Əmək və Əhalinin Sosial Müdafiəsi naziri AMEA-nın əməkdaşları ilə görüşüb

Bakı:

22 °C

64 %

5 m/s

Əlaqə

AZ RU EN

Ana səhifə / Sosial / Əmək və Əhalinin Sosial Müdafiəsi naziri AMEA-nın əməkdaşları ilə görüşüb

Əmək və Əhalinin Sosial Müdafiəsi naziri AMEA-nın əməkdaşları ilə görüşüb

18.01.2020 [11:09]

AMEA-nın Rəyasət Heyətində akademiya əməkdaşlarının Əmək və Əhalinin Sosial Müdafiəsi naziri Sahil Babayevlə görüşü keçirilib.
Akademiyadan AZƏRTAC-a bildirilib ki, tədbiri giriş sözü ilə açan AMEA-nın prezidenti, akademik Ramiz Mehdiyev Prezident İlham Əliyev tərəfindən ölkədə bütün sahələrdə olduğu kimi, əhalinin sosial müdafiəsi sahəsinə də böyük diqqət yetirildiyini xüsusi qeyd edib, bugünkü görüşün sosial sahəyə həsr olunduğunu söyləyib.
Sonra nazir Sahil Babayev rəhbərlik etdiyi qurumun fəaliyyəti haqqında məruzə ilə çıxış edib. Bildirib ki, ötən il sosial sahə üçün islahatlar ili adlandırıla bilər, həmin islahatlar ölkə əhalisinin 42 faizinə, yəni, 4,2 milyon insanın rifahına ciddi dəstək olub. Nazir 2019-cu ildə minimum əməkhaqqının iki dəfəyə yaxın və minimum pensiyanın 72,4 faiz artırıldığını diqqətə çatdırıb. O, minimum pensiya məbləğinin alıcılıq qabiliyyəti indeksinə görə Azərbaycanın MDB ölkələri sırasında birinci, minimum əməkhaqqı məbləğinin alıcılıq qabiliyyəti indeksinə görə isə ikinci yerə yüksəldiyini qeyd edib: “Ötən il ərzində aparılan pensiya islahatları nəticəsində orta aylıq pensiya məbləği 15 faiz, o cümlədən yaşa görə orta aylıq pensiya məbləği də 15 faiz, əlilliyə görə orta aylıq pensiya məbləği isə 22 faiz artırılıb. Bundan əlavə, keçən ilin əvvəlindən pensiya təyinatı, həmçinin 19 növ müavinət-təqaüd təyinatı avtomatlaşdırılıb”.
Sahil Babayev vətəndaşların rifahı və həyat səviyyəsinin yaxşılaşdırılmasının dövlət siyasətinin prioritet istiqamətlərindən biri olduğunu vurğulayıb, əmək, məşğulluq, sosial müdafiə və təminat sahələrində idarəçiliyin və əhaliyə xidmətlərin optimal və şəffaf, çevik iş mexanizmləri üzərində qurulduğunu, həssas qrupları əhatə edən sosial müdafiə və aktiv məşğulluq proqramlarının həyata keçirildiyini bildirib. Azərbaycan Respublikasının Birinci vitse-prezidenti Mehriban Əliyevanın təşəbbüsü olan DOST layihəsindən danışan nazir ötən il nazirliyin tabeliyində DOST Agentliyinin və Agentliyin 2 DOST mərkəzinin yaradıldığını, 2019-2025-ci illərdə 31 DOST mərkəzinin yaradılmasının nəzərdə tutulduğunu qeyd edib.
Nazir 2019-cu ildə özünüməşğulluq proqramı üzrə 10 min kiçik biznes müəssisəsinin yaradıldığını deyib və bu rəqəmi Azərbaycanın böyük uğuru adlandırıb.
Sosial tədbirlər sahəsində aparılan elektronlaşma haqqında geniş məlumat verən S.Babayev nazirlik üzrə 132 xidmətdən 50-nin elektronlaşdığını, qurumun elektron bazalarının Azərbaycan Respublikasının Vergilər Nazirliyinin bazalarına inteqrasiya olunduğunu diqqətə çatdırıb. Həmçinin sosial portalın yaradıldığını bildirən nazir hər bir vətəndaşın şəxsi onlayn kabinetinə daxil olaraq bütün lazımi məlumatları əldə edə biləcəyini diqqətə çatdırıb.
Daha sonra S.Babayev AMEA əməkdaşları tərəfindən səsləndirilən suallara və təkliflərə aydınlıq gətirib. Fikir mübadiləsi zamanı əməkhaqları, təqaüd, elmi dərəcə və elmi adlara görə verilən əlavə ödənişlərin artırılması, zərərli iş şəraitinə görə ödənişlərin edilməsi, sosial sığortaların hesablanması və digər bu kimi mühüm məsələlər müzakirə olunub. Nazir gələcəkdə sosial sahə üzrə sistemlərin avtomatlaşdırılması, qanunvericilikdə mövcud olan boşluqların aradan qaldırılması, zərərli maddələr siyahısına əlavələr edilməsi və normativ-hüquqi sənədlərdə aparılan təsnifatın təkmilləşdirilməsi işində ölkə alimlərinin potensialından istifadə edilməsinin zəruriliyini vurğulayıb.
Sonda AMEA-nın prezidenti, akademik Ramiz Mehdiyev akademiya əməkdaşları adından Əmək və Əhalinin Sosial Müdafiəsi naziri Sahil Babayevə minnətdarlığını ifadə edərək, belə formatda görüşlərin bundan sonra da davam etdiriləcəyini nəzərə çatdırıb.

Paylaş:

Baxılıb: 417 dəfə