanov dahi rəhbərin tibb ictimaiyyəti, həkimlərlə keçirdiyi görüşlər barədə danışıb və həmin tədbirlərdə xalqımızın böyük oğlunun verdiyi məsləhət və tövsiyələri xatırladıb.
Tibb Universitetinin tələbəsi Pəri Məhərrəmova Ulu öndərin təhsilə, gənc kadrların, xüsusilə tibb mütəxəssislərinin hazırlığına böyük əhəmiyyət verdiyi, yetişməkdə olan nəslin varislik, ata-babaların ən yaxşı adət-ənənələri ruhunda tərbiyə olunmasına göstərdiyi diqqət və qayğı barədə danışıb.
Tədbirdə Ümummilli lider haqqında çəkilmiş film nümayiş olunub.

Paylaş:

Baxılıb: 463 dəfə