Laos nümayəndə heyəti Azərbaycanda qadın və uşaq hüquqlarının müdafiəsi ilə bağlı görülən işlər barədə məlumatlandırılıb

Bakı:

21 °C

60 %

3 m/s

AZ RU EN

Ana səhifə / Sosial / Laos nümayəndə heyəti Azərbaycanda qadın və uşaq hüquqlarının müdafiəsi ilə bağlı görülən işlər barədə məlumatlandırılıb

Laos nümayəndə heyəti Azərbaycanda qadın və uşaq hüquqlarının müdafiəsi ilə bağlı görülən işlər barədə məlumatlandırılıb

23.05.2018 [09:50]

Mayın 22-də Ailə, Qadın və Uşaq Problemləri üzrə Dövlət Komitəsinin sədri Hicran Hüseynova Laos Xalq İnqilabı Partiyası Mərkəzi Komitəsinin xarici əlaqələr komitəsinin sədri xanım Sounton Sayaçakın rəhbərlik etdiyi nümayəndə heyəti ilə görüşüb.
AZƏRTAC xəbər verir ki, görüşdə Hicran Hüseynova iqtidar partiyaları olan Yeni Azərbaycan Partiyası (YAP) və Laos Xalq İnqilabı Partiyası arasında əməkdaşlığı yüksək dəyərləndirib. Bildirib ki, hər iki partiya qadınların ictimai fəallığına daim dəstək verir.
Bu il ölkəmizdə bir sıra önəmli tarixlərin qeyd olunduğunu bildirən Hicran Hüseynova müsəlman Şərqində ilk demokratik respublika olan Azərbaycan Xalq Cümhuriyyətinin 100 illik tarixindən danışıb. O, Azərbaycanda hətta bir sıra Avropa ölkələrindən əvvəl qadınlara səsvermə hüququnun verilməsinin önəmini qeyd edib. Ümummilli lider Heydər Əliyevin Azərbaycanda qadın hərəkatına daim dəstək verdiyini vurğulayan komitə sədri bu gün bu siyasətin Prezident İlham Əliyev tərəfindən uğurla davam etdirildiyini diqqətə çatdırıb.
Söhbət zamanı nümayəndə heyətinə Ailə, Qadın və Uşaq Problemləri üzrə Dövlət Komitəsinin gördüyü işlər və qurumun beynəlxalq əlaqələri haqqında da məlumat verilib. H.Hüseynova Xocalı soyqırımı törədilən zamanı ermənilər tərəfindən qəddarlıqla öldürülən uşaqlara dair kitabı Sounton Sayaçaka təqdim edib.
Komitə sədri ölkəmizdə qadın və uşaq hüquqlarının müdafiəsi məsələsinin prioritet istiqamətlərdən olduğunu deyib. O, Prezident İlham Əliyevin və Birinci vitse-prezident Mehriban Əliyevanın diqqət və qayğısı sayəsində bu gün ölkəmizdə qadın və uşaq hüquqlarının müdafiəsi sahəsində mühüm addımların atıldığını qeyd edib.
Laos Xalq İnqilabı Partiyası Mərkəzi Komitəsinin xarici əlaqələr komitəsinin sədri Sounton Sayaçak Azərbaycan Xalq Cümhuriyyətinin 100 illik yubileyi münasibətilə təbriklərini çatdırıb. O, ötən gün Yeni Azərbaycan Partiyası ilə Laos Xalq İnqilabı Partiyası arasında əməkdaşlığa dair Memorandumun imzalanmasının əhəmiyyətini vurğulayıb.
Sounton Sayaçak bildirib ki, vaxtilə Bakıda təhsil almış laoslular sırasında o, özü də olub. Qeyd edib ki, həmin vaxtdan keçən illər ərzində Bakı çox dəyişib və daha da gözəlləşib. O, Azərbaycanın dinamik inkişafının Laos xalqını sevindirdiyini söyləyib. Vurğulayıb ki, Laos və Xalq İnqilabı Partiyası Mərkəzi Komitəsi Azərbaycan ilə hərtərəfli əməkdaşlıqda maraqlıdır.
Görüşdə qadın və uşaq hüquqlarının müdafiəsi, gender bərabərliyinin təmini, həyata keçirilən müvafiq layihələrdə səmərəliliyin artırılması ilə bağlı müzakirələr aparılıb.
YAP-ın Beynəlxalq əlaqələr şöbəsinin müdiri, Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva görüşdə iştirak edib.

Paylaş:

Baxılıb: 794 dəfə